O Bua Nɛ Jɔ Ke Nihi Ngɛ Mo Nyɛe Po

1. Mɛni Yesu de, nɛ mɛni he je nɛ e ngɛ nyakpɛ ɔ?

NGƐ Yesu Yoku ɔ Nɔ Fiɛɛmi ɔ mi ɔ, e de ke: ‘Be fɛɛ be nɛ nihi maa nyɛ nyɛ ɔ, nyɛ bua nɛ jɔ. (Luka 6:22) Munyu nɛ ɔ nɛ Yesu tu ɔ ma nyɛ maa pee e tue buli ɔmɛ nyakpɛ, ejakaa nɔ ko be nɛ e bua maa jɔ ke nihi ngɛ lɛ nyɛe. Mɛni he je nɛ Yesu tu jamɛ a munyu ɔ? E tu munyu nɛ ɔ ejakaa nihi babauu nyɛɔ Yesu kaseli hu nɛ a ngɛ mwɔnɛ ɔ. Ngɛ ní kasemi nɛ ɔ mi ɔ, wa ma susu nɔ́ he je nɛ nihi nyɛɔ wɔ mwɔnɛ ɔ he. Jehanɛ hu ɔ, wa maa na nɔ́ he je nɛ e sa kaa wa bua nɛ jɔ ke nihi ngɛ wɔ nyɛe.

NƆ́ HE JE NIHI NYƐƆ WƆ

2-3. Mɛni ji yi mi tomi titli he je nɛ a waa anɔkuale Kristofohi yi mi ɔ, nɛ kɛ enɛ ɔ haa nɛ wa naa nihi nɛ a teɔ si kɛ woɔ wɔ ɔ ha kɛɛ? (Yohane 16:​2, 3)

² A nyɛɔ wɔ akɛnɛ wa ngɛ Yehowa sɔmɔe ɔ he je. Yesu tu munyu kɛ kɔ nihi nɛ a maa wa e se nyɛɛli ɔmɛ yi mi, nɛ a maa gbe a ti ni komɛ ɔ he. E de ngɛ a he ke: “A li Tsɛ ɔ, nɛ a li imi hulɔ.” (Kane Yohane 16:​2, 3.) Mɛnɔ lɛ haa nɛ a waa wɔ yi mi? Jamɛatsɛ ɔ ji Satan. Satan ji “je nɛ ɔ mi mawu ɔ” nɛ. (2 Kor. 4:​3, 4) E yuɔ nihi a hɛngmɛ konɛ a ko le anɔkuale nɛ kɔɔ Yehowa he, nɛ e woɔ mɛ he wami hu kaa a te si kɛ wo nihi nɛ a le Mawu, nɛ a suɔ lɛ ɔ. (Yoh. 8:​42-44) Kɛ enɛ ɔ haa nɛ wa naa nihi nɛ a waa wɔ yi mi ɔ ha kɛɛ? Wa le kaa Satan ji nɔ nɛ ngɛ mɛ sisie, enɛ ɔ he ɔ, wa pee we mɛ yayami kɛ to yayami nane mi.

³ Mo susu Pavel,a níhi a si kpami ɔ he nɛ o hyɛ. A tsi wa jami ɔ nya ngɛ he nɛ e ngɛ ɔ. Akɛnɛ e kɛ anɔkuale yemi sɔmɔɔ Yehowa he je ɔ, a nu lɛ, a kongo lɛ, nɛ a wo lɛ tsu nyɔhiɔ komɛ. E de ke: “I na heii kaa Satan kɛ daimonio ɔmɛ ji nihi nɛ a ngɛ mɔde bɔe konɛ a tsi wa nya nɛ wa ko sɔmɔ Yehowa. Nihi nɛ a tsuɔ ní ngɛ tsu womi he ɔmɛ a kpɛti nihi fuu be wa he juɛmi yaya. A ní tsumi kɛkɛ lɛ a ngɛ tsue.” Nyɛminyumu ko nɛ e ngɛ Croatia nɛ e fɔli sɔmɔ we Yehowa a wa lɛ yi mi wawɛɛ. E de ke: “I ba na kaa Satan ji ye he nyɛlɔ tutuutu, se pi ye fɔli ɔmɛ.”—Efe. 6:12.

