FONJI 13
Ginaŋo ma Latundo Kwoŋ Din?
1. Din je ber?
Kis din n’iye jomaber. Bero mere, Were neno jono aka dewo kwoŋ jo. To nitie gikipiny mareco madit swa matimere i din m’opokere opokere. (2 Jokorintho 4:3, 4; 11:13-15) Oŋeyere maber ni jodini jomaro donjo i lweny, neko ji, kodi timo kidakana kwoŋ nyithindho. Gikipiny no ŋedho cuny ji ma jomaro Were.—Soma Matayo 24:3-5, 11, 12.
Din mar’adieri miyo Were dwoŋ to din ma twodo timo gikipiny ma kisangala go. Jofonjo gikipiny ma kimakere gi Baibul. Jokifonji adieri ma mako kwoŋ Were kodi kwoŋ jomotho. Jehova mito ni ji jowoŋeyi adieri ma mako kwoŋ go.—Soma Jafonji 9:5, 10; 1 Timothe 2:3-5.
2. Ginaŋo ma latundu kwoŋ din?
Were oŋeyo maber swa jodini ma jorendere ni jomaro go to sano iy’adieri jomaro piny pa Sitan. (Yakobo 4:4) Din ma twodo je Baibul lwoŋo ni “Babilon madwong.” Babilon obedo tindi ma cango din ma twodo ocak’iye, rumacen ma mikula ma ndir pa Nowa. Were cegin reyo woko din je ma wondo ji.—Soma Menyirok 17:1, 2, 5, 16, 17; 18:8.
Bero mere, Jehova fodi poyo jomaber ma jonitie i din ma twodo m’opokere opokere i piny gipi. Go riwo jono munyo fonjo jo adieri.—Soma Mika 4:2, 5.
3. Ginaŋo ma jomaber no joripo timo?
Din mar’adieri riwo ji
Jehova dewo kwoŋ ji ma jomito timo gim’otire. Go waco ri jono wok i din ma twodo. Ji ma jomaro Were kibedi ri jo matek wiro kwo pajo to jotimo gima Were mito.—Soma Menyirok 18:4.
Munyo Yesu otieko tho, ji m’oromo jowinjo wac maber ma jofonjirok pere oyido jofonjo to jojolo wac no gi kisangala. Jofonjere gikipiny manyen ma mako kwoŋ Jehova to jolimo geno. Jonyutho wan ranena maber rupiri munyo jowinjo wac pa Were, jojolo wac no to jotimo gima Were mito.—Soma 1 Jothesalonika 1:8, 9; 2:13.
Ji ma joeye i din ma twodo Jehova jolo jo i din mar’adieri. Ka inocaki lamo Jehova, ilalokere mere pere. Ibino lamo go kanyacel gi ji pere ma jomarere. Medo kwoŋ meno, ibino limo kwo makirum.—Soma Mariko 10:29, 30; 2 Jokorintho 6:17, 18.
4. Were okeli nedi kisangala i piny gipi?
Were cegin reyo woko din je ma twodo. Meno obedo wac maber rupiri din ma twodo odoko k’okeli ri ji candirok i piny. Odoko jokowondi ji kodi kelo ri ji pokirok. I hongo no, kis dhano labedo ni lamo Were acel kende mar’adieri.—Soma Menyirok 18:20, 21; 21:3, 4.