Ti ki Cik ma Igi Lac me Baibul me Pwonyo Cwiny ma Ngoli Kop

1-2. (a) Mic ango ma Jehovah omiyo ki Adam ki Kawa? (b) Onongo myero gunyut pwocgi pi mic meno nining?

LEE gikwo ma lubbe ki kit me kwo ma dong tye i remogi. Tet pa muno bene tiyo ma lubbe ki purogram me kompiuta ma ngat mo oketo i igi. Ento dano dok gipat. Kicweyowa ki mic mo mapat adada, mic ma pire tek bot wan Lukricitayo me ada. Meno mic me bedo agonya me moko tam piwa kenwa. Baibul tittiwa ni kicweyo laco mukwongo Adam i cal pa Lubanga. (Acak. 1:​26, 27) Jehovah ocweyo Adam ki Kawa ki kero me moko tamgi pigi kengi.

² Jehovah pe oryeyo cik mapol ma onongo mitte ni Adam ki Kawa gulubi. Me ka meno, en owaccigi ni omyero gugwok lobo, gunywal, gunya ci gupong lobo ki lutinogi, dok guwor twerone me moko pigi gin matir ki gin marac. (Acak. 1:28; 2:​16, 17) Adam gin ki Kawa onongo myero guyer pigi kengi me lubo cik mayot magi. Pi jami ducu ma Jehovah ominigi, onongo myero okonyogi me nyuto ni gimaro Jehovah, gimito yomo cwinye, dok gitye ki pwoc pi mic me moko tamgi pigi kengi.—Car. 23:15.

3. Adam ki Kawa gutiyo ki micgi me bedo agonya nining?

³ Baibul waco ni Adam gin ki Kawa pe gutiyo ki micgi me bedo agonya i yo me ryeko. Me ka meno, gin gumoko tamgi me kwero bedo luwiny bot Jehovah. Gin gumoko tam meno pien onongo pe gimaro Jehovah, ento gimarre kekengi. (Acak. 3:​1-7) Nio wa i kare-ni, pud watye ka deno can pi tam marac meno ma gumoko-ni.—Rom. 5:12.

4. (a) Ma lubbe ki Jo Galatia 6:​5, gin ango ma myero wan ducu watim? (b) Mic mukene ango ma wabinyamo i pwony man?

⁴ I kare-ni, kwo pe yot pien wakemme ki tam mapol me amoka nino ducu. (Kwan Jo Galatia 6:5.) Tam mogo mokogi yot, ento mukene mokogi tek adada. Watwero moko tam ma biyomo cwiny Jehovah nining? Mukwongo, omyero kong waye ni wamito kony pa Jehovah. (Car. 16:3; Jer. 10:23) Yecu onongo pe ki roc. Kadi bed kit meno, en onongo ngeyo ni emito kony pa Lubanga. (Ibru 5:7) Wan watye ki roc. Pi meno, wamito kony pa Jehovah makato Yecu Kricito. Kong dong wanyamu lok i kom mic mukene ma Jehovah ominiwa ma konyowa me moko tam mabeco—meno obedo cwiny ma ngoliwa kop.

CWINY MA NGOLIWA KOP OBEDO GIN ANGO?

5. (a) Cwiny ma ngoliwa kop obedo gin ango? (b) Cwiny man twero konyowa nining? (Jo Roma 2:​14, 15)

⁵ Lubanga ocweyo wan dano ki cwiny ma ngoliwa kop ma konyowa me ngeyo gin matir ki gin ma pe atir. Kadi wa ngat ma pe ngeyo gin mo keken i kom cik pa Lubanga nongo pud tye ki cwiny ma ngole kop. (2 Kor. 4:2) Cwiny ma ngoliwa kop obedo calo langolkop ma wacciwa ka ce gin ma watimo-ni ber nyo rac. (Kwan Jo Roma 2:​14, 15.) Cwiny ma ngoliwa kop twero cikowa pe me timo gin mo ma wangeyo ni rac. (1 Cam. 26:​8-11) Nyo bene twero cuko cwinywa me timo gin ma wangeyo ni tye atir. Bedo ki mic me moko tamwa piwa kenwa pe te lokke ni Jehovah cwinye bedo yom i kom tam ducu ma wamokogi. Cwiny ma ngoliwa kop omyero okonywa me ngeyo ka ce tam ma wabimoko-ni obedo tam maber nyo marac.

