Adieri Wac Maber Wok Bongi Were?

1. Ŋat’ondiko Baibul?

Baibul n’iye wac maber ma waco ni ji jolabedo i piny ka cil gi cil. (Zabuli 37:29) Baibul n’iye kitawin 66. Were ooro ji 40 ndiko kitawin no. Musa am’ondiko kitawin abic mar’apena, oro 3,500 m’okadho. Jamoor Yohana am’ondiko kitawo macowe oro 1,900 m’okadho. Joma jondiko Baibul jondiko paro pa ŋa? Were om’owaco ri jo gikipiny ma jondiko munyo oro cuny maleŋ. (2 Samwiri 23:2) Wac ma jondiko obedo apa Were ma kiweno apa jo. Ri ameno, Baibul obedo wac pa Jehova.​—Soma 2 Timothe 3:16; 2 Petero 1:20, 21.

Neni vidiyo Ŋat’ondiko Baibul?

2. Aŋo manyutho ni Baibul obedo kitawo ma n’iye adieri?

Baibul obedo wac pa Were rupiri kis gima Baibul waco tundo i kare. Ongoye dhano manyalo timo ameno. (Yosuwa 23:14) Were Majameni Je kende, amanyalo ŋeyo gim’otimere i hongo mabino.​—Soma Isaya 42:9; 46:10.

Kitawo mawok bongi were ripo bedo ni opokere kwoŋ kitawin megi, aka iy’adieri Baibuli obedo kitawo m’opokere swa. Otieki wodho Baibul mathoth swa i dhudhok makweth. Kada nende Baibul obedo kitawo m’ondiki cango con, makere gi sayans. Aka gikipiny ma ji 40 jondiko i Baibul makere pa gini dhano acel am’ondiko. Medo kwoŋ meno, Baibul konyo wan ŋeyo mar pa Were, aka Baibul nigi meni manyalo wiro kwo pa dhano tobedo maber. Gikipinyi no je miyo ji ridho ni Baibul obedo Wac pa Were.​—Soma 1 Jothesalonika 2:13.

Neni vidiyo Aŋo Manyutho Ni Gima Nitie i Baibul Obedo Adieri?

3. Baibul luwo kwoŋ aŋo?

Megi kwoŋ gikipiny maber ma Baibul waco ri wan a gikipiny maber ma Were cegin timo ri ji. Baibuli waco ri wan paka cango ji jokeŋ silwany ma bedo i piny maŋon, aka odoko to waco ri wan nger ma Were bino loko piny me kabedo maŋon.​—Soma Menyirok 21:4, 5.

Kendo Wac pa Were n’iye cik, fonji, kodi rieko manyalo konyo wan. Baibul waco ri wan paka cango Were otiyere gi ji. Ri ameno, Baibul nyalo konyo wan ŋeyo kite pa Were maber. Kendo Baibul nyutho wan paka wanyalo bedo merin pa Were.​—Soma Zabuli 19:7, 11; Yakobo 2:23; 4:8.

4. Inyalo nedi niaŋ gi Baibul?

Kitawo me lakonyin. Walaoro nger ma Yesu cango ooro munyo fonjo ji. Yesu osoma ri ji ndiiko maleŋ, to “tito ri jo” gima ndiiko no waco.​—Soma Luka 24:27, 45.

Ongoye gimaber loyo wac maber mawok bongi Were. Kada ameno, nitie joma jokimiti kada winjo wac no, aka joman wac no miyo jo nge. To in medere fonjirok wac maber. K’imito limo kwo makirum, iripo ŋeyo Were.​—Soma Yohana 17:3.