Pingo Cik ma Igi Lac me Baibul Pigi Tek?

1-2. (a) Pingo kitwero lwongo Baibul ni buk macon? (b) Pingo tam ma Baibul miyo pud tiyo wa i kare-ni?

BAIBUL obedo buk ma kicoyo i kare macon adada. Bukke mukwongo me Baibul kicoyogi mwaki ma romo 3,500 angec dok buk me agikki me Baibul kicoyo cokcok mwaki 2,000 angec. Kadi bed kit meno, “Lok pa Lubanga” ma nonge iye pud tye makwo dok tiyo wa i kare-ni. (Ibru 4:12; 2 Tem. 3:​16, 17) Dano milion mapol i kare-ni gilubo tam ma tye i Baibul, dok meno konyogi me moko tam mabeco ki me bedo ki yomcwiny.

² Ento twerre nining ni tam ma nonge i buk ma orii adada-ni pud tiyo wa i kare-ni? Twerre pi tyen lok aryo. Mukwongo, lok ma i Baibul oa ki bot “Lubanga makwo,” ma obedo Lacwecwa dok ryek loyo ngat mo keken. (1 Tem. 4:10; Rom. 16:​26, 27) Me aryo, Baibul tye ki lok ada ma pe lokke ma oa ki bot Lubanga. Meno aye tyen lok mumiyo tam ma iye konyo dano i kare-ni kit ma okonyo kwede dano i kare macon me cobo pekkigi.

3. Lapeny mene ma wabigamogi i pwony man?

³ Pwony man bigamo lapeny magi: Cik ma igi lac me Baibul obedo gin ango? Pingo pigi tek wa i kare-ni? Watwero nongo cik ma igi lac nining ka watye ka kwano Baibul? Wabineno bene kit ma pwony pa Yecu konyowa kwede me niang cik ma igi lac maber.

CIK MA IGI LAC ME BAIBUL OBEDO GIN ANGO?

4. Cik ma igi lac me Baibul obedo gin ango?

⁴ Cik ma igi lac me Baibul obedo lok ada ma cik pa Lubanga jenge iye. I kare mogo, lok ada magi kicoyogi calo cik. (Mat. 22:37) Cik ma igi lac rwomgi lamal adada ka kiporogi ki cik. Cik mogo ma i Baibul kimiyogi pi kare moni nyo pi gin acel moni keken. Ento cik ma igi lac nyuto tam pa Jehovah kacel ki gin ma pire tek bote. Cik ma igi lac aye obedo tyen lok mumiyo kiketo cik. Cik acel acel ma Jehovah oketo tye ki tyen lok mo ma pire tek mumiyo kiketo. Ento tyen lok ma cik magi jenge iye pe lokke matwal. (Jab. 119:111) Cik twero lokke, ento cik ma igi lac pe lokke dok tiyo i kare ducu.—Ic. 40:8.

5. Mi labol ma nyuto apokapoka ma tye i kin cik ki cik ma iye lac. (Nen bene cal.)

⁵ Me konyowa me niang maber apokapoka ma tye i kin cik ki dong cik ma igi lac, tam kong i kom lapor man. Mego mo twero waco bot wode matidi ni, ‘Pe igud cigiri.’ Man obedo cik. Ento cik ma iye lac, nyo tyen lok ma oweko kimiyo cik meno aye ni: Pe igud gin mo keken malyet pien biwangi. Meno tye ada pi jami malyet ducu. Me labolle, pe omyero wagud pac, binika, cupuria nyo gin mo keken malyet i pacowa ma twero wangowa. Cik ma iye lac meno pe kwako jami ma i pacowa keken ento gin mo keken malyet i kabedo mo keken. Ngene kene ni, ka latin meno woto ki dongo, en bitic ki cigiri. Ento, pud bimitte ni en ogwokke wek pe owang. Dong cik twero lokke, ento tyen lok ma oweko minne omine cik meno pe lokke.

PINGO CIK MA IGI LAC ME BAIBUL PIGI TEK?

6. (a) Gin ango ma Jehovah ominiwa i Lokke? (b) Jehovah nyuto nining ni egenowa?