6. Pingo cwiny ma ngoliwa kop pe konyowa kare ducu me moko tam ma atir?

⁶ Ento ki cwercwiny, cwiny ma ngoliwa kop pe konyowa kare ducu. Kit macalo wan watye ki roc, cwiny ma ngoliwa kop bene tye ki roc. Kit gang ma wa a ki iye, lobo ma wadongo iye, nyo bene miti maraco ma watye kwede twero gudo cwiny ma ngoliwa kop i yo marac adada. Baibul waco ni cwiny ma ngoliwa kop twero doko “goro”, ‘balle,’ ‘ding woko macalo del kom dano ma kiwango ki nyonyo malyet,’ nyo bene twero doko ‘rac.’ (1 Kor. 8:12; Tito 1:15; 1 Tem. 4:2; Ibru 10:22) Cwiny ma ngoliwa kop ma kit meno pe bikonyowa me moko tam ma atir. Bedo calo kilo ma pe pimo jami kakare dok mito ayuba. Pi meno dong, omyero wati matek wek wabed ki cwiny ma ngoliwa kop maber. (1 Pet. 3:16) Watwero timo meno nining?

KIT MA WATWERO PWONYO KWEDE CWINY MA NGOLIWA KOP

7-8. (a) Gin ango ma bikonyowa me pwonyo cwiny ma ngoliwa kop? (b) I yo ma nining ma cik ma igi lac me Baibul twero konyo me tirowa? Mi lapor. (Nen bene cal.)

⁷ Watwero pwonyo cwiny ma ngoliwa kop nining? Mitte ni wakwan Baibul nino ducu dok wapwony gin ma Jehovah waco ni obedo gin ma atir ki gin marac. Kwano cik pa Lubanga bikonyowa me niang kit ma en tamo kwede. Ento kit ma kinyamo kwede i pwony mukato-ni, i kare mogo cik keken pe twero konyowa. Meno aye tyen lok mumiyo omyero bene wayeny cik ma igi lac me Baibul, pien ginyutiwa i yo matut kit ma Jehovah tamo dok winyo kwede.—Ic. 55:9.

⁸ Watwero poro kwowa ki wot i dye tim aroo ka ma gudi nyo lanyut mo pe iye. Me ngeyo ka ma watye ka cito iye, watwero neno ka ma ceng nyo lacer mogo gitye iye. Ento bibedo me kony ma loyo ka ce watye ka tic ki mep ma nyuto jami ma i kabedo meno i yo ma weko bedo yot botwa me niang jami calo godi nyo kulu ma tye i kabedo meno. Mep ma kit man bikonyowa me bedo ki gen ni watye ka lubo yo ma atir. Nyo bene binyutiwa ka ce watye ka wot i yo ma pe tye atir. Gin ma wamito i kwowa aye me yomo cwiny Jehovah. Baibul obedo calo mep ma nyutiwa yo ma atir ma twero konyowa me timo meno. Cik ma igi lac me Baibul tye calo godi nyo kulu ma wanongo i yo. Ka wakwo ma lubbe ki cik ma igi lac magi, ci man bikonyowa me yomo cwiny Jehovah kare ducu.

