Glo Jehovah se Getuies in Jesus?

Ja. Ons glo in Jesus, wat gesê het: “Ek is die weg en die waarheid en die lewe. Niemand kom na die Vader behalwe deur my nie” (Johannes 14:6). Ons glo dat Jesus van die hemel af aarde toe gekom het en sy volmaakte menselewe as ’n losprysoffer gegee het (Matteus 20:28). Sy dood en opstanding bied mense wat geloof in hom beoefen, die geleentheid om die ewige lewe te verkry (Johannes 3:16). Ons glo dat Jesus tans as Koning van God se hemelse Koninkryk regeer, wat binnekort vrede op die hele aarde tot stand sal bring (Openbaring 11:15). Maar ons glo Jesus ook wanneer hy sê: “Die Vader is groter as ek” (Johannes 14:28). Daarom aanbid ons Jesus nie, want ons glo nie dat hy God die Almagtige is nie.