Moo Pee Kã Nɛ O Ye Anɔkuale Kaa Benaya

Benaya ji ta bulɔ nɛ e ngɛ kã. E hwu ta kɛ ha Matsɛ David kɛ Matsɛ Salomo. E ngɛ mi kaa osɔfo bi ji Benaya nɛ e kɛ ta hwumi níhi tsu we ní mohu lɛɛ, se e hwu ta kɛ ha Yehowa. E ngɛ kã wawɛɛ nitsɛ. Kaa nɔ hyɛmi nɔ́ ɔ, e gbe jata ko ngɛ nyu muɔ ko mi, nɛ e gbe ta bulɔ oblai kpanaa ko hulɔ. David he Benaya ye wawɛɛ nɛ e ngɔ lɛ kɛ da e he buli ɔmɛ a nya.—2 Sam. 23:​20-23.

Benɛ Absalom kɛ Adoniya te si kɛ wo David ɔ, Benaya lɛɛ e ya nɔ nɛ e ye David anɔkuale. (2 Sam. 8:18; 15:18; 1 Ma. 1:8) Benɛ David bwɔ ɔ, Benaya piɛɛ David he kɛ wo Salomo matsɛ. (1 Ma. 1:​32-40) Benaya ye Yehowa anɔkuale nɛ e fĩ matsɛmɛ nɛ Yehowa hla a se, be mi nɛ ni kpahi pee we jã po.

Wɔ hu wa hia kã konɛ wa nyɛ nɛ waa hwu kɛ si Satan, nɛ ji wa he nyɛlɔ kpanaku nɛ e he wa a, kɛ nihi nɛ a fĩ e se ɔ. E sa nɛ waa fia wa pɛɛ si kaa wa maa ya nɔ maa ba wa je mi ngɛ Yehowa mlaa amɛ a nya. (Efe. 6:11; 1 Pet. 5:​8, 9) Ke ni komɛ hla kaa a maa je Yehowa se po ɔ, wɔ ɔ lɛɛ wa maa ya nɔ maa ye lɛ anɔkuale, nɛ wa ngɛ nɔ mi mami kaa e maa jɔɔ wɔ.—2 Sam. 22:26.