4. Mɛni wa ma nyɛ maa kase kɛ je nɔ hyɛmi níhi nɛ Yesu kɛ Stefano pee ɔ mi? (Hyɛ foni ɔ hulɔ.)

⁴ Wa nyɛ́ nihi nɛ a teɔ si kɛ woɔ wɔ ɔ. Ngɛ anɔkuale mi ɔ, wa ma nyɛ maa sɔle ha mɛ. (Mat. 5:44) Wa ma nyɛ maa kase Yesu kɛ Stefano ngɛ enɛ ɔ blɔ fa mi ɔ. Benɛ Roma ta buli ɔmɛ ngɛ Yesu kae kɛ wo sɛumi tso ɔ nɔ ɔ, e de ke: “Tsaatsɛ, moo ngɔ kɛ ke mɛ.” (Luka 23:34) Yesu ngɛ Yehowa bie nɛ e ngɔ ta buli ɔmɛ nɛ a tsɔ mɛ konɛ a ba gbe lɛ ɔ a he yayami kɛ ke mɛ. Eko ɔ, nihi nɛ e he nyɛli ɔmɛ wo a yi mi nɛ a ngɛ ngmlaa kpae ke a gbe lɛ ɔ hu ngɛ e juɛmi mi. Yesu le kaa nimli nɛ ɔmɛ li nɔ́ tutuutu nɛ a ngɛ pee ɔ. Jã nɔuu kɛ̃ nɛ Stefano hu de Mawu kaa e ngɔ nihi nɛ a ma lɛ gbemi ɔ a he yayami kɛ ke mɛ. (Níts. 7:​58-60) Anɛ Yehowa ha a sɔlemi ɔmɛ a heto lo? Ee. Nihi fuu nɛ a ngɛ hlae nɛ a gbe Yesu ɔ ba tsake a tsui pee se, a ná hemi kɛ yemi ngɛ e mi, nɛ a baptisi mɛ. (Níts. 2:​36-41) Ke e hí kulaa a, Saul nɛ e je Taaso nɛ́ e kplɛɛ kaa a gbe Stefano ɔ ba pee Kristofono, nɛ pee se ɔ, e pia e he ngɛ nɔ́ nɛ e pee ɔ he.—1 Tim. 1:13.

5. Mɛni o kase ngɛ César níhi a si kpami ɔ mi?

⁵ Mwɔnɛ ɔ hu ɔ, Yehowa buɔ sɔlemihi nɛ wa sɔleɔ kɛ haa nihi nɛ a waa wɔ yi mi ɔ tue. Mo susu César nɛ e ngɛ Venezuela a níhi a si kpami ɔ he nɛ o hyɛ. E papaa te si kɛ wo lɛ wawɛɛ akɛnɛ e ji Yehowa Odasefono ɔ he je. César de ke: “Ye mami ji yogbayo kɛ nyɛ kpakpa. E ngɛ mi kaa e kɛ Matsɛ Yemi ɔ peeɔ nɔ́ titli ngɛ e si himi mi mohu lɛɛ, se e tsuɔ e blɔ nya ní tsumi kaa yogbayo ɔ pɛpɛɛpɛ. E tsɔɔ i kɛ ye nyɛmimɛ ɔmɛ kaa wa je bumi kpo kɛ tsɔɔ wa papaa. E de wɔ hu ke waa bu wa papaa, ja e de wɔ nɔ́ ko nɛ Yehowa kplɛɛ we nɔ.” Jeha komɛ a se ɔ, e je mi bami bɔni tsakemi. César de ke: “Ligbi ko benɛ i je ye tsui mi nɛ i sɔle se ɔ, i bi ye papaa ke ji e maa suɔ kaa i kɛ lɛ nɛ kase Baiblo ɔ. Benɛ e de ke ee ɔ, ye bua jɔ wawɛɛ nitsɛ.” Nyagbenyagbe ɔ, César papaa ha nɛ a baptisi lɛ. Pi nihi nɛ a teɔ si kɛ woɔ wɔ ɔ tsuo nɛ a peeɔ jamɛ a tsakemi ɔ. Ngɛ ni komɛ a blɔ fa mi ɔ, a nyɛɔ tsakeɔ bɔ nɛ a kɛ wɔ yeɔ ha ke a na kaa wa jeɔ bumi mi kɛ tuɔ munyu, nɛ wa baa wa je mi saminya. Wɔ hu wa bua jɔɔ ke a pee jã! Wa ngɛ blɔ hyɛe wawɛɛ kaa Yehowa, mɔbɔ nalɔ nɛ ji “zugba a tsuo Kojolɔ” ɔ, maa gbla nihi kaa jã a kɛ ba e ngɔ.—1 Mose 18:25.

