Raŋo Were Nitie gi Kitipa pa Ji ma Jolamo Go i Piny?

1. Raŋo cango Were oyero Joisiraili bedo ji pere?

Were cango oyero nyikway Abraham to loko jo nono acel, rumacen to miyo jo cik. Olwoŋo nono no ni “Isiraili” aka jo kende am’oyido joŋeyo nger m’otire ma lamo Were. Were omiyo jo wac pere. (Zabuli 147:19, 20) Ri ameno, ji ma nonin je oyido jonyalo limo silwany wok kwoŋ Joisiraili.​—Soma Cakirok 22:18.

Were oyero Joisiraili bedo wajulizi pere. Gima mako kwoŋ jo nyutho ni ji jolimo silwany ka joluwo cik pa Were. (Cik 4:6) Ri ameno, luwo kwoŋ Joisiraili, ji ma nonin man oyido jonyalo ŋeyo Were mar’adieri.​—Soma Isaya 43:10, 12.

2. Raŋo Jokristo mar’adieri joripo bedo i kitipa acel?

Hongo otundo to Jehova weyo ameno tiyirok gi Joisiraili, to cako tiyirok gi Jokristo ayin. (Matayo 21:43; 23:37, 38) Konon Jokristo mar’adieri ama jobedo Wajulizi pa Jehova, ma kiweno Joisiraili.​—Soma Tim 15:14, 17.

Yesu obino ocano jofonjirok pere i kitipa acel to miyo jo tic ma fonjo wac maber ma mako kwoŋ Ker pa Were i piny gipi. (Matayo 10:7, 11; 24:14; 28:19, 20) Tic no fodi kadho yuwaŋe i ndelo me ma rumacen, aka cegin kir rumo. Jehova oriwo ji matoth swa wok inonin je aka onyo jolamo go iy’adieri; gino oyido fodi k’otimereye wok con. (Menyirok 7:9, 10) Jokristo mar’adieri jonitie i kitipa acel aka jokonyere. I cokirok pajo, jofonjere gimoro acel i piny gipi.​—Soma Joebulaniya 10:24, 25.

3. Din pa Wajulizi pa Jehova manitie konon ocako nedi?

I oro ma 1870, jochako paka jofonjirok ma Baibul. I ndir no, jocako dwaro adieri manitie i Baibul m’oyido orwenyo. Oyido joŋeyo ni cango Yesu Kristo ooro Jokristo mar’adieri fonjo ji wac maber ma mako kwoŋ Ker pa Were. Ameno to jocako tito wac no gi derino i piny gipi. I oro ma 1931, ocaki lwoŋo jo ni Wajulizi pa Jehova.​—Soma Tim 1:8; 2:1, 4; 5:42.

4. Wajulizi pa Jehova jolimo nedi teli?

Munyo Yesu otieko tho, Jokristo mar’adieri ma ndir no oyido jolimo teli wok bongi jodongo ma jotero teli, aka jodongo no oyido jotero Yesu paka jateli pajo. (Tim 16:4, 5) Kiri kononi Wajulizi pa Jehova jolimo teli wok bongi jodongo ma jotero teli i piny gipi. Jodongo no ama joneno ni tic ma timere i ofis pa Wajulizi pa Jehova i piny m’opokere opokere kadho maber. I ofis no akama iwir’iye kitawin ma tito Baibul i dhudhok makalo 600, t’ipoko ri ji i piny gipi. Wajulizi pa Jehova jonitie i kitipin mathindho thindho ma kalo 110,000 i piny gipi, aka joje jofonjere gimoro acel mawok bongi jodongo ma jotero teli. Kis kitipa n’iye cwo ma jotiyo paka jodongo ma kitipa. Cwo no joni gi mar aka jodewo swa kwoŋ rombo pa Were.​—Soma 1 Petero 5:2, 3.

Wajulizi pa Jehova ocan jo tito wac maber kodi loko ji jofonjirok pa Yesu. Paka jomoor pa Yesu cango jotimo, wabende wafonjo ji i pecin pajo. (Tim 20:20) Aka joma jomito fonjirok adieri manitie i Baibul, wafonjo jo nono. To Wajulizi pa Jehova jokobedo abeda kitipa ma din. Wabedo wutimere gi nyimere kendo wani gi Bawan m’omaro wan swa. Kis dhano dewo kwoŋ nyawote. (2 Jothesalonika 1:3) Wajulizi pa Jehova a ji ma joloyo bedo gi kisangala i piny, rupiri jotimo gima Were mito kendo jokonyo joman.​—Soma Zabuli 33:12; Tim 20:35.