Medde ki Jingo Watti ki Luoti

1. Pingo watwero waco ni lurem mabeco gubedo mot mua ki bot Jehovah?

LUREM mabeco gubedo mic ma oa ki bot Jehovah. (Yak. 1:17) Gimaro Jehovah, dok bene gimarowa. Gimito ni wabed ki yomcwiny, gikweyo cwinywa ka cwinywa otur dok giminiwa tam ka mitte. Gitye lugen, dok wan bene watwero genogi. Lurem ma kit meno “miyo dano bedo ma cwinye yom”!—Car. 27:9.

2. Pingo pire tek ni jo munyomme gumedde ki jingo wat i kingi? (Matayo 19:6)

² Pire tek adada ni laco ki dakone gubed lurem macok. Myero wigi opo ni mito tute matek me jingo wat i kingi. Ka pe gitimo jami ma konyogi me bedo ma kingi cok, gitwero cako winyo ni gitye kickic, yomcwinygi rweny woko, dok giromo bedo ki kiniga. Ento ka gimedde ki tute me bedo ki wat macok, ci gitwero bedo ki wat macok loyo ma twere i kin dano aryo. (Kwan Matayo 19:6.) I pwony man, wabinyamo kit ma jo munyomme gitwero medde ki jingo wat i kingi. Ento mukwongo, kong wanyamu kit ma omege ki lumege ma wigi nono gitwero yero kwede ngat mupore me anyoma ma bibedo laremgi matwal.

KIT ME YERO NGAT ME ANYOMA MA BIBEDO LAREMI MATWAL

3-4. Gin ango ma bikonyo ngat ma tye ka yenyo dako nyo laco maber me anyoma? (Carolok 18:22)

³ Ma peya imoko tam mo keken ma pire tek, mitte ni kong itam i kom adwogi mabeco ki maraco ma tam meno twero kelone. Tam ma wamoko me nyom obedo tam ma pire tek ma twero miyo kwowa bedo maber nyo marac, pi meno, omyero watam matut ma peya wamoko tam mo keken iye.

⁴ Yero ngat ma ibinyomme kwede tye i kin tam ma pigi tego loyo ma ibimokone. Tye kit meno pien nongo watye ka yero ngat ma bibedo laremwa pi kare me kwowa ducu. Kit macalo Jehovah aye ocako te yub me nyom, ngene kene ni pire tek me nongo pwony ki bote i kom gin me atima ka odok i kom nyom. En mito ni laco onong dako maber, ki dako bene onong laco maber. Jehovah aye kare ducu ngeyo gin maber loyo piwa. (Kwan Carolok 18:22; Ic. 48:​17, 18) Cik ma igi lac ma nonge i Lok pa Lubanga twero konyo Lakricitayo me nongo ngat mupore me anyoma.

5. Pingo pire tek me yero ngat ma onongo batija me anyoma?

⁵ Ka wanongo batija, wadoko lurem Lubanga. (Jab. 25:14) Dong ka imito nyomme, omyero iyer ngat ma bene obedo larem Jehovah. (1 Kor. 7:39) Ka itimo meno, ci inyuto ni iworo gin ma Jehovah mito dok ibineno ngat ma inyomme kwede calo mic mua ki bot Jehovah. (Car. 19:14) Medo i kom meno, ibigwokke ki i pekki ma bino pi “ribbe” ki ngat ma pe obedo laye. (2 Kor. 6:14) Pe nyuto ryeko ka icako winnye ki ngat ma pe obedo laye lawoti, kun igengo ngeyi ki lok ni pe itye ka nongo ngat mo mupore piri i kin Lucaden. Pe bene pore me tamo ni pe rac me cako winnye ki ngat ma pe Lacaden kun itamo ni en bijolo ada.

6-7. Lapeny macalo mene ma myero ipennye kwede i kare me winnyewu?

⁶ Ngene kene ni pe ngat mo keken ma onongo batija nongo dong opore me anyoma. Ka itye ki miti i kom ngat moni, bedo ber ka kong ipennye kekeni ki lapenya mogo calo: ‘En mono tero lupacogi nining? Tika en paro pi dano dok nyuto woro botgi? Angagi ma gubedo lureme? Gin ango ma en timo ka tye ki niang manok ki ngat mo? Tika en keto gingi ni jami ducu kitim ma lubbe ki mitine, nyo mono en ye lubo tam pa jo mukene ka pe turo cik me Baibul? Tika tye ki neno mupore ka odok i lok kom cente?’