6. Ngɛ Marko 13:13 ɔ, mɛni ji nɔ́ kpa ko hu he je nɛ nihi nyɛɔ wɔ ɔ?

⁶ A nyɛɔ wɔ akɛnɛ wa ngɛ bumi kɛ ha Yesu ɔ he je. Yesu tsɔɔ kaa a maa nyɛ anɔkuale Kristofohi ngɛ “[e] biɛ ɔ he je.” (Kane Marko 13:13.) Mɛni lɛ Yesu “biɛ” ɔ daa si kɛ ha? E daa si kɛ ha nɔ tutuutu nɛ e ji, kɛ he blɔ nɛ e ngɛ kaa Mawu Matsɛ Yemi ɔ nya Matsɛ ɔ. Nihi nɛ a nyɛɔ wɔ ɔ ngɔɔ a hɛ kɛ fɔɔ je ɔ mi nɔ yeli ɔmɛ a nɔ, se a ngɔɛ a hɛ kɛ fɔ Yesu Kristo, nɔ nɛ Yehowa hla lɛ kaa e ye je ɔ tsuo nɔ ɔ nɔ. Yesu bɔni Matsɛ Yemi kɛ je jeha 1914. E be kɛe nɛ e ma je nɔ yemihi tsuo nɛ a kua e nɔ yemi ɔ kɛ je.

7-8. Mɛni ji yi mi tomi kpa ko hu he je nɛ nihi nyɛɔ wɔ ɔ? (Yohane 15:​18-20) (Hyɛ foni ɔ hulɔ.)

⁷ A nyɛɔ wɔ akɛnɛ wa kua Satan je ɔ he je. Yesu tsɔɔ kaa a maa nyɛ e se nyɛli ɔmɛ ejakaa a “piɛɛ we je ɔ he.” (Kane Yohane 15:​18-20.) Kaa bɔ nɛ kekleekle Kristofo ɔmɛ pee ɔ, wa kuaa je ɔ su yayami ɔmɛ, a ní peepee ɔmɛ, kɛ a munyu tutui nɛ sɛ ɔ. Enɛ ɔ he je ɔ, nihi yeɔ wa nyɛmimɛ ɔmɛ a he fɛu ngɛ sukuu kɛ ní tsumi he. (1 Pet. 4:​3, 4) Se kɛ̃ ɔ, wa bua jɔ kaa nihi nɛ a teɔ si kɛ woɔ wɔ ɔ a ti ni komɛ tsake bɔ nɛ a kɛ wɔ yeɔ ha a, nɛ a jeɔ bumi kpo kɛ tsɔɔ wɔ.

