Raŋo Ber Imedere Fonjirok Baibul?

1. Bero aŋo m’ilalimo k’imedere fonjirok Baibul?

Gikipiny ma nyaka ifonjere i Baibul ripo bedo ni okonyin medo maro Jehova. To iripo timo gimanyalere je nyalo kuro mar no. (1 Petero 2:2) Ilalimo kwo makirum k’imedere fonjirok gima mako kwoŋ Were.​—Soma Yohana 17:3; Yuda 21.

K’imedere ŋeyo Were, yeyo perin bino ridhere. Yeyo no lakonyin miyo Were winjo maber. (Joebulaniya 11:1, 6) Kendo yeyo lamiyin ŋuto reco perin kodi timo gikipiny ma Were mito.​—Soma Tim 3:19.

2. Inyalo konyo nedi joman?

Adieri ilamito wacoye ri joman wac maber m’ifonjere i Baibul. Wajoje watimo ameno. K’imedere fonjirok Baibul, ilaŋeyo nger m’inyalo oro Baibul tito ri joman gim’omiyo iyeyo Jehova, kendo ilanyalo tito ri jo wac maber m’ifonjere.​—Soma Joroma 10:13-15.

Joma thoth jocako tito wac maber me ri wati kodi merin pajo. To ber oro rieko munyo iluwo gi jo. Ikiri iwaci ri jo ni din pajo obedo ma twodo, to waci ri jo gikipiny maber ma Were ociko timo ri ji. Aka ber poyo ni kula perin maber amalaywayo ji loyo wac m’iluwo.​—Soma 2 Timothe 2:24, 25.

3. Bero aŋo m’ilalimo?

Fonjirok Wac pa Were lakonyin ridho yeyo perin t’ilokere mere pere. Aka ilabedo acel kwoŋ ji pa Jehova.​—Soma 2 Jokorintho 6:18.

4. Inomedere nedi dongo?

Ilamedo dongo i yeyo perin k’imedere kisoma Wac pa Were. (Joebulaniya 5:13, 14) Waci ri Wajulizi pa Jehova jowofonjin kitawo m’ilwongo ni What Can the Bible Teach Us? K’imedere kisoma Wac pa Were, kwo perin bende lamedere bedo maber.​—Soma Zabuli 1:1-3; 73:27, 28.

Wac maber wok bongi Jehova, Were majakisangala. Ilamedo core cegin gi Jehova k’iromo kanyacel gi ji pere. (Joebulaniya 10:24, 25) K’imedere timo gima Jehova mito, meno nyutho ni imito limo kwo mar’adieri, m’obedo kwo makirum. Ongoye gimaber loyo bedo mere pa Were.​—Soma 1 Timothe 1:11, NW; 1 Timothe 6:19.