Kit me Niang Lapor ma Kitiyo Kwede i Baibul

Tyen mapol, Baibul otiyo ki lapor mapatpat me pwony. Ento jo mapol ginongo tek me niang lapor magi. (Mat. 13:13) Gin ango ma twero konyi me niang tyen lok me lapor magi maber? Tem timo jami magi:

• Niang wi lok ki gin ma kitye ka porone kwede. Me labolle, i Niyabo 3:​3, kiporo bino pa Yecu (ma en aye wi lok) ki bino pa lakwo (ma en aye lapor).

• Tam i kom kit ma wi lok meno rwatte ki lapor ma kitiyo kwede. Tute me niang tyen lok ma omiyo kitye ka poro jami aryo magi dok gin ango ma jami magi gitye kwede marom.

• Nen ni gin ma ipwonyo rwatte ki gin ma lapor tye ka pwonyone. I kine mukene, ngat moni twero niang lapor moni i yo marac. I labol ma kiloko iye malo-ni, Yecu pe obibino ka kwalo gin mo keken. Ento obibino atura macalo lakwo.