⁸ Mo susu Ignacio, nɛ e ngɛ Central America nɔ hyɛmi nɔ́ ɔ he nɛ o hyɛ. Benɛ e ngɛ sukuu yae ɔ, tsɔɔli ɔmɛ a ti nɔ ko ye e he fɛu jehahi babauu akɛnɛ e baa e je mi saminya a he je. E ngɛ mi kaa nihi kɛ Ignacio hí si saminya, se e nyɛ nɛ e hi si ngɛ Baiblo sisi tomi mlaa amɛ a nya. Enɛ ɔ he ɔ, loko e maa gbe sukuu ɔ nya a, jamɛ a tsɔɔlɔ ɔ bi lɛ konɛ e tsɔɔ lɛ nɔ́ he je nɛ e nyɛ nɛ e pee jã. Ignacio tsɔɔ nya kaa e naa Mawu mlaa amɛ kaa nɔ́ ko nɛ poɔ nɔ he piɛ. E fɔ tsɔɔlɔ ɔ nine konɛ e ba asafo mi kpe. E pee Ignacio nyakpɛ kaa tsɔɔlɔ ɔ nyɛ nɛ e ba! Tsɔɔlɔ ɔ bua jɔ wawɛɛ kaa nyɛmimɛ ɔmɛ je suɔmi kpo kɛ tsɔɔ lɛ, nɛ kɛ je lɔ ɔ se ɔ, e pui asafo mi kpe mi gblee. Pee se ɔ, akɛnɛ lɛ hu e bɔni Baiblo ɔ kasemi he je ɔ, nihi te si kɛ wo lɛ. Se e ya e hɛ mi ngɛ asafo ɔ mi, nɛ nyagbenyagbe ɔ, e ha nɛ a baptisi lɛ.

9-10. (a) Mɛni yi mi tomi kpa ko hu he je nɛ Kristofohi je ekpa ngɛ nihi nɛ a ngɛ Satan je ɔ mi ɔ a he ɔ? (b) Mɛni wa ma nyɛ maa kase kɛ je bɔfo Paulo nɔ hyɛmi nɔ́ ɔ mi?

⁹ Wɔ hu wa je ekpa ngɛ Satan je ɔ he ejakaa waa kɛ wa he wui ma kudɔmi sanehi kɛ ta hwumi mi. (Yoh. 18:36) Waa kɛ ga womi nɛ ngɛ Romabi 13:1 ɔ tsuɔ ní, nɛ wa yeɔ mlaahi nɛ ma nɔ yeli ɔmɛ wo ɔ nɔ. Se kɛ̃ ɔ, waa kɛ wa he wui ma kudɔmi sanehi a mi, wa da we si nɛ a fɔ̃ sɔ ha wɔ, nɛ wɔ nitsɛmɛ hu wa fɔ̃ɛ sɔ. Mɛni he je? Ejakaa wa yeɔ Yehowa kɛ e Matsɛ Yemi ɔ nɛ Kristo ji e nya matsɛ ɔ anɔkuale. A wo Yehowa Odasefohi fuu tsu ngɛ a hemi kɛ yemi ɔ he je. Ngɛ anɔkuale mi ɔ, nyɛmimɛ nɛ ɔmɛ yaa nɔ nɛ a fiɛɛɔ. Lɔ ɔ tsɔɔ kaa a ngɛ bɔfo Paulo, nɔ nɛ a tsi e nya ngɛ lɛ nitsɛ e we mi, nɛ a wo lɛ tsu jehahi babauu ɔ kasee. (Níts. 24:27; 28:​16, 30) E ya nɔ nɛ e fiɛɛ sane kpakpa a kɛ ha nihi nɛ a suɔ kaa a maa bu lɛ tue ɔ. A kpɛti ni komɛ ji, tsu womi he nɔ hyɛli, matsɛ we nɔ hyɛli, ma nikɔtɔmahi, kɛ Roma Amlaalo Nero sɔmɔli ɔmɛ po.—Níts. 9:15.

¹⁰ Jã nɔuu kɛ̃ nɛ wa nyɛmimɛ nɛ a wo mɛ tsu ɔ fiɛɛɔ kɛ haa nɔ fɛɛ nɔ nɛ maa bu mɛ tue, nɛ́ kojoli, ma nikɔtɔmahi, kɛ tsu womi he nɔ hyɛli hu piɛɛ he. A wo nyɛminyumu ko tsu jeha ekpa kɛ se akɛnɛ e kɛ e he wui ma kudɔmi sanehi mi ɔ he je. E tsɔɔ kaa e nɛ́ tsu nɛ a wo lɛ ɔ kaa tue gblami, mohu ɔ, e naa lɛ kaa ní tsumi nɛ Yehowa kɛ wo e dɛ konɛ e ya hla nihi nɛ a ngɛ kaa jijɔhi ɔ. Ke Yehowa kɛ wɔ tsu ní nɛ wa fiɛɛ sane kpakpa a kɛ ha nihi kaa jã a, wa bua jɔɔ wawɛɛ! (Kol. 4:3) Nyɛ ha nɛ waa hyɛ ní kpa komɛ hu a he je nɛ ke wa ngɛ Yehowa sɔmɔe nɛ nihi ngɛ wɔ nyɛe po ɔ, wa bua jɔɔ ɔ.

