Kɛ Ya Ha Filipibi Ɔmɛ
1 Imi Paulo kɛ Timoteo, nɛ wa ji Kristo Yesu nyɔguɛhi ɔ, ngma womi nɛ ɔ kɛ ya ha ni klɔuklɔu ɔmɛ tsuo nɛ a kɛ Kristo Yesu pee kake ɔ, kɛ nɔ hyɛli kɛ sɔmɔli+ nɛ a ngɛ Filipi ɔ:+
2 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ, kɛ Nyɔmtsɛ Yesu Kristo ngɔ ɔ nɔ.
3 Be fɛɛ be nɛ ma kai nyɛ ɔ, i naa ye Mawu ɔ si 4 ngɛ pɛɛ kpamihi nɛ a mi wa tsuo nɛ i kpaa kɛ haa nyɛ ti nɔ fɛɛ nɔ ɔ mi. I kɛ bua jɔmi lɛ kpaa pɛɛ nɛ mi wa nɛ ɔ eko fɛɛ eko.+ 5 I peeɔ jã ngɛ nɔ́ nɛ nyɛ pee ngɛ sane kpakpa a he* kɛ je kekleekle ligbi ɔ nɔ kɛ ba si amlɔ nɛ ɔ he je. 6 Ejakaa i ngɛ nɔ mi mami kaa Mawu maa ye bua nyɛ kɛ gbe ní tsumi nɛ e je sisi ngɛ nyɛ kpɛti ɔ nya+ loko Kristo Yesu ligbi ɔ maa ba.+ 7 Akɛnɛ nyɛ ngɛ ye tsui nɔ he je ɔ, e da blɔ kɛ ha mi kaa ma ná susumi nɛ ɔ ngɛ nyɛ tsuo nyɛ he, nyɛ nihi nɛ i kɛ nyɛ ná blɔ fa mi nɔ́ ngɛ dloomi ɔ mi ngɛ kɔsɔkɔsɔhi nɛ a wo mi,+ kɛ sane kpakpa a he fami kɛ e ngɔmi kɛ si mami ngɛ mlaa nya a tsuo mi ɔ.+
8 Ejakaa Mawu ji ye we odase kaa ye hɛ ngɛ jae ngɛ nyɛ tsuo nyɛ he, ejakaa i suɔ nyɛ sane kaa bɔ nɛ Kristo Yesu hu suɔ nyɛ sane ɔ. 9 Nɛ i yaa nɔ nɛ i sɔleɔ kaa nyɛ suɔmi ɔ nɛ e ya nɔ nɛ e hiɛ kɛ be nɔ babauu nitsɛ pe kekle ɔ+ ngɛ nile nitsɛnitsɛ+ kɛ nɔ́ se kɔmi nɛ pi si ɔ mi;+ 10 konɛ nyɛɛ le níhi nɛ a he hia wawɛɛ ɔ,+ bɔ nɛ pee nɛ sé ko nɛ ko hi nyɛ he nɛ nyɛ ko hi ni kpahi a nane tɔ̃tɔ̃e+ kɛ yaa si Kristo ligbi ɔ; 11 konɛ dami yiblii nɛ e guɔ Yesu Kristo nɔ ɔ nɛ e hyi nyɛ tɔ+ kɛ ha Mawu hɛ mi nyami womi kɛ e yi jemi.
12 Jehanɛ ɔ, nyɛmimɛ, i suɔ nɛ nyɛɛ le ngɛ anɔkuale mi kaa, ye si fɔfɔɛ ɔ ha nɛ sane kpakpa a ya nɔ mohu, 13 nɛ lɔ ɔ ha nɛ Matsɛ Ngua a He Buli* ɔmɛ kɛ ni kpahi tsuo ba le+ kɔsɔkɔsɔhi nɛ a wo mi+ ngɛ Kristo he ɔ he sane. 14 Jehanɛ ɔ, nyɛmimɛ ɔmɛ ngɛ Nyɔmtsɛ ɔ mi ɔ, a ti nihi babauu ba ná kã ngɛ kɔsɔkɔsɔhi nɛ a wo mi ɔ he je, nɛ a kɛ kã babauu ngɛ Mawu munyu ɔ fiɛɛe pe kekle ɔ nɛ́ a yi gbeye.