9. Gin mukene ango ma twero konyowa me pwonyo cwiny ma ngoliwa kop? (Jo Roma 9:1)

⁹ Me pwonyo cwiny ma ngoliwa kop wek oti maber, wamito kony pa cwiny maleng. (Kwan Jo Roma 9:1.) Cwiny maleng bikonyowa me niang kit ma Lubanga tamo kwede. Twero bene tugo cwinywa ki miniwa kero me timo gin ma Jehovah mito. (Pil. 2:13) Ento watwero nongo cwiny maleng nining?

10. Watwero nongo cwiny maleng nining? (Luka 11:​10, 13)

¹⁰ Leg pi cwiny maleng. (Kwan Luka 11:​10, 13.) Watwero bedo ki tekcwiny ni Jehovah cinge yot ka odok i kom miniwa cwiny mere maleng (Jon 3:34) En miyo cwiny mere maleng me nono bot jo ma gilubo tirane. (Car. 1:23; Yak. 1:5) Ento gin ango mukene ma dok bikonyowa me pwonyo cwiny ma ngoliwa kop?

11. (a) Gin ango ma myero pire obed tek loyo i kwowa? (b) Pingo mitte ni wapwony cwiny ma ngoliwa kop wek oti maber?

¹¹ Tute matek me yomo cwiny Jehovah kare ducu. (Car. 8:​34, 35) Meno aye myero obed gin ma pire tek loyo i kwowa. Ka waketo yub meno i wiwa pi jami ma wakemme kwedgi nino ducu, ci twero konyowa me pwonyo cwiny ma ngoliwa kop maber. Watwero bedo ki cwiny ma ngoliwa kop ma tiyo maber ka ce watamo kit ma Jehovah tamo kwede dok waparo pi kit ma en winyo kwede. Watye ka kwo i kare ma kwo tek adada, pi meno omyero wabed ki cwiny ma ngoliwa kop ma tiyo maber. Pol kare mitte ni wamok tam i kom jami ma Baibul pe loko iye atir atir. Me labolle, omyero wamok tamwa i kom jami ma waneno nyo wawinyo me galowangwa, dog ticwa, rwom kwanwa, ki dong lurem ma wayerogi. Dong watwero ngeyo nining ni tam ma wamoko i kom jami magi yomo cwiny Jehovah?—2 Kor. 1:12.

12. Gin ango ma bikonyowa me ngeyo ka ce cwiny ma ngoliwa kop tye ka tirowa me timo gin ma atir? (Jo Epeco 5:10)

¹² Lwod lok i kom gin ma ikwano ki i Baibul. (Jab. 49:3) Ka itye ka kwano Baibul, wot ki yenyo cik ma igi lac ma bikonyi me niang tam pa Jehovah. (Kwan Jo Epeco 5:10.) Man bikonyowa me ngeyo ka ce cwiny ma ngoliwa kop tye ka tirowa me moko tam mabeco ka watye ka tute me cobo pekkiwa. (Car. 2:​4-9, 11-13) Cik ma igi lac magi gitwero konyowa me pwonyo cwiny ma ngoliwa kop wek wamedde ki wot i yo ma atir.—Ibru 5:14.

13. Gin ango ma omyero wagwokke ki timone? Mi labol.

¹³ Pe imok tammi ka dok i ngeye icak yenyo cik ma igi lac me cwako tam meno. Pe wamito bedo calo Luicrael ma gudong i lobo Juda i kare ma kijwero Jerucalem i mwaka 607 K.M.P. Gin guwaco bot Jeremia ni: “Legi, wek Rwot Lubangawa onyut botwa yo ma myero walubi ki gin ma myero watim.” (Jer. 42:​3-6) Ento onongo dong gumoko tamgi woko i kom gin ma gimito timone. Tira ma Jehovah ominigi pe oyomo cwinygi, man omiyo gukwero lubone, ci gutimo gin ma cwinygi gimito. Pi meno, omiyo jami mapol maraco otimme i komgi. (Jer. 42:​19-22; 43:​1, 2, 4) Dong ma peya wamoko tam mo, mitte ni kong wayeny cik ma igi lac me Baibul ma nyutiwa tam pa Jehovah ci walubi.

