’n Godsdienskermis

Deur Ontwaak!-medewerker in Italië

IN Februarie 1995 het gerugte aangaande ’n sogenaamde hedendaagse wonderwerk die rondte begin doen: Daar is glo gesien hoe ’n Maria-beeld in Civitavecchia trane van bloed huil. Sedertdien het Katolieke van oor die hele wêreld pelgrimstogte onderneem om self die beeld te sien.

Maar volgens die koerant La Repubblica is baie Katolieke ongelukkig oor die “kermisatmosfeer” wat by die toeristeplek heers. Selfs ’n aantal teoloë is besorg oor die menigtes wat toestroom om die beeld te vereer. Luigi Pizzolato, ’n dosent aan die Katolieke Universiteit van Milaan, kritiseer byvoorbeeld die kerk omdat dit tevrede is met geloof “wat op emosies gegrond” is. Hy sê dat die vrugte wat deur hierdie sogenaamde wonderwerk voortgebring word “deur bygeloof bederf” word. ’n Ander teoloog, Carlo Molari, herinner ons daaraan dat “’n sekere Simon die Towenaar, wat in die Nuwe Testament gemeld word, buitengewone kragte gebruik om sy eie oogmerke te bevorder—om geld te maak, soos ons vandag sal sê”.—Handelinge 8:9-24.

Jesus het sy dissipels gewaarsku om op hulle hoede te wees vir diegene wat “groot tekens en wonders” sou verrig (Matteus 24:3, 24). Selfs wanneer sulke tekens eg lyk, kan ’n Christen se geloof nie op veronderstelde wonderwerke gegrond wees nie (Hebreërs 11:1, 6). Jy verkry eerder ’n vaste geloof deur juiste kennis van God se Woord op te doen en die raad daarin toe te pas (Johannes 17:3; Romeine 10:10, 17; 2 Timoteus 3:16). Wil jy graag daardie soort geloof hê? Laat Jehovah se Getuies jou help wanneer hulle jou weer besoek.

[Foto-erkenning op bladsy 31]

AGF/La Verde