⁷ Itwero bene pennye ki lapeny magi: ‘Tika ngat ma atye ki miti i kome-ni nyuto mar matut pi Jehovah? Tika en tye ka tute matek me lubo kit pa Jehovah? Tika en bikonya me medde ki tic pi Jehovah ki gen? Tika yub me cwiny ma ngat meno tye kwede rwatte ki mega? Tika wan ki ngat meno watwero doko lirem ma gipoko pyer ngwen?’ (Kol. 3:​9, 10) Ka in lamego, pennye kekeni ni: ‘Tika omego ma abinyomme kwede-ni pe bibedo larema macok keken ento en bene bimoko tam mabeco piwa macalo jo me ot?’ (1 Kor. 11:3) Ka in omego, pennye kekeni ni: ‘Tika lamego ma abinyomo-ni bimina woro kun bene cwako tam ma amoko kadi bed i kare mogo atimo bal?’ Kare mitte me nongo lagam pi lapeny magi ducu. Pi meno, ti ki kare me winnyewu me ngeyo ngat ma imito nyomo-ni maber.

8-9. Gin ango ma twero konyo ngat ma tye ka winnye me moko tam me ryeko? (Nen bene cal.)

⁸ I kare me winnye, ibibedo ki kare me moko tam maber ka iniang kit ngat ma imito nyomo-ni. Itwero penyo jo mukene wek guwacci kit ma gineno kwede ngat ma imito nyomo-ni. Itwero penyogi me titti kite ki dong kit ma jo ma i kacokkene ginene kwede. Me labolle, tika kingeye macalo ngat ma mwol, lakica dok niang? Laminwa Sarah ma a ki i lobo French Guiana ma onyomme ki omego mo ma nyinge Daniel, owaco ni: “Apenyo jo mukene me tita kit ma gitamo kwede i kom Daniel. Me labolle, apenyo omego ma onongo bedo kacel kwede, laelda mo ma i kacokkene, lurem ma gingeyo wan aryo-ni ducu, ki dong lumege mogo ma i kacokkene.” Pire tek bene ni ipeny ngat ma itye ka winnye kwede-ni ka ce tye gin mo mutimme i kwone i kare mukato nyo ma tye ka timme i kare-ni ma mitte ni inge. Pire tek ni inge jami magi pien twero kelo peko i nyomwu lacen.

⁹ Gwok nyo itye ki akalakala ka ce ngat ma itye ka winnye kwede-ni bibedo won ot nyo min ot maber. Nyo gwok omege ki lumege ma guteggi gutitti pi kit mogo maraco ma ngat meno tye kwede. Ka tye kit meno, pe icaa lokgi. Ka itye atera me jolo tam, ci ibibedo ki kare me moko ka ce myero inyom ngat meno nyo pe.b Kombeddi dong, wabinyamo gin ma twero konyo jo ma gunyomme me jingo wat i kingi.

WUTER CAWA KACEL ME DONGO LIREMWU

10. Pingo pire tek ni laco ki dako ma gunyomme gukwany kare me bedo kacel?

¹⁰ Laco ki dako ma gunyomme gitwero gwoko wat i kingi bedo macok ka gikwanyo cawa me bedo kacel, kadi bed gitye ki tic mapol. Man minigi kare me lok i kom jami me nino ducu, me tito tamgi ki kit ma giwinyo kwede, me nyuto mar i kingi, ki dong me namo kacel.

11. Gin ango ma twero balo wat i kin laco ki dako ma gunyomme?

¹¹ Laco ki dako ma gitye lurem macok gimito ni gibed kacel me ka bedo patpat. Ngene kene ni, pe gitwero bedo kacel kare ducu. Ento bedo ka mabor ki bot luoti pi kare malac twero kelo adwogi marac. Me labolle, jo mukene giye dog tic ma terogi i lobo mukene dok weko gibedo ka mabor ki luotgi pi kare malac. Kadi bed ni tic meno keligi cente madwong, ento bedo bor ki bot lawoti pi kare malac twero kelo peko i nyomwu.

12-13. (a) Gin ango ma Lukricitayo mogo munyomme gitimo wek ginong cawa me bedo kacel? (Nen bene cal.) (b) Wat i kin in ki ngat ma inyomme kwede pire myero obed tek lakwene? (Nen bok ma wiye tye ni “Luota Myero Pire Obed Tek Bota Lakwene?”)

¹² Nen kong gin ma luot mogo gutimo me neno ni gikwanyo kare me bedo kacel. Laminwa Leah, ma bedo i lobo Guam owaco ni: “Wan ki cwara wanongo mit pa timo jami mapol kacel. Pol kare watimo jami kacel dok pe waye lwongo ma pe kwako wan aryo ducu.” Laminwa Rose,c ma bedo i lobo Amerika owaco ni: “Pien watye ki tic mapol adada me atima, wacako keto yub con me moko cawa ma wan aryo-ni waromo bedo kacel, kit ma wamoko kwede cawa me timo jami ma pigi tego.” (Por ki Amoc 3:3.) Omego Dan ma bedo i lobo France owaco ni: “Wan ki dakona, wanongo ni pire tek adada me niang gin ma ngat acel acel maro timone. Dok i nge kare mo, wapwonnye me maro gin ma ngat acel acel maro.” (Mat. 7:12) Dok laminwa Katie ma bedo i lobo Amerika bene owaco ni: “I kare mogo, waketo cimwa ka mabor wek wabed ki kare muromo me lok i kinwa.”