NƆ́ HE JE NƐ E SA KAA WA BUA NƐ JƆ KE NIHI NYƐ WƆ

11. Mɛni blɔ nɔ nɛ ke a wa wɔ yi mi ɔ, lɔ ɔ woɔ wa hemi kɛ yemi ɔ mi he wami? Mo ha enɛ ɔ he nɔ hyɛmi nɔ́.

¹¹ Wa le kaa nɔ́ nɛ Baiblo ɔ gba kɛ fɔ si kaa nihi maa nyɛ wɔ ɔ ngɛ mi bae. Ngɛ kekleekle gbami nɛ Yehowa gba ngɛ Baiblo ɔ mi ɔ, e tsɔɔ kaa Satan kɛ e se nyɛli ɔmɛ maa nyɛ nihi nɛ a suɔ Yehowa, nɛ a sɔmɔɔ lɛ ɔ. (1 Mose 3:15) Yesu pɔɔ demi kaa a maa nyɛ nihi nɛ a sɔmɔɔ Yehowa a kaa bɔ nɛ Sane Kpakpa ngmali eywiɛ ɔmɛ de ɔ. (Mat. 10:22; Mar. 13:​9-12; Luka 6:​22, 23; Yoh. 15:20) Baiblo ngmali kpahi hu de jã nɔuu. (2 Tim. 3:12; Yak. 1:2; 1 Pet. 4:​12-14; Yuda 3, 17-19) Enɛ ɔ he ɔ, ke nihi ngɛ wɔ yi mi wae ɔ, e pee we wɔ nyakpɛ. Mohu ɔ, wa bua jɔɔ ejakaa Baiblo mi gbami ɔ ngɛ mi bae. Enɛ ɔ tsɔɔ wɔ kaa wa ngɛ anɔkuale Mawu ɔ jae. Nyɛmiyo ko nɛ e ngɛ ma ko nɛ a tsi wa ní tsumi ɔ nya ngɛ mi ɔ de ke: “Benɛ i jɔɔ ye he nɔ kɛ ha Yehowa a, i le kaa kokooko ɔ, nihi maa te si kɛ wo mi. Lɔ ɔ he ɔ, ke i kɛ kahi ngɛ kpee ɔ, i yi gbeye nɛ e pee we mi nyakpɛ hulɔ.” E huno ɔ piɛɛ nihi nɛ a teɔ si kɛ woɔ lɛ ɔ a he. E waa lɛ yi mi, nɛ e sãa e Baiblo ɔ kɛ asafo ɔ womi kpa amɛ. Se enɛ ɔ wui wa nyɛmiyo ɔ he gbeye, mohu ɔ, lɔ ɔ ha nɛ e hemi kɛ yemi ɔ mi ba wa wawɛɛ. (Heb. 10:39) E de ke: “A gba ke a maa wa wɔ yi mi, enɛ ɔ he ɔ, i le kaa e sa nɛ e ba mi jã. Níhi a si kpami nɛ i ná a ha nɛ i ná nɔ mi mami kaa anɔkuale jami ɔ ji nɛ ɔ nɛ.”

