Yesu Kristo a Ŋa?

1. Kwo pa Yesu ocako nedi?

Kwo pa Yesu k’ocako paka apa ji. Yesu kutho obedo i polo paka malaika munyo fodi k’onywol go i piny ka. (Yohana 8:23) Go am’obedo cwec pa Were m’otelo, aka okonyo Were gi cweyo gikipiny megi je. Go kende ama Jehova won ocweyo am’omiyo ilwoŋo go ni “Wod Were acel kende.” (Yohana 1:14) Kendo Yesu obedo jaluwo pa Were am’omiyo ilwoŋo go ni “Wac.”​—Soma Agecin 8:22, 23, 30; Jokolosia 1:15, 16.

2. Raŋo Yesu obino i piny?

Were odhiro Wode i piny ka munyo ketho kwo pere i iyi nyako m’ilwoŋo ni Maria m’oyido fodi k’obedoye gi jacwo. Am’omiyo Yesu k’odedo gi bamere i piny ka. (Luka 1:30-35) Yesu obino i piny (1) fonjo wan adieri ma mako kwoŋ Were, (2) nyutho wan ranena i nger ma timo gima Were mito kada ka wan’iteko, kodi (3) miyo kwo pere paka “cul.”​—Soma Matayo 20:28.

3. Raŋo cul oyido mitere?

Cul obedo welo m’iculo botho dhano tho. (Wok 21:29, 30) K’obedo atoŋa pa Were ji ti kosa tho. Raŋo wawaco ameno? Were cango owaco ri dhano m’otelo, Adam, ni k’otimo gimarac, go d’otho. Meno nyutho ni bedi Adam k’otimo gimarac dinyo go fodi kwo kir konon. (Cakirok 2:16, 17; 5:5) Baibul waco ni tho obino i piny luwo kwoŋ Adam. Ri ameno, Adam am’okelo ri nyikwaye je gimarac kodi tho. Cul mitere nyaka wabothi tho ma walunjo wok kwoŋ Adam.​—Soma Joroma 5:12; 6:23.

Oyido ŋa manyalo culo ri wan cul no to botho wan tho? Ka watho waculo reco mawan kende. Ongoye dhano manyalo culo reco pa joman rupiri ji je joni gi reco.​—Soma Zabuli 49:7-9.

4. Raŋo Yesu otho?

Pokirok kwoŋ wan, Yesu oyido ongoye gi reco. Ri ameno, go oyido kiripere tho rupiri ongoye gimoro je marac ma go otimo. Yesu otho ri reco pa joman. Were onyutho wan mar munyo odhiro Wode tho ri wan. Yesu bende onyutho wan mar munyo owinjo Bamere toyeyo tho ri reco mawan.​—Soma Yohana 3:16; Joroma 5:18, 19.

Neni vidiyo Raŋo Yesu Otho?

5. Yesu timo aŋo pama?

Munyo Yesu fodi nitie i piny ka, go obotho jotwo, ocerino jom’otho, kendo okonyo ji m’oyido joni gi teko m’opokere opokere. Ameno Yesu onyutho gikipiny ma go latimo i hongo mabino, ri joma timo gima Were mito. (Matayo 15:30, 31; Yohana 5:28) Munyo Yesu otho, Were ocerino go i kwo ma cuny. (1 Petero 3:18) Rumacen, Yesu ogiki i polo to bedo yu cingi Were maracuc to kuro Were miyo go dhum ma piny gipi. (Joebulaniya 10:12, 13) Pama Yesu dhumo paka Kere i polo, aka jofonjirok pere jofonjo ji wac maber me i piny gipi.​—Soma Daniel 7:13, 14; Matayo 24:14.

Yesu cegin oro meni pere paka Kere wokwany woko candirok je kodi jono majokelo ri wadi gin candirok. Jono je majoketho yeyo pajo i Yesu to jotimo gima go mito jobino limo kwo makirum i piny.​—Soma Zabuli 37:9-11.