⁶ Pien Jehovah marowa adada, en miniwa cik wek wagwokke ki jami ma twero wanowa. (Yak. 2:11) Medo i kom meno, en konyowa me niang cik ma igi lac, nyo tyen lok ma oweko eketo cik magi. Jehovah pe ominiwa cik pi jami ducu ma timme i kwowa. Ento en ominiwa tira i Baibul ma twero konyowa me moko tam mabeco kadi bed cik mo pe ma loko atir atir i kom gin ma watye ka kato ki i iye-ni. Kit macalo Jehovah pe ominiwa cik i kom jami ducu, en nyuto ni egenowa. En oweko watye agonya me moko tam ma nyuto ni wamare dok wamito bedo luwiny bote.—Gal. 5:13.

7. Mi labol ma nyuto pingo cik ma igi lac me Baibul pigi tek? (Nen bene cal.)

⁷ Me niang kit ma cik ma igi lac me Baibul twero konyowa kwede, kong wanenu lapor man. Tam kong i kom lanyut mogo ma bedo i teng gudi madongo. Lanyut magi kitwero poko iye i gurup aryo mapatpat. Me acel, lanyut mogo nyuto cipid ma myero mutoka oring kwede i gudi meno nyo ka kwene ma myero deribwa ocung iye. Ka deribwa pe olubo cik ma tye i lanyut magi, ci en binongo pwod mo. Ento tye lanyut mukene ma ciko ladwo mutoka ni peko twero bedo tye, ento pwod mo pe iye. Me labolle, lanyut magi twero ciko deribwa ni i kabedo meno akciden maro timme iye nyo lee maro ngolo gudi. Gin ango ma ladwo mutoka ma tye ki ngec twero timone ka oneno lanyut ma kit man? En bitic ki wiye ci dwoyo mutokane ma gwokke kadi bed pwod mo pe. Medo i kom meno, ka kot tye ka cwer nyo lupwu oumo piny, ladwo mutoka myero odwo mutokane ki diro. I yo acel-lu, Lukricitayo gigwokke adada pe me timo gin mo keken ma Baibul waco atir atir ni rac. Ento bene gigwokke adada i tamgi wek pe gitim gin mo keken ma cwero cwiny Jehovah. Me moko tam mabeco, omyero waniang kit ma Jehovah tamo kwede.

8. Ka watye ka kwano Baibul, gin ango ma omyero wayeny dok meno bipwonyowa me timo gin ango? (Jo Roma 12:​1, 2)

⁸ Ento, tye adwogi mabeco mukene ma bino pi yenyo cik ma igi lac me Baibul ki dong lubone. Me labolle, pwonyowa me niang kit ma Jehovah tamo kwede. Ka watye ka kwano Baibul, wapwonnye me yenyo pwony ma watwero ketone i tic. Wapennye kekenwa pingo Jehovah oweko kicoyo lok magi i Baibul ki dong kit ma watwero keto gin ma wapwonyo-ni i tic. Ka watimo kit meno, ci wabilubo tam pa Jehovah. Man biweko waniang “gin ma Lubanga mito, gin maber, ma yomo cwinye, ma roc mo pe iye.”—Kwan Jo Roma 12:​1, 2.a

9. Adwogi maber mukene ango ma wanongo ka wakwo ma lubbe ki cik ma igi lac me Baibul? (Jo Ibru 5:​13, 14)

⁹ Kwo ma lubbe ki cik ma igi lac me Baibul konyowa me doko Lukricitayo muteggi. Ka wakwo ma lubbe ki cik ma igi lac me Baibul, wat i kinwa ki Jehovah jing doko matek. (Kwan Jo Ibru 5:​13, 14.) Lunyodo pol kare gimiyo ki lutinogi matino cik mapol me aluba wek gunge gin me atima ki kit me gwokke ki i awano. Lutino pol kare gilubo cik magi mere pien ni gilworo nongo pwod ki bot lunyodogi. Jehovah pe terowa calo lutino matino, ento macalo jo muteggi. En geno ni wabimoko tam ma lubbe ki mitine, dok ka watimo meno, wayomo cwinye adada.—Jab. 147:11; Car. 23:​15, 26; 27:11.

WATWERO NONGO CIK MA IGI LAC ME BAIBUL NINING?

