Kɛ Ya Ha Filipibi Ɔmɛ
2 Lɔ ɔ he ɔ, ke nyɛ ngɛ he wami womi munyu ko ngɛ Kristo mi ɔ, ke nyɛ ma nyɛ maa wo ni kpahi a bua ngɛ suɔmi mi ɔ, ke mumi mi huɛ bɔmi ko ngɛ ɔ, ke mi mi sami kɛ mɔbɔ nami ko ngɛ ɔ, 2 lɛɛ nyɛ ha nɛ ye bua jɔmi ɔ nɛ hyi tɔ kɛ gu nyɛ juɛmi nɛ maa pee kake kɛ suɔmi kake nɛ nyɛ maa je kpo ɔ nɔ, kɛ jehanɛ se hu kɛ gu kake nɛ nyɛ maa pee kɛ pi si,* kɛ susumi kake nɛ nyɛ maa hɛɛ ɔ nɔ.+ 3 Nyɛ ko ngɔ pɛ+ aloo he nɔ womi+ kɛ pee nɔ́ ko nɔ́ ko, mohu ɔ, nyɛɛ je he si bami mi* nɛ nyɛɛ bu ni kpahi kaa a nɔ kuɔ pe nyɛ.+ 4 Nyɛ ko fo nyɛ pɛ nyɛ nɔ́ mi,+ se mohu nyɛ fo ni kpahi hu a nɔ́ mi.+
5 Nyɛ ha nɛ juɛmi nɛ Kristo Yesu hɛɛ ɔ eko nɛ e hi nyɛ hu nyɛ mi.+ 6 E ngɛ mi kaa e hɛɛ Mawu su+ mohu lɛɛ, se e susuu we he hyɛ po kaa e kɛ Mawu maa sɔ.+ 7 Dɛbi, mohu ɔ, e ngmɛɛ níhi tsuo a he nɛ e ba pee kaa nyɔguɛ.+ E ba pee adesa.*+ 8 Nɔ́ nɛ pã lɔ ɔ, benɛ e ba pee nɔmlɔ adesa a,* e ba e he si nɛ e bu tue hluu kɛ ya su gbenɔ mi,+ ee, e gbo ngɛ sɛumi tso* nɔ.+ 9 Enɛ ɔ he je ɔ, Mawu wo e nɔ nɛ e ha lɛ blɔ nya nɛ e nɔ kuɔ,+ nɛ e je e tsui mi faa nɛ e ha lɛ biɛ nɛ e nɔ kuɔ pe biɛ kpahi tsuo,+ 10 bɔ nɛ pee nɛ ngɛ Yesu biɛ ɔ mi ɔ, nakutsohi tsuo nɛ a kplã si, nihi nɛ a ngɛ hiɔwe kɛ nihi nɛ a ngɛ zugba a nɔ kɛ nihi nɛ a ngɛ zugba a sisi ɔ,+ 11 nɛ́ lilɛ fɛɛ lilɛ nɛ jaje heii kaa Yesu Kristo ji Nyɔmtsɛ+ kɛ wo Mawu nɛ ji Tsɛ ɔ hɛ mi nyami.
12 Enɛ ɔ he ɔ, nihi nɛ i suɔ, kaa bɔ nɛ nyɛ buɔ tue be fɛɛ be, nɛ́ pi be nɛ i ngɛ nyɛ ngɔ pɛ, se mohu titli ɔ, amlɔ nɛ ɔ nɛ i be nyɛ ngɔ nɛ ɔ hu ɔ, nyɛɛ kɛ gbeye yemi kɛ he domi blibliibli nɛ hi nyɛ nitsɛmɛ nyɛ yi wami hemi ɔ he ní tsue. 13 Ejakaa Mawu ji nɔ nɛ woɔ nyɛ he wami ngɛ lɛ nitsɛ e suɔmi nya, nɛ e haa nyɛ suɔmi ɔ kɛ he wami ɔ konɛ nyɛ kɛ pee e suɔmi nya ní. 14 Nɔ́ fɛɛ nɔ́ nɛ́ nyɛ maa pee ɔ, munyu nyanyaanya tumi+ kɛ atsinyɛ jemi nɛ ko hi mi,+ 15 bɔ nɛ pee nɛ nyɛ ba pee nihi nɛ piami ko kɛ sane ko be a he, Mawu bimɛ+ nɛ mu ko be a he ngɛ yi nɔ nɛ́ e kpɛ̃ nɛ e be e hanɔ,+ nɛ nyɛ ngɛ kpɛe ngɛ a kpɛti kaa la ngɛ je ɔ mi ɔ mi,+ 16 nɛ́ nyɛɛ ya nɔ nɛ nyɛɛ pɛtɛ wami munyu ɔ he wawɛɛ.+ Kɛkɛ ɔ, ma na nɔ́ ko nɛ ma da nɔ kɛ nya ngɛ Kristo ligbi ɔ mi, ejakaa i le kaa i tui fo ɔ yaka gu aloo i tsu we ní wawɛɛ yaka gu. 17 Se ke a ngɛ mi plɛe kaa dã afɔle+ kɛ ngɛ afɔle ɔ+ kɛ sɔmɔmi klɔuklɔu ɔ* nɛ́ nyɛɛ kɛ haa Mawu ngɛ nyɛ hemi kɛ yemi ɔ he je ɔ nɔ puee po ɔ, ye bua jɔ, nɛ i kɛ nyɛ tsuo ngɛ nyae. 18 Jã kɛ̃ lɛ e sa kaa nyɛ hu nyɛ bua nɛ jɔ konɛ nyɛɛ kɛ mi nɛ nya.
