12 Inyalo Nedi Core Cegin gi Were?

1. Were winjo kwayo je?

Were mito ni ji ma nonin je jowokwayi go, ameno jowonyali core cegin gi go. (Zabuli 65:2) To nitie kwayo ma Were kiwinji. Paka gir’anena, Were kiwinji kwayo pa jacwo ma cando cege. (1 Petero 3:7) Cango munyo Joisiraili jomedere timo gikipiny mareco, Were okwero winjo kwayo pajo. Kwayo obedo silwany madwoŋ swa ma Were omiyo wan. Were winjo kir kwayo pa dhano m’oyido timo gikipiny mareco, ka ŋato oŋuto reco pere.​—Soma Isaya 1:15; 55:7.

Neni vidiyo Were Winjo Kwayo Je?

2. Waripo kwayo nedi?

Kwayo obedo acel kwoŋ nger ma walam’iye Were. Ri ameno, waripo kwayo Jacwec mawan, Jehova kende. (Matayo 4:10; 6:9) Aka paka wabedo jotimi reco, waripo kwayo i nyingi Yesu rupiri go otho ri reco mawan. (Yohana 14:6) Jehova kimiti ni waluda kwayo ma wamako amaka i wiyi wan kosa m’ondiki i kitawo. Go mito ni gima wakwayo go wowoki i cuny wan.​—Soma Matayo 6:7; Jofilipi 4:6, 7.

acwec mawan winjo kir kwayo ma nyaliŋliŋ. (1 Samwiri 1:12, 13) Go mito ni wakway go i hongo moro je; paka odikini, othieno, ka wakidho cemo, kosa ka walimo teko.​—Soma Zabuli 55:22; Matayo 15:36.

3. Raŋo Jokristo joromo kanyacel?

Kiyot bedo mere pa Were rupiri wabedo i dier ji ma jokiyey Were kendo ma jokiyey gikipiny ma Were ociko timo ri wan, paka kelo siem i piny. (2 Timothe 3:1, 4; 2 Petero 3:3, 13) Am’omiyo ber romo kanyacel gi Jokristo wadi wan wamedere meni.​—Soma Joebulaniya 10:24, 25.

Romo kanyacel gi joma jomaro Were konyo wan corok cegin gi Were. K’ikidho kama Wajulizi pa Jehova jorom’iye lamo Were, ilanwaŋo ji ma joni gi yeyo aka jolamedin meni.​—Soma Joroma 1:11, 12.

4. Inyalo nedi core cegin gi Were?

Inyalo core cegin gi Jehova k’imedo paro kwoŋ gikipiny m’itieko fonjere i Baibul. Pari kwoŋ gikipiny ma Were timo, rieko ma go miyo wan, kodi gikipiny ma go ociko timo ri wan. Kwayo Were kodi paro kwoŋ gikipiny m’ifonjere lakonyin medo ŋeyo mar pa Were gi rieko pere.​—Soma Yosuwa 1:8; Zabuli 1:1-3.

K’imito core cegin gi Were, ripere igeni go kendo ibedi gi yeyo. To yeyo cale kodi gimakwo ma mitere pidho. Iripo pidho yeyo perin munyo iparo kwoŋ gikipiny m’ifonjere t’iridho ni obedo adieri.​—Soma Matayo 4:4; Joebulaniya 11:1, 6.

5. Bero aŋo m’ilalimo k’icore cegin gi Were?

Jehova dewo kwoŋ ji ma jomaro go. Go nyalo kuro jo kwoŋ gimoro je manyalo nyapo yeyo pajo kosa cero jo limo kwo makirum. (Zabuli 91:1, 2, 7-10) Go waco ri wan gikipiny manyalo ketho kwo mawan i teko kendo manyalo cowo kwoŋ wan siem. Gikipiny ma Jehova fonjo wan konyo wan bedo gi kwo maber.​—Soma Zabuli 73:27, 28; Yakobo 4:4, 8.