¹³ Gin ma pire tek loyo aye obedo tic pi Jehovah kacel macalo luot. Laminwa Miriam, ma bedo i lobo i France owaco ni: “Nino ducu ka waco, wacako ki kwano Baibul ci i ngeye wanywako gin ma wamaro ki i kwanwa ki gin ma wamito ketone i tic i kwowa. Amaro kare meno ma wacwalo kacel-li.” En omedo ni: “Yomo cwinya bene adada ka walego kacel dok awinyo kit ma cwara tito kwede mare pi Jehovah.” Laminwa Katie ma kiloko i kome con-ni owaco ni: “Gin ma pud dong yomo cwinya loyo aye ka wacito ka tito kwena kacel ki cwara. Ka wawinyo kit ma ngat acel acel loko kwede i kom Jehovah, meno nyikowa macok adada, dok apwonyo jami manyen ki bot cwara kun en bene pwonyo ki bota.”—Car. 27:17.

WUTI KACEL ME COBO PEKO MA BINO I NYOMWU

14-15. Pingo myero jo munyomme gutute matek me loyo ariya ma bino i nyomgi? Mi lapor.

¹⁴ Macalo dano ma gitye ki roc, jo munyomme ducu gibedo ki pekki mogo i nyomgi. Baibul waco ni jo munyomme “gibinongo ayelayela me kwo me lobo man.” (1 Kor. 7:28) Tyeng meno loko i kom pekki ma pol pa jo munyomme gikato ki iye. Ka pekki ma kit meno obino, jo munyomme myero guti matek me medde ki bedo lurem ki me cobone. Pingo?

¹⁵ Tam kong i kom lapor man. Ket kong ni gedo mo ma pire tek adada oballe. Wegine gibitute matek me rocone. Kadi bed ni obitero mwaki mapol kacel ki cente madwong me rocone, gin pe gibiilo cinggi. Pingo? Pien gedo meno pire tek adada botgi. I yo acel-lu, nyom ducu pire tek calo gedo meno. Kadi wa luot ma kingi cok adada bene gibedo ki pekki kacel ki niang manok i kingi. Ento, kit macalo gedo ma oballe pud kitwero rocone, kit meno bene nyom ma tye ki peko pud kitwero yubone. Twero tero kare kacel ki tic matek me rocone, ento cwiny Jehovah bibedo yom me neno ka luot moni gitute matek me cobo peko ma tye i nyomgi kun gimedde ki bedo kacel. (Mal. 2:16) Ka gutimo kit meno, ci ginyuto mar kacel ki woro bot luotgi kacel ki Jehovah, Ngat ma ocako te yub me nyom.

16. Ma lubbe ki 1 Jo Korint 13:​4-8a, gin ango ma twero konyo luot ma gitye ka kemme ki peko madit i nyomgi? (Nen bene cal ki bok ma wiye tye ni “Gin ma Twero Konyowu me Jingo Wat i Kinwu.”)

¹⁶ Ka peko obino i nyomwu, pe wurune me pokke. (1 Kor. 7:​10, 11) Me ka meno, pennye kekeni ni, ‘Tika aromo timo gin mo me yubo nyomwa?’ Kwan gin ma Baibul waco i kom nyuto mar, tam i kom yo ma itwero nyuto kwede mar, kit ma kiloko kwede i 1 Jo Korint 13:​4-8a. (Kwan.) Me ka tamo i kom kit me pokke woko ki luoti, tim gin ducu ma itwero me cako maro lawoti odoco. Pe iket cwinyi i kom gin ma mitte ni lawoti otim alokaloka iye, ento ket cwinyi i kom alokaloka ma mitte ni in itim me bedo ki yomcwiny i nyomwu odoco. Leg kony ki bot Jehovah. Ti ki bukkewa kacel ki vidio ma twero konyi me ngeyo gin me atima. Itwero bene penyo tam ki bot luelda nyo bot omege ki lumege mogo ma gitye ka keto i tic tira me Baibul i nyomgi. Baibul waco ni nyom tye “calo tol adek ma giwiyogi”, dong i kin tol adek-ki Jehovah aye tek loyo, dok pire tek loyo i nyomwu. Dong ka wutimo jami ma lubbe ki mitine, ci nyomwu bimedde ki bedo matek.—Latit. 4:12.

17. I yo ma nining ma jo ma gitye ki miti me nyom kacel ki jo ma dong gunyomme gitwero nongo kwede ki yomcwiny?

¹⁷ Jehovah mito ni luticce ducu gubed ki yomcwiny, man kwako jo ma gitye ki miti me nyom kacel ki jo ma dong gunyomme. Dong ka pud wii nono dok itye ki miti me nyomme, yer ngat ma ibinyomme kwede-ni ki diro. Dok ka dong inyomme woko, medde ki jingo wat i kin in kacel ki luoti. Ki kony pa Jehovah, wuti matek me cobo pekki ma bino i nyomwu. Ka wutimo jami magi, ci ‘wubibedo ki yomcwiny’ i otwu!—Latit. 9:9.