Mikula Ma Ndir Pa Nowa Fuonjo Wan Aŋo?

Jehova koyey jomarecho nyieko piny manyien. Merin pa Were kende ama jolebedo i piny manyien. Were letimo nedi jomarecho? Nyalo dwoko penji no, par kwoŋ gimobedo i ndir pa Nowa. Nowa obedo i piny ka chango chon. Go obedo dhano maber aka otemo paka nyalo timo gima Jehova yenyo. Kuchiel, joman moido jobedo i piny i ndir no, oido jotimo gikipiny marecho. Ri ameno, Jehova owacho ri Nowa ni oido kidho kelo mikula woreyi woko jomarecho. Owacho ri Nowa geto yee ma botho go kanyachiel gi jopecho pere ka Mikula obino.​—Cakirok 6:9-18; Joebulaniya 11:7.

Nowa kodi jopecho pere jogeto yee. Nowa owacho ri ji kwoŋ mikula moido kidho bino, to jokowinjo go. Jomedere ameda timo gikipiny marecho. Munyo geto yee orumo, Nowa orwak’iye ogwange, to go bende kanyachiel gi jopecho pere jodonjo i yee. Rumachien to Jehova kelo asur madwoŋ swa. Koth ochwe ndelo 40 wor g’odyechieŋ to umo piny gipi.​—Cakirok 7:7-12.

Jomarecho jotho, to Nowa kodi jopecho pere joboth. Jehova obotho jo to jobedo i piny mongoy’iye recho moro jye. (1 Petero 3:20) Baibul wacho ni ndelo chiegin tundo ma doko Jehova lerey’iye woko joma kimiti timo gimaber. Ji mabeyo joleboth. Jobino bedo i piny manyien chil gi chil.​—2 Petero 2:5, 6, 9.

Konon joma thoth jotimo gikipiny marecho. Piny opoŋ’iye teko. Kis ndelo, Jehova oro ji pere miyo ji rapiri, to joma thoth jokiwinji wach pa Jehova. Jokimiti wiro kula pajo. Jokimiti yeyo gima Were wacho kwoŋ gimotire kodi gima kotire. Were otimi aŋo ri jono? Jowiri kula pajo? Joma thoth jokowiri kula pajo. Ndelo chiegin tundo worey woko jomarecho kichutho ma doko jokobedi i piny ka.​—2 Jothesalonika 1:8, 9.

Were korey woko piny me; to bino loko manyien ayino. Merin pa Were jobino bedo i piny ka chil gi chil.​—Zabuli 37:29.