10. Watwero nongo cik ma igi lac me Baibul nining?

¹⁰ Ka watye ka kwano Baibul, wanongo cik ma igi lac ma twero konyowa me niang kit ma Jehovah winyo kwede i kom jami mogo. Watwero bene nongo cik ma igi lac ka wayenyo tyen lok mumiyo Jehovah oketo cik moni. Ka wamedde ki niang tyen lok magi maber, ci man bikonyowa me niang kit pa Jehovah maber. Ka watye ka kwano Baibul, pire tek adada me lega bot Jehovah wek okonywa me niang kit ma en tamo kwede. Dok omyero wapwonnye me lwodo gin ma wakwano. (Car. 2:​10-12) Watwero pennye kekenwa ki lapeny calo: ‘Pingo Lubanga omiyo cik man? Ka Jehovah oketo cik ma nyuto ni en dag tim man, kadi bed pe aturo cik meno, ento en biwinyo nining ka atimo gin macal ki meno? Pwony ango ma anongo ki i wang ginacoya man, dok atwero ketone i tic i kwona me nino ducu nining?’ Ka waniang tyen lok mumiyo Jehovah oketo cik moni ki dong pwony ma wanongo ki i jami mutimme i Baibul, ci wabimoko tam mabeco ma yomo cwiny Jehovah.

11. I Pwonye me Wi Got, Yecu okonyowa nining me niang kit me nongo cik ma igi lac me Baibul? (Nen bene cal.)

¹¹ I Pwonye me Wi Got, Yecu onyutiwa kit ma watwero nongo kwede cik ma igi lac me Baibul. Kong dong wanenu labol adek. Pi labol acel acel, Yecu okwongo ki lok i kom cik. I nge meno, en otito cik ma iye lac nyo tyen lok mumiyo kiketo cik meno. Ka watamo matut i kom pwony ma Yecu omiyo-ni, ci wabiniang kit ma pwony magi bikonyowa kwede me moko tam me ryeko i kwowa i kare-ni.

12. Cik ma iye lac ango ma tye i nge cik ma kicoyo i Matayo 5:​21, 22? (Nen bene cal.)

¹² Kwan Matayo 5:​21, 22. “Pe ineki.” Cik ma iye lac ango ma tye i nge cik meno? Jehovah pe mito ni wadag jo mukene. En pe mito ni watim, walok, nyo watam gin marac i kom jo mukene. Yecu onyuto ni kadi bed ngat moni pe oneko dano, en nongo pud oturo cik ma iye lac meno dok bicwero cwiny Jehovah matek ka omedde ki mako akemo i cwinye i kom ngat mo nyo loko lok marac i kome. Pingo? Pien tam kacel ki tim ma kit meno aye ma miyo ngat moni neko nek.—1 Jon 3:15.

13. Watwero keto cik ma iye lac ma nonge i Matayo 5:​21, 22 i tic i kwowa me nino ducu nining? (Nen bene cal.)

¹³ Watwero keto cik ma iye lac ma nonge i Matayo 5:​21, 22 i tic i kare-ni nining? Myero wagwokke ki mako akemo i kom ngat mo, kadi bed en oterowa marac. (Levi. 19:18; Yubu 36:13) Pingo? Pien meno twero tugo cwiny marac, ci weko wawaco nyo watimo gin mo ma nyuto adegadega. (Car. 10:12) Me labolle, ka wamako akemo i kom ngat moni, watwero loko lok maraco i kome bot jo mukene. Watwero bene waco lok goba i kome. Ci man twero miyo jo mukene gicako kwere nyo tere marac. (Car. 20:19; 25:23) I kare ma Yecu omiyo pwony man i kom adegadega, jami calo Intanet, cim cing ki kompiuta onongo pud pe. Ento tira pa Yecu pwonyowa ni pe omyero wati ki cimwa nyo kompiutawa me nyayo lok maraco i kom jo mukene. Kit macalo pe watye ki miti me neko dano, pe bene watye ki miti me waco nyo coyo gin mo keken ma miyo jo mukene rwenyo woro i kom ngat moni.

14. Cik ma iye lac ango ma tye i nge cik ma kicoyo i Matayo 5:​27, 28? (Nen bene cal.)

¹⁴ Kwan Matayo 5:​27, 28. “Pe itim abor.” Cik ma iye lac ango ma tye i nge cik meno? Jehovah pe dag tim tarwang keken ento kadi wa tam macilo ma twero terowa i tim meno. Yecu otito ni ka laco munyomme bedo ka neno dako mukene (mapat ki dakone) ki miti me bedo kwede, nongo dong otyeko timo bal woko. Dong mitte ni ngat moni ojuk tam nyo miti macilo ma obino i wiye oyotoyot. Twero mitte ni en otute matek me timo man. (Mat. 5:​29, 30) Lukricitayo ma wigi nono bene myero gulub cik ma iye lac man.

