BUTE ME 8

Kwer Dini Goba; Lub Dini me Ada

1. Kit gin ango ma dano omyero guyer i kare-ni i lok ma mako woro?

YECU owaco ni: “Ngat ma pe tung bota, meno nongo en lakworra.” (Matayo 12:30) Wan watwero bedo tung bot Jehovah nyo tung bot Catan. Pol dano gitamo ni gin gitye ka tic pi Lubanga i yo ma en cwako, ento Baibul tito ni Catan obedo “labwol dano ma i wi lobo ducu.” (Niyabo 12:9) Milion pa dano tamo ni gitye ka woro Lubanga ento kun nongo giworo Catan Larac aye! Dano omyero guyer gin me atima i kare-ni. Gin omyero guti pi Jehovah, “Lubanga me ada” nyo guti pi Catan, “won goba.”—Jabuli 31:5; Jon 8:44.

A Woko ki i Dini me Goba

2. Yo acel mene ma Catan temo kwede me gengo dano ki i woro Jehovah?

² Moko tammi me tic pi Jehovah obedo yer me ryeko, yer ma kelo cwak pa Lubanga. Catan cwinye pe yom i kom ngat mo keken ma tiyo pi Lubanga. En kelo peko bot jo ma tiyo pi Lubanga. Yo acel ma en timo kwede man aye me tic ki anywar nyo jemo ma a ki bot jo mukene, kadi wa ki bot luremi nyo ki bot jo me paconi. Yecu ociko ni: “Lukwor pa dano bibedo jo ma i pacone.”—Matayo 10:36.

3. Ka dano me paconi nyo luremi tye ka gengi me woro Lubanga ci itimo ngo?

³ Man ka otimme boti ci itimo ningo? Dano mapol gingeyo ni yo me worogi pe tye atir, ento pud gigalle me a woko ki iye. Gin gitamo ni ka gia, nongo pe ginyuto gen i kom jo me pacogi. Meno obedo tam ma tye atir? Ka ingeyo ni jo me paconi ma imarre kwedgi adada gitye ka tic ki yat marac ma wano dano, in pe ibitemo cikogi ni yat ma kit meno romo wanogi? In pe inywako i tic ki yat meno, pe kumeno?

4. Yocwa owaco bot jo Icrael ningo i kom woro i karene?

⁴ Yocwa ocuko cwiny jo Icrael me weko tic me dini goba kacel ki lok me tekwaro pa kwarogi. En owaco ni: “Pi meno dong wulwor Rwot, wuti bote ki lengcwiny ki gen madwong. Wubol woko lwak lubanga ma yam kwarowu gubedo ka worogi i lobo ma loka kulu Euprate ki i lobo Ejipt wek dong wuwor Rwot.” (Yocwa 24:14) Yocwa onongo geno Lubanga, ci Jehovah ocwake. Ka wan wageno Jehovah, en bene cwakowa.—2 Camuel 22:26.

Pwony me Dini—me Ada ki me Goba

Triniti: Dini mapol pwonyo ni Lubanga obedo Triniti. Gin giwaco ni “Won en Lubanga, Wod [Yecu] en Lubanga, ki Cwiny Maleng en Lubanga, kun pe dok tye Lubanga adek ento Lubanga acel.”

Baibul pe waco kadi wa nyig lok “Triniti,” dok bene pe pwonyo ni Jehovah obedo Lubanga adek i ngat acel. Jehovah kene aye Lubanga. Jo Korint me acel 8:6 waco ni: “Ki tung botwa Lubanga tye acel, en Lubanga Won.” Jehovah aye Ngat Mamalo twal. Yecu pe Lubanga aye, ento obedo “Wod pa Lubanga.” (1 Jon 4:15) I kit yo acel-li, cwiny maleng pe obedo Lubanga. Cwiny maleng pe bene obedo ngat mo. Obedo teko pa Lubanga aye.—Tic pa Lukwena 1:8; Jo Epeco 5:18.
Gin Makwo: Dini mapol pwonyo ni tye gin mo makwo i dano ma pe twero to. Baibul pwonyo ni gin makwo aye dano en kikome, dok nen ka maleng ni, dano gire twero to.—Acakki 2:7; Ejekiel 18:4.
Mac me Kapiny: Dini me goba gipwonyo ni gin makwo ma pe to-ni ka obedo pa jo maraco kipwodo nakanaka i kapiny. Baibul waco ni jo muto “pe gingeyo gin mo.” (Latitlok 9:5) Baibul bene pwonyo ni “Lubanga aye mar.” (1 Jon 4:8) Lubanga Jehovah ma lamar-ri, pe twero pwodo dano kit meno i mac.