12. Mɛni ye bua nyɛminyumu ko nɛ e nyɛ da yi mi wami nya?

¹² E ngɛ mi kaa wa le kaa a maa wa wɔ yi mi mohu lɛɛ, se be komɛ ɔ, e he waa ha wɔ kaa wa ma fĩ si. Benɛ a wo Nyɛminyumu ko tsu ɔ, e de ke: “Be komɛ ɔ, i haoɔ wawɛɛ nɛ i foɔ ya po.” Mɛni ye bua lɛ nɛ e nyɛ da nya? E de ke, “I sɔleɔ be fɛɛ be. Daa mɔtu ɔ, i sɔleɔ. Ngɛ ligbi ɔ mi hu ɔ, i sɔleɔ ke i kɛ nyagba ko nɛ nya wa kpe. Nɛ ke dami sane nɛ a yí ɔ ha nɛ ye mi mi fu ɔ, i ngaa sinya a kɛ woɔ ye yi ngɛ hedu he ɔ nɛ i sɔleɔ.” Wa nyɛminyumu nɛ ɔ pueɔ e yi mi tɛ hu ngɛ nɔ hyɛmi níhi nɛ kɔɔ nihi nɛ a da yi mi wami nya ngɛ Baiblo ɔ mi, kɛ nihi nɛ a ngɛ jã pee mwɔnɛ ɔ a he. Lɔ ɔ ye bua lɛ kɛ da si temi kɛ womi nɛ e kɛ ngɛ kpee ɔ nya, nɛ e ná tue mi jɔmi nɛ Yesu wo e se nyɛɛli ɔmɛ si kaa a ma ná a.—Yoh. 14:27; 16:33.

13. Mɛni maa ye bua wɔ konɛ waa ye ninyɛ nɔ kunimi?

¹³ Suɔmi nɛ wa ngɛ kɛ ha Yehowa kɛ wa nyɛmimɛ ɔmɛ yeɔ buaa wɔ nɛ wa fĩɔ si. Yesu ya nɔ nɛ e suɔ e Tsɛ ɔ kɛ e tsui tsuo kɛ ya si e gbenɔ mi. E suɔ e huɛmɛ ɔmɛ hulɔ. (Yoh. 13:1; 15:13) Ke wa suɔ wa nyɛmimɛ ɔmɛ kaa bɔ nɛ wa suɔ Yehowa a, wɔ hu wa ma nyɛ maa ye ninyɛ nɔ kunimi. Ngɛ mɛni blɔ nɔ? Bɔfo Paulo nɔ hyɛmi nɔ́ ɔ maa ye bua wɔ konɛ waa na heto ɔ.

14. Mɛni ye bua Paulo nɛ e nyɛ nɛ e fĩ si kɛ ya si gbenɔ mi?

¹⁴ Benɛ e piɛ bɔɔ nɛ a maa gbe Paulo ɔ, e ngma ya ha e huɛ Timoteo nɛ e suɔ e sane ɔ ke: “Mawu ha we wɔ gbeye yemi mumi, se mohu he wami mumi, kɛ suɔmi mumi.” (2 Tim. 1:7) Mɛni lɛ Paulo ngɛ tsɔɔe? Paulo ngɛ tsɔɔe kaa ke suɔmi nɛ Kristofono ko ngɛ kɛ ha Yehowa a mi wa a, e ma nyɛ maa da kahi nɛ a mi wa wawɛɛ ɔ nya. (2 Tim. 1:8) Atsinyɛ jemi ko be he kaa suɔmi nɛ Paulo ngɛ kɛ ha Yehowa a ye bua lɛ nɛ e kua we anɔkuale jami, mohu ɔ, e kɛ kã da kahi nɛ e kɛ kpe ɔ nya kɛ ya si gbenɔ mi.—Níts. 20:​22-24.