15. Watwero keto cik ma iye lac ma nonge i Matayo 5:​27, 28 i tic i kwowa me nino ducu nining? (Nen bene cal.)

¹⁵ Watwero keto cik ma iye lac ma nonge i Matayo 5:​27, 28 i tic i kare-ni nining? Omyero wagwokke ki tamo tam macilo. (2 Cam. 11:​2-4; Yubu 31:​1-3) Dok omyero wagwokke ki neno cal mo keken macilo. Pe omyero wageng ngewa ki tam ni neno cal macilo pe rac teke pe watimo jami macilo ma wanenogi-ni. Dok pe watye calo dano ma i lobo-ni ma gitamo ni neno cal macilo mogo obedo mere galowang ma pe twero kelo adwogi marac i kwowa. I kare pa Yecu, jami calo tet pa Muno, filim nyo cal onongo pe tye. Kadi bed kit meno, Yecu ominiwa cik ma iye lac ma konyowa me niang kit ma Jehovah winyo kwede i kom cal kacel ki vidio ma tugo miti me buto. Man konyowa me niang ni Jehovah dag jami calo cwalo cal, vidio nyo mecej ma tugo miti me buto i cim nyo tuko tuko me vidio ma kubbe ki tim me buto kun kitiyo ki Intanet. Lubo cik ma iye lac man twero bene konyo ngat munyomme me bedo lagen bot luotte. (Mal. 2:15) Konyo bene Lukricitayo ducu—kadi gunyomme nyo wigi nono—me gwokke ki gin mo keken ma twero weko gidonyo i tim tarwang.—Car. 5:​3-14.

16. Cik ma iye lac ango ma tye i nge cik ma kicoyo i Matayo 5:​43, 44? (Nen bene cal.)

¹⁶ Kwan Matayo 5:​43, 44. “Mar lawoti.” Cik ma iye lac ango ma tye i nge cik meno? Jehovah mito ni wamar dano ducu. Ki cwercwiny, Lujudaya ma i kare pa Yecu onongo gitamo ni cik man nyuto ni omyero gimar Lujudaya luwotgi keken, kun gikwero lumonegi. Ento Yecu onongo ngeyo ni meno aye pe tyen lok mumiyo Jehovah oketo cik man. En onongo ngeyo ni Wonne me polo mito ni wamar dano ducu labongo paro rokgi, kala del komgi nyo tekwarogi.—Mat. 5:​45-48.

17. Adwogi maber ango ma wanongo ka waketo cik ma iye lac ma nonge i Matayo 5:​43, 44 i tic i kwowa me nino ducu? (Nen bene cal.)

¹⁷ Watwero keto cik ma iye lac ma nonge i Matayo 5:​43, 44 i tic i kare-ni nining? Wamaro dano ducu, pi meno pe wacwako dok pe wadonyo i lweny mo keken ma tye ka timme i wi lobo-ni. (Ic. 2:4; Mika 4:3) Wanyuto bene kica bot jo ma gia ki i lobe, tekwaro nyo dini mukene. (Tic 10:​34, 35) Dok watimo kica bot jo ma guterowa marac nyo gutero ngat mo ma wamaro marac.—Mat. 18:​21, 22; Mar. 11:25; Luka 17:​3, 4.

MOK TAMMI ME KWO MA LUBBE KI CIK MA IGI LAC ME BAIBUL

18. (a) Gin ango ma omyero wamok tamwa me timone? (b) Ngo ma wabinyamo i pwony ma lubo man?

¹⁸ Watye ki pwoc madit adada ni Jehovah pe miniwa cik mapol me aluba! En mito ni wati ki cik ma igi lac me Baibul me konyowa me moko tam me ryeko. (1 Kor. 14:20) Pi meno, ka watye ka moko tam, pire tek ni ‘watem niang gin ma Jehovah mito.’ (Ep. 5:17) Wamito ni wamok tam mabeco pien wamaro Jehovah dok wamito yomo cwinye, ento pe ni pien walworo ni Jehovah bipwodowa. Tye bene gin mukene ma bikonyowa me moko tam me ryeko ma yomo cwiny Jehovah. Man aye obedo cwiny ma ngoliwa kop. Dok man aye gin ma wabinyamo i pwony ma lubo man.