Bok: Baibul pwonyo ningo i kom Triniti, gin makwo, kacel ki mac me kapiny?

Wek Jami ma Kitiyo Kwedgi i Woro me Goba

Dako mo tye ka wango jamine me tim jok jok

5. Pingo myero wabal watyek woko jami me jokjok ducu?

⁵ Me a woko ki i dini goba bene mitte ni omyero wabal watyek woko kit gin tyet mo keken ma watye kwede calo, lagwok kom, gicing, gingut, ki gin mo keken me jokjok. Timo man pire tek pien nyuto ni waketo genwa i kom Jehovah.

6. Lukricitayo macon gutimo buk tyetgi nining?

⁶ Kong itam i kom gin ma Lukricitayo macon gutimo i kare ma gumoko tamgi me bedo i dini me ada. Baibul waco ni: “Jo ma yam lujogi gukelo buk tyetgi guguro kacel guwangogi woko i nyim lwak ducu.”—Tic pa Lukwena 19:19.

7. Gin ango ma waromo timone ka jogi yelowa?

⁷ Jo mukene ma gicako tic pi Jehovah ma kong nongo gubedo ka tyeto tyet, talo tal nyo kit tyet mo keken kare mukene jogi yelogi. Ka man timme boti ci lwong Jehovah ki dwan matek kun itiyo ki nyinge. En bikonyi.—Carolok 18:10; Yakobo 4:7.

8. Lukrictayo gineno woro jogi, cal apaya nyo cal ma giworo i dini nining?

⁸ Jo ma gimito tic pi Jehovah myero pe gugwok nyo guti ki kit jok mo, cal apaya nyo cal mo me woro me dini goba. Lukricitayo me ada “cung i kom niye, pe i neno piny ma waneno.” (2 Jo Korint 5:7) Gin giworo cik pa Lubanga makwero kit woro cal apaya mo keken.—Nia 20:4, 5.

Bed Kacel ki Jo pa Jehovah

Mego gin ki nyare gitye ka yubo cam me tedone

9. Kit tam ango ma Baibul miyo pi doko ngat ma ryek?

⁹ Baibul waco ni: “Ngat ma bedo kacel ki jo maryek pwonnye doko ryek bene.” (Carolok 13:20) Ka wamito bedo ryek ci omyero wawoti nyo wabed kacel ki Lucaden pa Jehovah. Gin aye jo ma gitye ka wot i yo ma tero dano i kwo.—Matayo 7:14.

10. Lucaden pa Jehovah giromo konyi nining me tic pi Lubanga?

¹⁰ Lucaden-ni giparo pi dano. Ticgi aye me konyo jo ma gitye ki cwiny ma atir me niang lok ada me Baibul ma tero dano i kwo ma pe tum. Gin giromo konyi kun gikwano Baibul kacel kwedi labongo cul mo. Gin bigamo pennyi ducu dok bene gibinyuti kit ma myero iti kwede ki ngec me Baibul i kwoni.—Jon 17:3.

11. Cokke pa Lukricitayo bikonyi nining?

¹¹ In ibingeyo lok mapol i kom yo pa Jehovah i cokkegi ma pol kare bedo i Kingdom Hall. Mitini me bedo i dini me ada bimede doko matek. In bene ibinongo pwonye i yo me konyo jo mukene me ngeyo lok ada me Baibul.—Jo Ibru 10:24, 25.

