Lapeny pa Lukwan Bukkewa

Awene ma gamente ducu me lobo man gibimiyo iye lok angeya ni “kuc tye, piny okwe mot, gin mo marac pe”?

Kit ma kitito kwede i “Lapeny pa Lukwan Bukkewa” ma okatti i Wi Lubele me Novemba 2025, macok cok-ki, Jehovah biketo “tamme” i cwiny ‘tung lee apar-ri’ (gamente ducu me lobo man). Tam ma Jehovah biketone i cwiny gamente bibedo me miyo twero me locgi bot ‘lee makwar-ri’—ma meno aye dul me United Nations. Lee makwar-ri bene kilwongo ni “cal lee.” (Yabo 13:​14, 15; 17:​3, 16, 17) I nge meno, ‘tung lee apar-ri’ kacel ki lee makwar-ri ma dong kimine twero, gibijwero dini goba ma i wi lobo-ni woko ducu. Tika gamente gibimiyo lok angeya man ni “kuc tye, piny okwe mot, gin mo marac pe”a ma peya kijwero dini goba nyo i ngeye?—1 Tec. 5:3.

Lagamme tye ni, pe wangeyo awene kikome ma gamente gibimiyo iye lok angeya ni “kuc tye, piny okwe mot, gin mo marac pe.” Ka onongo wangeyo kit ma jamine bitimme kwede kikome, ci onongo pe bimitte ni wabed ma wangwa twolo. Ento Yecu owaco tyen mapol bot lulub kore ni, “Wubed ka kiyo piny.” (Mat. 24:42; 25:13; 26:41) Kong dong wanyamu i yo matut lok ma Jehovah otito con kun tiyo ki lakwena Paulo me coyone bot jo Tecalonika.

Paulo ocoyo ni: “Ka dano giwaco ni, ‘Kuc tye, piny okwe mot, gin mo marac pe,’ to biturugi atura.” (1 Tec. 5:​2, 3) I kare mukato angec, bukkewa onongo gonyo lok pa Paulo kit man ni: Lok angeya ni “kuc tye, piny okwe mot, gin mo marac pe” kibimiyone ma pud peya twon can madit atika-ni ocakke, ma man bicakke ki jwero Babilon Madit—ma obedo dul dini goba ducu ma i wi lobo-ni. Onongo bene yam wawaco ni ka kimiyo lok angeya ni “kuc tye, piny okwe mot, gin mo marac pe” ci wabingeyo ni twon can madit atika-ni dong cok cakke.

Ento i nge kwedo lok man matut, nen calo dok watwero niang lok pa lanebi man i yo mapat. Twero bedo ni kibimiyo lok angeya man ni “kuc tye, piny okwe mot, gin mo marac pe” i nge jwero dini goba. Pingo watwero wacone kit man? Tam kong i kom tyen lok mogo.

I yo ma nining ma dini goba orwako kwede wiye i lweny me wi lobo-ni? Baibul otito ni: ‘Remo pa jo ducu ma yam ginekogi i lobo, ginongo tye i Babilon Madit [“dako ma lakwele marac”].’ (Yabo 17:​1, 5; 18:24) Nicakke wacon, dini goba gubedo ka cwako lweny dok gutugo tim gero magwar ma man oneko dano milion mapol ata. Pi meno, dini goba okelo lweny ki tim gero ento pe kuc ki piny ma okwe mot. Dong twero bedo ni gamente gibimiyo lok angeya ni “kuc tye, piny okwe mot, gin mo marac pe” i nge jwero Babilon Madit, ento pud pe watwero mokone ka bitimme kit meno.

Gin ango ma bitimme ka dong gamente gumiyo lok angeya ni “kuc tye, piny okwe mot, gin mo marac pe”? Paulo owaco ni: ‘To biturugi atura.’ (1 Tec. 5:3) Ka gamente ducu me lobo-ni gumiyo lok angeya ni “kuc tye, piny okwe mot, gin mo marac pe” ma peya kijwero dini goba, ci kare bimitte me jwero dini goba ka dok i ngeye me jwero gamente ducu. Ento ka gamente ducu me lobo-ni gumiyo lok angeya man i nge jwero dini goba, ci dong kare me jwero gamente magi biturugi atura.

Jo pa Jehovah gibidok i lok meno nining? Paulo owaco ni: ‘Wun pe wutye i piny macol, utmegiwa, ma twero miyo nino-nu turuwu atura calo lakwo.’ (1 Tec. 5:4) Tam kong: Ka kimiyo lok angeya ni “kuc tye, piny okwe mot, gin mo marac pe” i nge jwero dini goba, ci jo pa Jehovah gibingeyo ni kare me jwero gamente ducu dong cok. Ento ki tung bot lobe magi ma gitamo ni dong gityeko kelo kuc i lobo woko, kare me jwerogi biturugi atura calo lakwo.

Dong gin ango ma watye ka kurone? Macok cok-ki, ‘tung lee apar-ri’ kacel ki lee makwar-ri ma gibimiyo twerogi me loc bote, gibijwero dini goba. Man aye bibedo acakki me twon can madit atika-ni. Wangeyo bene ni i kare mo, lobe gibimiyo lok angeya ni “kuc tye, piny okwe mot, gin mo marac pe.” Meno bitimme awene? Dong wanyamo kare mapatpat aryo ma gin meno twero timme iye. Me acel: Gitwero miyo lok angeya meno ma peya kijwero dini goba. Me aryo: Gamente me lobo-ni gibimiyo lok angeya man i nge jwero dini goba. Bimitte ni wakur wek wanen gin ma bitimme. Pol kare waniang lok pa lunebi me Baibul maber ka tye ka cobbe nyo dong otyeko cobbe woko.—Por ki Jon 12:16.

Gin ma pire tek loyo botwa aye pe awene ma lobe gibimiyo iye lok angeya ni “kuc tye, piny okwe mot, gin mo marac pe” ento meddewa ki bedo lugen bot Lubanga aye pire tek. Dong omyero “wabed ka neno piny kun wagwokke,” wek wabed ma wayubbe labongo paro kit ma jami man bicobbe kwede.—1 Tec. 5:6.