Piny Manyien Chiegin Tundo!

Gikipiny marecho matimere i piny konon, nyutho ni piny manyien chiegin tundo. Baibul chango owacho ni di waneno teko makweth munyo piny manyien chiegin tundo. Adyeri, pama wanitye i hongo ma chalo ameno. Me a gikipiny megi ma Baibul chango owacho ni d’otimere:

Lweny. “Nono bino lwenyo gi nono man, to ker acel lwenyo gi ker man.” (Matayo 24:7) Mikwenda me otyeko tundo i kare. Wok i oro ma 1914, watyeko bedo gi lweny ma piny gipi diryo kodi lweny megi i kabedo mopokere opokere. Ji gana gi gana jotyeko tho i lweny.

Two moasere. ‘Two labedo bedo i kabedo m’opokere.’ (Luka 21:11) Iyadyeri, wach me otundo i kare. Two pal chuny jo, lihera, musuja, two twilo, kanyachiel gi two megi mopokere opokere otyeko neko ji gana gi gana.

Kech. I piny gipi, nitye ji ma jongoye gi chiemo ma romo jo. Ji gana gi gana jotho kech kis oro. Me obedo ranyuth man ma miyo wan ŋeyo nike piny manyien chiegin tundo. Baibul wacho ni: “Kec bino bedo.”​—Mariko 13:8.

Yengirok pa piny. “Yengirok pa piny [bino bedo] i kabedo m’omore.” (Matayo 24:7) Gime bende timere pama. Yengirok pa piny otyeko neko ji ma kalo milion achiel wok i oro ma 1914.

Ji marecho. Ji jobino bedo “jomawor i pesa” kodi “joyumirok” kendo “jobino maro kisangala ma piny loyo Were.” Aka nyithindho jobino bedo “joma kiwinji jonywol pajo.” (2 Timothe 3:1-5) Ikiyey ni pama joma chalo ameno jonitye? Jokiwor Were, kendo jodak joma fuonjere gima mako kwoŋ Were.

Turo chik. “Tim mareco medere.” (Matayo 24:12) Miti ibende ineno ni tim marecho omedere tektek konon. Kis kamoro ji jolworo kwalo jo kosa timo jo marach.

Gikipiny me jye nyutho ni Ker pa Were chiegin bino. Baibul wacho ni: ‘Ka wineno gikipiny me timere, ŋeyi win ni Ker pa Were cegin bino.’ (Luka 21:31) Ker pa Were a ginaŋo? Obedo adhum pa Were ma polo ma bino loko piny me kabedo maŋon swa. Ker pa Were bino kwanyo woko adhum pa ji nyaka won wochaki dhumo.​—Daniel 2:44; Menyirok 11:15.