14. Pingo mitte ni wati ki cik ma igi lac me Baibul ka watye ka moko tam?

¹⁴ Mok tam ma jenge i kom cik ma igi lac me Baibul. (Mat. 7:​24-29; Yak. 1:​23-25) Ka wamoko tam ma lubbe ki cik ma igi lac me Baibul, nongo waye ni cwiny maleng otirwa. Macalo adwogine, Jehovah medde ki miniwa cwiny mere maleng. (Tic 5:32) Ento ka pe waweko cwiny maleng pa Jehovah aye tirowa, ci nongo watye ka miyo cwiny maleng ‘kumo.’ (Ep. 4:30; Ic. 63:10; Tic 7:51) Man twero weko Jehovah kwanyo cwiny mere maleng woko ki botwa. (Jab. 51:11; 1 Tec. 5:19) Meno bibedo gin marac adada pien wamito teko ma wanongo ki bot cwiny maleng.—Ep. 3:16.

KIT ME NONGO CIK MA IGI LAC MA WATWERO KETONE I TIC

15-16. (a) Watwero nongo cik ma igi lac me Baibul ma romo konyowa nining? (b) Cik ma igi lac mene ma twero konyo latin kwan me Baibul me juko mato taa?

¹⁵ Ti ki jami me kwedo lok ma dulwa oyubo. Ka watye ka yenyo cik ma igi lac me Baibul ma twero konyowa, waromo tic ki jami me kwedo lok ma dulwa oyubo. Me labolle, ket kong ni latin kwanni me Baibul pe ye weko mato taa. En twero bedo ki tam ni: ‘Pe tye ka mo keken i Baibul ma kicoyo iye lok i kom mato taa. Dong wangeyo nining ni obedo gin marac?’ Itwero konye nining me nongo cik ma igi lac me Baibul wek oniang ni mato taa rac? Gin tic acel ma twero konye obedo Watchtower ONLINE LIBRARY. Ka latin kwanni ocoyo ni “Mato Taa” i ka yenyo lok, en binongo pwony mapol ma twero konye. Pwony acel i kin magi wiye tye ni “Lubanga Neno Mato Taa Nining?” (Nen Wi Lubele me Juni 1, 2014.) Ka en woto ki kwano pwony meno, wang ginacoya kacel ki cik ma igi lac mene ma en binongone?

¹⁶ Nen kong cik ma igi lac abic mapatpat ma kiloko iye i pwony meno. (1) Pe omyero wadok opii pa gin mo ma terowa i to. (Rom. 6:16) (2) Omyero wagwokke ki gin mo keken ma twero wano komwa. (2 Kor. 7:1) (3) Jehovah mito ni wati pire ki cwinywa ducu. (Mat. 22:37) (4) Pe myero watim jami ma kelo awano i kom jo mukene. (Mat. 22:39; 1 Kor. 10:24) (5) Jehovah miniwa teko me timo gin ma atir. (Pil. 4:13) Dong kadi bed Baibul pe waco atir ni mato taa rac, ento cik ma igi lac ma nonge i Baibul twero konyo latin kwanni me neno kit ma Jehovah neno kwede mato taa.