15 Niinɛ, ni komɛ kɛ hɛkɔ kɛ pɛ lɛ ngɛ Kristo ɔ fiɛɛe, se ni kpahi lɛɛ a kɛ juɛmi kpakpa lɛ ngɛ jã pee. 16 Ni nɛmɛ nɛ a kɛ juɛmi kpakpa lɛ ngɛ jã pee ɔ je suɔmi mi nɛ a ngɛ Kristo ɔ jajee, ejakaa a le kaa a hla mi konɛ ma fã sane kpakpa a he;+ 17 se ni kpa amɛ lɛɛ a kɛ pɛ lɛ ngɛ jã pee, se pi juɛmi kpakpa, ejakaa a ngɛ a yi mi toe kaa a ma gba ye nya kɛ piɛɛ kɔsɔkɔsɔhi nɛ a wo mi ɔ he. 18 Mɛni je mi kɛ ba? Lɔ ɔ pɛ ji kaa ngɛ blɔ fɛɛ blɔ nɔ ɔ, osato peemi mi jio, anɔkuale yemi mi jio, a ngɛ Kristo ɔ jajee, nɛ i nyaa ngɛ enɛ ɔ he. Ngɛ anɔkuale mi ɔ, imi hu ma ya nɔ nɛ ma hi nyae, 19 ejakaa i le kaa enɛ ɔ ma ha nɛ a ma he ye yi wami kɛ gu nyɛ pɛɛ kpami nɛ mi wa a+ kɛ Yesu Kristo mumi ɔ yemi kɛ buami ɔ nɔ.+ 20 Enɛ ɔ kɛ nɔ́ nɛ i ngɛ blɔ hyɛe wawɛɛ ɔ kɛ ye hɛ kɛ nɔ fɔmi kaa zo be mi gbee ngɛ blɔ ko blɔ ko nɔ ɔ kɔ, se mohu ma tu munyu faa, konɛ ngɛ wami mi jio, gbenɔ mi jio, a gu ye nɔmlɔ tso ɔ nɔ kɛ wo Kristo nɔ gojoo amlɔ nɛ ɔ kaa bɔ nɛ a peeɔ daa a.+
21 Ejakaa ngɛ ye blɔ fa mi ɔ, ke i ngɛ wami ɔ, i ngɛ wami mi kɛ ha Kristo,+ nɛ ke i gbo ɔ, e ji se nami kɛ ha mi.+ 22 Amlɔ nɛ ɔ, ke ma hi wami mi ngɛ he lo mi ɔ, lɔ ɔ ji yiblii nɛ ye ní tsumi ɔ wo; se kɛ̃ ɔ, nɔ́ nɛ ma hla a lɛɛ, i be hae nɛ nɔ ko nɛ e le. 23 I li ní enyɔ nɛ ɔmɛ a kpɛti nɔ́ nɛ ma hla, ejakaa i ná nɛ a ngmɛɛ ye he nɛ i ya piɛɛ Kristo he,+ nɛ ngɛ anɔkuale mi ɔ, lɔ ɔ hi wawɛɛ.+ 24 Se e he hia wawɛɛ kaa ma ya nɔ nɛ ma hi he lo ɔ mi ngɛ nyɛ he je. 25 Enɛ ɔ he ɔ, akɛnɛ i ngɛ nɔ mi mami ngɛ enɛ ɔ mi he je ɔ, i le kaa ma hi si, nɛ i kɛ nyɛ tsuo maa ya nɔ maa hi si kɛ ha nyɛ nɔ yami kɛ nyɛ bua jɔmi nami ngɛ hemi kɛ yemi ɔ mi, 26 konɛ ke i ba nyɛ ngɔ ekohu ɔ, nyɛ nyami ɔ nɛ be nɔ ejakaa Kristo Yesu se nyɛɛli ji nyɛ.
27 Nɔ́ kɛkɛ nɛ nyɛɛ pee ji kaa nyɛɛ ba nyɛ je mi* kaa bɔ nɛ Kristo he sane kpakpa a tsɔɔ kaa nyɛɛ ba nyɛ je mi ɔ,+ konɛ ke i ba nɛ i ba na nyɛ jio, i bɛ jio, ma nu nyɛ he nɛ ma le kaa nyɛ daa si kpɛii ngɛ mumi kake mi, kɛ yi mi tomi* kake,+ nɛ nyɛ pee kake kɛ ngɛ mɔde bɔe kɛ ha sane kpakpa a he hemi kɛ yemi ɔ, 28 nɛ nyɛ ko ha nɛ nihi nɛ a teɔ si kɛ woɔ nyɛ ɔ nɛ a wo nyɛ he gbeye ngɛ blɔ ko blɔ ko nɔ. Nɔ́ nɛ ɔ nɔuu ji odase nɛ tsɔɔ kaa a ma kpata a hɛ mi,+ se lɔ ɔ ji yi wami hemi kɛ ha nyɛ;+ nɛ nɔ́ nɛ ɔ je Mawu ngɔ. 29 Ejakaa a ha nyɛ he blɔ ɔ ngɛ Kristo he je, pi hemi kɛ yemi nɛ nyɛ ma ná ngɛ e mi ɔ kɛkɛ, se mohu konɛ nyɛɛ na amanehlu ngɛ e he hulɔ.+ 30 Ejakaa amanehlu nɛ nyɛ na kaa i ngɛ mi gblee, nɛ amlɔ nɛ ɔ nyɛ ngɛ nue kaa loloolo ɔ, i ngɛ mi gblee ɔ,+ lɔ ɔ nɔuu lɛ nyɛ hu nyɛ ngɛ mi gblee ɔ nɛ.