19 Jehanɛ ɔ, i ngɛ hɛ kɛ nɔ fɔmi ngɛ Nyɔmtsɛ Yesu mi kaa e be kɛe nɛ ma tsɔ Timoteo nyɛ ngɔ,+ bɔ nɛ pee nɛ ke i nu nyɛ he ɔ, ma ná he wami womi. 20 Ejakaa i be nɔ kpa ko hu nɛ e ngɛ kaa lɛ, nɔ ko nɛ e maa je e tsui mi kɛ susu nyɛ hiami níhi a he. 21 Ejakaa ni kpa amɛ tsuo ngɛ mɛ nitsɛmɛ a nɔ́ mi foe, se pi Yesu Kristo nɔ́ mi. 22 Se nyɛ le bɔ nɛ e bɔ e he mɔde ha. E piɛɛ ye he kɛ sɔmɔ kaa bi+ kɛ e tsɛ konɛ sane kpakpa a nɛ e gbɛ kɛ fĩa. 23 Enɛ ɔ he ɔ, lɛ ji nɔ nɛ i to kaa ke i na bɔ nɛ níhi maa ya nɔ ha mi pɛ ɔ, ma tsɔ lɛ. 24 Niinɛ, i ngɛ hɛ kɛ nɔ fɔmi ngɛ Nyɔmtsɛ ɔ mi kaa imi nitsɛ hu e be kɛe nɛ ma ba.+
25 Se amlɔ nɛ ɔ lɛɛ, i susu kaa e he hia nɛ ma tsɔ Epafrodito kɛ ba nyɛ ngɔ, e ji ye nyɛminyumu, nɔ nɛ i kɛ lɛ tsuɔ ní, ye nyɛmi tabulɔ, kɛ nyɛ tsɔlɔ kɛ sɔmɔlɔ nɛ e tsuɔ ye hiami níhi a he ní,+ 26 ejakaa e hɛ ngɛ jae ngɛ nyɛ tsuo nyɛ he, nɛ e hao akɛnɛ nyɛ nu kaa e ba be he wami ɔ he je. 27 Niinɛ, e nu hiɔ nɛ e piɛ nguɛ nya nɛ e gbo; se Mawu na lɛ mɔbɔ, ngɛ anɔkuale mi ɔ, pi lɛ pɛ, se imi hulɔ, konɛ ma ko ye aywilɛho ngɔ to aywilɛho nɔ. 28 Enɛ ɔ he ɔ, i ngɛ lɛ tsɔe oya nɔuu, bɔ nɛ pee nɛ ke nyɛ na lɛ ɔ, nyɛ nya ekohu, kɛkɛ ɔ, imi hu i be haoe tsɔ. 29 Nyɛɛ kɛ bua jɔmi tsuo nɛ he lɛ atuu kaa bɔ nɛ nyɛ peeɔ ngɛ Nyɔmtsɛ ɔ mi ɔ, nɛ nyɛɛ ya nɔ nɛ nyɛɛ bu nyumuhi kaa jã a saminya,+ 30 ejakaa e piɛ nguɛ nya nɛ e gbo ngɛ Kristo ní tsumi ɔ* he je. E ngɔ e wami* kɛ wo oslaa mi konɛ e ba sɔmɔ mi ngɛ nyɛ nane mi akɛnɛ nyɛ be hiɛ ɔ he je.+