15. Mɛni blɔ nɔ nɛ wa nyɛmimɛ ɔmɛ jeɔ suɔmi nitsɛnitsɛ kpo ngɛ wa be nɛ ɔ mi? (Hyɛ foni ɔ hulɔ.)

¹⁵ Wa suɔ wa nyɛmimɛ Kristofohi nɛ a yaa nɔ nɛ daa yi mi wami nɛ a kɛ kpeɔ ɔ nya a wawɛɛ. Mwɔnɛ ɔ, ni komɛ kɛ a wami woɔ oslaa mi kɛ haa a nyɛmimɛ Kristofohi kaa bɔ nɛ Akuila kɛ Priskila kɛ a wami wo oslaa mi ngɛ Paulo he je ɔ. (Rom. 16:​3, 4) Kaa nɔ hyɛmi nɔ́ ɔ, ngɛ Russia a, nihi fuu yaa kojomi he ɔ nɛ a ya woɔ a nyɛmimɛ Kristofo ɔmɛ nɛ a nuu mɛ ɔ he wami. Benɛ nyɛmiyo ko nɛ a nu lɛ ɔ na nyɛmimɛ babauu nɛ a ba kojomi he ɔ, lɔ ɔ ha nɛ e bua jɔ wawɛɛ, ejakaa e hyɛ we blɔ kulaa kaa e maa na mɛ. E na kaa nyɛmimɛ ɔmɛ fo we mɛ pɛ a nɔ́ mi, nɛ lɔ ɔ wo lɛ he wami ngɛ si fɔfɔɛ nɛ e kɛ kpe ɔ mi. Ke nihi nyɛ wɔ po ɔ, suɔmi nɛ ngɛ wa kpɛti ɔ ma nyɛ ma ha nɛ wa bua nɛ jɔ!

16. Mɛni he je nɛ bɔfo Petro de ke Mawu sɔmɔli nɛ a waa mɛ yi mi ɔ, ngɛ bua jɔmi ɔ? (1 Petro 4:14)

¹⁶ Wa le kaa ke a ngɛ wɔ nyɛe nɛ wa fĩ si ɔ, Mawu bua jɔɔ. (Kane 1 Petro 4:14.) Bɔfo Petro de ke, Mawu sɔmɔli nɛ a waa mɛ yi mi nɛ a fĩɔ si ɔ ngɛ bua jɔmi. Ngɛ mɛni blɔ nɔ? Yi mi wami nɛ waa kɛ kpeɔ ɔ ji odase nɛ tsɔɔ kaa Mawu mumi ɔ ‘ngɛ wa nɔ.’ Ke a ngɛ nɔ ko yi mi wae nɛ e fĩ si ɔ, Mawu kplɛɛɔ e nɔ. Petro ná enɛ ɔ mi níhi a si kpami. Ngɛ Pentekoste 33 M.B.K se pɛ ɔ, a tsɔ sɔlemi we ɔ tsɔli ɔmɛ kaa a ya nu Petro kɛ bɔfo kpa amɛ nɛ a ngɛ fiɛɛe ɔ. Se Petro kɛ kã fã e hemi kɛ yemi ɔ he. (Níts. 5:​24-29) Benɛ a fiaa mɛ kpa se po ɔ, e kɛ bɔfo kpa amɛ kpa we fiɛɛmi. Mohu ɔ, a bua jɔ ejakaa “ngɛ [Yesu] biɛ ɔ he je ɔ, a bu mɛ kaa a ji nihi nɛ a sa hɛ mi si puemi.” Wɔ hu ke waa kɛ kahi ngɛ kpee nɛ wa fĩ si ɔ, wa bua maa jɔ.—Níts. 5:​40-42.

17. Gbɔkuɛ nɛ e nɔ jena Yesu ma gbo ɔ, mɛni e de e kaseli ɔmɛ?

¹⁷ Gbɔkuɛ nɛ e nɔ jena Yesu ma gbo ɔ, e de e kaseli ɔmɛ ke: “Nɔ fɛɛ nɔ nɛ e suɔ mi ɔ, ye Tsɛ ɔ maa suɔ lɛ, nɛ imi hu ma suɔ lɛ.” (Yoh. 14:21) Wa ngɛ be nɛ ke wa ngɛ Yehowa sɔmɔe, nɛ nihi be wɔ nyɛe, mohu ɔ, a maa suɔ wɔ ɔ blɔ hyɛe wawɛɛ! (2 Tes. 1:​6-8) Loko jamɛ a be ɔ maa su ɔ, wa ngɛ yi mi tomihi fuu a he je nɛ e sa kaa wa bua nɛ jɔ ke a ngɛ wɔ yi mi wae.