LAPENY PA LUKWAN BUKKEWA

Gicikke aryo mene ma lakwena Paulo onongo tye ka lok iye i Jo Galatia 4:24?

Lakwena Paulo oloko i kom wat ma onongo tye i kin Abraim gin ki Cara ki dong Agar. I nge meno, en owaco ni: “Man ma awaco-ni obedo carolok: Mon aryo magi nyuto gicikke aryo bene.” (Gal. 4:​22-24) I kare ma okato, onongo waniang ni gicikke aryo magi gin aye gicikke me Cik ki gicikke manyen. Ento i nge kwedo lok man matut, wanongo ni omyero walok niangowa woko. Nen calo Paulo onongo pe tye ka lok i kom gicikke manyen ento i kom gicikke bot Abraim. Kong wanenu tyen lok mogo ma omiyo wawaco kit meno.a

Paulo otito ni Agar, ma onongo obedo angeca-ni, cung pi Got Cinai. (Gal. 4:25) Man nyuto ni Agar cung pi gicikke me Cik ma Lubanga omoko ki rok me Icrael i te Got Cinai i mwaka 1513 K.M.P. (Nia 19:​5, 6) Lujudaya ducu onongo gitye ki roc, pi meno onongo pe gitwero lubo cik meno kore ki kore. Man onongo poyo wigi ni gitye opii pa bal. Gicikke me Cik onongo bene bikonyo rok me Icrael me niang i kom Meciya, pien en keken aye onongo bibedo ngat ma bilubo Cik meno labongo roc mo keken. I kare ma Meciya ojalo kwone ma pe ki roc-ci piwa, en oyabo yo me larowa ki i bal kacel ki to. (Gal. 3:​19, 24, 25) I kare ma Yecu otyeko cobo yub pa Lubanga, gicikke me Cik onongo dong pe mitte.—Rom. 10:4.

Paulo onyuto apokapoka ma tye i kin Agar ma obedo angeca ki dong Cara, ma en aye obedo ‘dako pa Abraim kikome-ni’ ma onywalo latin pi “cikke ma yam Lubanga ociko.” (Gal. 4:23) Cikke meno aye obedo gicikke bot Abraim. (Gal. 3:29; 4:​28, 30) I Acakki 22:​18, Jehovah owaco ki Abraim ni: “Rok ducu ma i lobo gibilimo gumgi ki i kom likwayi, pien ityeko woro doga.”

Gicikke meno ma Lubanga omoko ki Abraim omedo ngec mukene i kom lok ma Jehovah owaco i poto me Eden. (Acak. 3:15) Onyuto ni ‘lakwaro’ ma kitito pire-ni, bibedo lakwar Abraim. Paulo otito ni ‘lakwaro-ni’ mukwongo obedo Yecu Kricito. Ento jo ma gin ‘lwak pa Kricito,’ ma welgi tye 144,000 dok gibiloc kacel ki Yecu i polo, bene gitye ‘likwayo’ pa dako-ni. (Gal. 3:​16, 29; Yabo 14:​1-3) Jo ma gijolo Yecu dok gibedo luwiny bote, gibinongo mot mapol pi gicikke pa Lubanga bot Abraim.

Pingo Paulo otiyo ki “carolok” meno? En onyuto ni Lujudaya ma i karene gibimedde ki bedo opii calo Agar ka gumedde ki lubo Cik pa Moses. Ento, ka gujolo Yecu Kricito, ma en aye “lakwar” Abraim mukwongo, ci gibibedo agonya calo Cara. Onongo dong pe gibibedo i te opii me bal ki to. (Jon 8:​32-34) Ka pe guye jolo Yecu, ci nongo pe guniang tyen lok mumiyo Lubanga ominigi Cik, ma en aye onongo me terogi bot Kricito.

Pol pa Lukricitayo me Galatia ma Paulo ocoyo lok man botgi-ni, onongo pe gitye Lujudaya, dok pe gumedo ki bedo i te Cik. Lujudaya mogo ma i kacokke ma onongo pud gumoko liking ka lubo Cik pa Moses onongo gimito ni Lukricitayo ma pe gubedo Lujudaya bene gucak lubo Cik meno, ma onongo kwako lirre bene. Paulo otito ni tam ma kit man obedo gin me mingo adada. Onongo dong pe gitye ki tyen lok mo me medde ki bedo opii i te Cik pa Moses. Onongo dong gitye agonya pien guye Kricito.—Gal. 5:​1, 10-14.