17. Omego ki lamego ma gitye ka yubbe pi nyomgi gitwero nongo cik ma igi lac me Baibul ma romo konyogi nining?

¹⁷ Omego ki lamego ma gitye ka yubbe pi nyomgi gitwero nongo cik ma igi lac me Baibul ma romo konyogi nining? Watchtower ONLINE LIBRARY twero konyogi. Ka gucoyo ni “Nyom” i ka yenyo lok, ci gibinongo pwony mapol ma tye ki cik ma igi lac ma twero konyogi me moko tam ma atir. Tam kong i kom cik ma igi lac abicel ma gitwero tam iye. (1) Jami ducu ma timme i nino nyom myero okel deyo bot Jehovah. (1 Kor. 10:​31, 32) (2) Rukwa myero obed mupore, me woro, dok ma pe ywayo tam pa dano i komwa. (1 Tem. 2:9; 1 Pet. 3:​3, 4) (3) Omyero wagwokke ki wakke ki jami ma watye kwede, kit macalo jo me lobo-ni gitimo kwede i nyomgi. (Jon 17:14; Yak. 1:27; 1 Jon 2:​15, 16) (4) Nyom kacel ki yub me kwero nyom myero kiyub maber dok ma nyuto woro. (1 Kor. 14:40) (5) Yub me kwero nyom myero pe odok pati me yomcwiny me mingo ma dano mer iye ki kongo. (Gal. 5:21) (6) Lunyom myero gucim ngat mo me bedo lador wi nyom wek jami ducu ma kitimo okel deyo i kom Jehovah.—Jon 2:​8, 9.

18-19. (a) Gin tic mukene ango ma twero konyowa? (b) Itwero tic ki gin tic man nining me konyi me moko tam madok i kom kwero nino madongo? (Nen bene bok ma wiye tye ni “Tika Itwero Niang kit ma Jehovah Tamo Kwede i kom Jami Magi?”)

¹⁸ Gin tic mukene ma twero konyowa me kwedo lok aye Ginacoya pi Kwowa Macalo Lukricitayo. I buk man, kiryeyo ginacoya mapol i te wi lok mapatpat. Ka iyero wi lok ma itye ka mitone, ibinongo kiryeyo i tere lapeny mapol kacel ki ginacoya ma twero konyi me nongo cik ma igi lac me Baibul. Me labolle, Lakricitayo moni twero bedo ki gung cwiny ka ce myero ecit i kwer moni. Ka en oyabo wi lok ma waco ni “Kwer,” en binongo wi lok matidi ma waco ni “Kwer mogo ma Lukricitayo myero gugwokke kwede.”

¹⁹ Nen kong lapeny ma kiloko iye i te wi lok matidi meno: “Pingo pe opore me nywako i kwer ma kubbe ki dini goba? (1Kor 10:21; 2Kor 6:​14-18; Ep 5:​10, 11).” Kimiyo labol pa kwer ma kit meno. I te wi lok ma waco ni “Kwer ma kubbe ki lobo moni,” ibinongo kiryeyo cik ma igi lac ma twero konyo Lakricitayo me moko ka ce omyero enywak i kwer ma kubbe ki tim me wibye nyo lweny ma lobogi onywako iye, nyo bene kwer ma miyo deyo bot oteka me lobo moni. Watye ki pwoc madit adada ni dul pa Jehovah miniwa jami me kwedo lok ma konyowa me pwonyo cwiny ma ngoliwa kop!

NYUT NI IPWONYO CWINY MA NGOLI KOP MABER

20. Watwero ngeyo nining ni wapwonyo cwiny ma ngoliwa kop maber?

²⁰ Watye ki pwoc pi mic me bedo agonya me moko tamwa piwa kenwa. Ento bene waniang ni myero wapwony cwiny ma ngoliwa kop wek wati ki mic me bedo agonya i yo maber. Ka wapwonyo cwiny ma ngoliwa kop maber, ci bikonyowa me moko tam ma yomo cwiny Jehovah dok kelo deyo i kome. Me timo man, wamito kony pa cwiny maleng pa Jehovah. Dong mitte ni wamedde ki lega pi cwiny maleng dok waye lubo tirane. Cik ma igi lac me Baibul bene bikonyowa me pwonyo cwiny ma ngoliwa kop. Dong omyero watute matek me tic ki mic magi ma Jehovah ominiwa-ni i yo maber loyo. Ka watimo meno, ci wabineno kit ma Lok pa Lubanga konyowa kwede i kwowa.—2 Tem. 3:​16, 17; Ibru 4:12.