Were a Ŋa?

1. Raŋo waripo lamo Were?

Were mar’adieri am’ocweyo kis gimoro je. Go ongoye gi cakirok, kendo ongoye gi gike. (Zabuli 90:2) Wac maber manitie i Baibul wok bonge. (1 Timothe 1:11) Rupiri Were am’omiyo wan kwo, go kende ama waripo lamo.​—Soma Menyirok 4:11.

2. Baibul fonjo wan aŋo kwoŋ Were?

Ongoye dhano m’otieko nenoye Were rupiri Were obedo cuny. Meno nyutho ni go nigi kwo ma malo swa loyo cwec moro je manitie i piny ka. (Yohana 1:18; 4:24) To wanyalo fonjere kite pa Were ka waneno gikipiny ma go ocweyo. Paka gir’anena, yen manyak giracama kodi mawuwa nyutho wan ni Were nigi mar kodi rieko. Gikipiny makweth ma Were ocweyo i polo g’ipiny nyutho wan ni go nigi meni.​—Soma Joroma 1:20.

Wanyalo fonjere gikipiny makweth ma mako kwoŋ Were ka wasoma Baibul. Paka gir’anena, Baibul waco ri wan gikipiny ma Were mito kodi gikipiny ma go kimiti, kendo waco ri wan paka Were tiyere gi ji kodi paka go mako wac i nger m’opokere opokere.​—Soma Zabuli 103:7-10.

3. Were nigi nyinge?

Yesu owaco ni: “Bawan ma i polo; nyingin wolwor.” (Matayo 6:9) Kada nende Were dwoŋ swa, aka wanyalo miyo go wor i nger m’opokere opokere, go nigi nyinge acel kende. I kis dhudhoki ituco nyingi Were i nger m’opokere. I Dhopadhola, ilwoŋo were ni “Jehova.”​—Soma Zabuli 83:18, NW.

I Baibul mathoth okwanyi woko nyingi Were tiketh’iye dwoŋ pere ayin, paka Rwoth kosa Were. To munyo nyaka ondiki Baibul, nyingi were obed’iye kalo di 7,000. Yesu ofonjo ji nyingi Were.​—Soma Yohana 17:26, NW.

Neni vidiyo Were Nigi Nyinge?

4. Jehova dewo kwoŋ wan?

Candirok madit manitie i piny nyutho ni Jehova kidewi kwong wan? Joman jowaco ni Were kelo ri wan candirok wonyali temo wan, to meno k’obedo adieri.​—Soma Yakobo 1:13.

Were omiyo wan thwolo ma yero gimarac kosa gimaber. Wakifoyi tektek bedo ni Were weyo wan to wawegi wayero lamo go? (Yosuwa 24:15) Raco mere, jomathothi jotimo wadi gin gikipiny mareco, am’omiyo candirok dit i piny. Jehova winjo malith swa ka ji jotimo wadi gin gikipiny mareco.​—Soma Cakirok 6:5, 6.

Jehova obedo Were ma dewo kwoŋ wan. Go mito ni walimi kisangala i kwo. Go cegin kwanyo woko candirok kodi joma kelo ri wadi gin candirok. Were ni g’atoŋa maber m’omiyo go fodi kokwanyo woko candirok. I fonji mar’aboro ma kitawo me, ilaŋeyo atoŋa no.​—Soma 2 Petero 2:9; 3:7, 13.

5. Wanyalo nedi bedo merin pa Were?

Jehova mito wabedi merin pere. Go mito ni wakway go to wawaco ri go teko mawan je. Go dewo kwoŋ kis dhano. (Zabuli 65:2; 145:18) Go mito swa cwako ri wan reco mawan. Go neno ka watemo paka wanyalo timo gima go mito, kada ruman kiyot ri wan. Kada nende wanigireco wanyalo bedo merin pa Were.​—Soma Zabuli 103:12-14; Yakobo 4:8.

Rupiri Jehova am’omiyo wan kwo, waripo maro go loyo dhano moro je. (Mariko 12:30) K’imedere fonjirok gima mako kwoŋ Were kodi timo gima go mito, ilabedo mere pere.​—Soma 1 Timothe 2:4; 1 Yohana 5:3.