12. Lega romo konyi nining me tic pi Lubanga?

¹² Ma nongo itye ka medde ki ngeyo lok mapol i kom miti kacel ki yub pa Jehovah, niangi bidoko matut ki pwocci pi yone me mar bene bimedde. Mitini bene myero omedde pi timo gin maber ma yomo cwinye ki bene pi kwero gin ma cwero cwinye. Wii myero opo ni iromo penyo Jehovah i legani wek en okonyi me timo jami mabeco ki me kwero jami maraco.—1 Jo Korint 6:9, 10; Jo Pilipi 4:6.

Jo me ot gitye ka kwano Baibul kacel — In itwero tic ki woro ma atir nining?

13. In iromo yomo cwiny Jehovah nining?

¹³ Ka kare woto ki kato, kun nongo imedde ki dongo i yo me cwiny, ibineno labongo akalakala ni mitte me dyero kwoni ki me nongo batija macalo Lacaden pa Jehovah. Ka idonyo bot lwak pa Jehovah ci ibiweko cwiny Jehovah bedo yom. (Carolok 27:11) In ibibedo i kin jo ma cwinygi yom ma Lubanga waco pigi ni: “An abibedo i [kin-gi], ababibedo ka wot awota i kin-gi, abibedo Lubangagi, gin bene gibibedo jona.”—2 Jo Korint 6:16.

An Aa Woko ki Bot Jogi

I wor mo acel ma onongo abuto i wi kitanda wan ki cwara, awinyo dwan mo ka lwongo nyinga tyen adek. I ngeye aneno wi ot ka pokke, ci gin mo ma obedo calo odilo makwar, opoto i iya. Ngene gire ni, cwara gire onongo pe tye ka neno jami magi. Kadi bed kumeno, awinyo lyeto madit i koma ma ori pi lwak dwe mapol.

I nge dwe abicel, dwan-ni dok olwonga odoco. Cutcut, ot ducu onongo dong nen calo tye i dye pii matut. Twon nyalo madit okati ki i pii-ni obino odwalle i ngut cinga. Atemo yengone wek opot woko ento pe otwere. Twon lworo madit omaka. Lacen pii-ni kacel ki twol-li gutugi rwenyo woko, ki an bene kibola woko piny ligwek. Abedo ma pe angeyo koma pi cawa mapol. Dwan-ni owacca ni adok i ot me cango two ma tye i caro. I kare ma apenyo cwiny-nyi pi nyinge, en omiyo nying ma gonye ni “tye ki lonyo ento labongo latin.” En ocikke ni ebiweko adoko lalonyo pi teko me cango two.

Jo ma komgi lit gubino bota ki ka ma cok wa ki ka maboco bene. Ma nongo peya guo i oda, kong gin ginen woko i kiyona ma dok pat tutwal-li. Ka ngat mo acel oo, adongo dye cinga ki mege, ci kit twone nyo pekone kacel ki gicango twone tugi nyutte woko bota. En cwiny-nyi bene aye onongo wacca wel cente ma dano omyero gucul.

Cente kacel ki mot ocako core mapol pi teko me cango two-ni. Adoko “lalonyo,” ento bene aniang tyen lok me bedo “labongo latin.” Ka anywalo latin, latin ma onyu olubo ngeye-ni tugi to woko. Man onongo gin me cwer cwiny madit mada. I mwaka 12 ma atiyo bot cwiny-nyi, lutinona abicel guto woko.

Acako lega bot Lubanga pi kony. Alego matek. I nino mo acel Lucaden pa Jehovah gudwongo doggolana. Kadi bed pol kare onongo aryemogi woko, ento i nino meno aye winyogi. I nge nyamo lok ma otimme, aniang ni an kara atye ka tic pi jok! Atugi moko tama me weko tim jokjok woko.

I kare ma atito man bot jok-ki, en ocika matek pe me tic ki tam ma amoko-ni. Kadi bed kumeno, awaco ni: “Watwa wan kwedi dong otyeko tum woko.”

Awango jami ma atiyo kwede me tyet ducu. Akwano Baibul kacel ki Lucaden-ni nio ka adoko latic pa Jehovah, dok anongo batija i mwaka 1973. Man dong atye ki lutino abic ma komgi yot. Cwara bene dong odoko Lacaden ma kibatija woko.—Man aye kit ma Josephine Ikezu otito kwede.

Bok: Dako mo acel obwot nining ki bot jogi?