FUONJI 11
Kweri Din Jye Matwodo!
Sitan kodi jwogi pere jokimiti ni ilami Were. Jokimiti dhano moro jye wodoŋi yu thenge pa Were. Jooro ryeko mene? Achiel kwoŋ gikipiny ma jooro, a din matwodo. (2 Jokorintho 11:13-15) Ka din kifuonji adyeri mawok i Baibul, bedo din matwodo. Din matwodo chale gi pesa mochwogi achwoga. Nyalo neno pa pesa motire, to kibedi gi kony. Pesa ma chalo ameno nyalo kelo rin teko madwoŋ swa.
Fuonji matwodo kinyal kisangala Jehova, Were maradyeri. Munyo Yesu nitye i piny ka, oido nitye kitipa ma din moido mito neko go. Oido joparo ni din pajo amotire. Jowacho ni: “Wanitie gi Bawan acel kende, Were won gipi.” Yesu oyeyere gi jo? Be! Owacho ri jo ni: “Wibedo nyithindho pa bawin, jwogi.” (Yohana 8:41, 44) Konon, joma thoth joparo ni jolamo Were, kareno iyadyeri, jolamo Sitan kodi jwogi pere!—1 Jokorintho 10:20.
Paka yath marach nyak gimarach, apaka din matwodo bende bed’iye ji marecho. Piny opoŋ’iye teko rupiri ji jotimo gikipiny marecho. Nitye lweny, kwo, chandirok, nek, kodi mako mon. Joma thoth ma jotimo gikipiny me jo ni gi din, to din pajo kifuonji jo timo gimaber. Ka jokoweyo ameno timo gikipiny marecho, jokinyal bedo merin pa Were.—Matayo 7:17, 18.
Din matwodo fuonjo ji lamo chal. Were chiero wan lamo chal. Par kwoŋ gime: Inyalo fuoyo ka dhano okwero luwo kodin to luwo gi picha perin ayino? Ŋato nyalo bedo mere perin? Be, kinyal. Jehova mito ni waluwi gi go ayino, ma kiweno gi picha kosa chal, mongoye gi kwo.—Tim 17:29.
Din matwodo fuonjo ni neko ji i lweny kobedo gimarach. Yesu ofuonjo ni merin pa Were joripo marere. Wakinyal neko ji ma wamaro. (Yohana 13:35) Kada neko jomarecho obedo gimarach. Munyo jokwor pa Yesu jobino mako go, Yesu ochiero jofuonjirok pere lwenyo.—Matayo 26:51, 52.
Din matwodo fuonjo ni Were waŋo ji i mach makitho. Kuchiel, Baibul fuonjo ni: “Kemba pa gimarach obedo tho.” (Joroma 6:23) Jehova obedo Were majamar. Were majamar nyalo waŋo ji i mach makitho? Be! Din achiel kende ma Jehova yeyere gine, ama bino bedo i piny manyien. (Menyirok 15:4) Din moro jye ma fuonjo twodo pa Sitan ibino reyo woko.