Lok ki Kica ka Itye ka Pwonyo Lok Ada me Baibul

1. Gin ango ma omyero watim ka wamito bedo i kin jo me ot pa Jehovah?

POL kare ka warwatte ki Lacaden lawotwa pi tyen me acel, gin ma wabedo ki miti me ngeyone aye kit ma en opwonyo kwede ki lok ada madok i kom Jehovah. Jo mogo giwaco ni “gidongo i ada.” Jo mukene gitwero waco ni pud “gipwonyo ada nyen.” Wamiyo lagam ma kit meno pien lok ada aye doro kit ma wakwo kwede. Pingo? Pien wangeyo ni twerre ki wan me bedo i kin jo me ot pa Jehovah keken ka wanyuto ka maleng ni wamaro ada dok wakwo ma lubbe ki gin ma wapwonyo. Yo acel ma watimo kwede meno aye ki bedo jo ma genne i lokwa ki ticwa.—Jab. 15:​1-3.

2. (a) Gin ango ma onongo dano gitamo i kom Yecu? (b) Dano gudok i lok ada ma Yecu opwonyo nining?

² Yecu kare ducu oloko lok ada. Lumonene guwaco ni en obedo ngat ma lagen i lokke kadi bed gin pol kare onongo pe gimaro gin ma Yecu loko. (Mat. 22:16) Yecu otito ki lulub kore kit ma dano gibidok kwede i kom lok ada ma en epwonyo. En owaco ni: “Abino ka kelo apokapoka i kin latin awobi ki wonne, anyaka ki minne, ki dong ci-wod ki daane.” (Mat. 10:35) Yecu onongo mito ni dano gudok i kwena ma en kacel ki lulub kore gitye ka pwonyone i yo maber. (Mat. 23:37) En onongo ngeyo ni dano gibidok i lokke i yo aryo mapatpat. Jo mukene onongo gibimarone ento jo mukene onongo gibikwerone woko.—2 Tec. 2:​9-11.

3. Gin ango a wabinyamo i pwony man?

³ Calo Yecu, wan bene kare ducu watute me loko lok ada kadi bed dano pe gimarowa pi timo meno. Watito dok wapwonyo lok ada me Baibul kadi bed cwero cwiny jo mukene. Tika man tyen lokke ni pe omyero watam pi kit ma waloko kwede ki awene ma mitte ni walok iye lok ada? Pe tye kit meno! I pwony man, wabikwongo ki nongo lagam pi lapeny ma pire tek man: Watwero nongo lok ada madok i kom Jehovah ki kwene? I nge meno, wabigamo lapeny mogo ma cal ki meno calo: Pingo, i yo ma nining, ki awene ma myero watit ki jo mukene lok ada me Baibul? Lagam pi lapeny magi bikonyowa me tito ki jo mukene lok me kwena maber ki dok me bedo jo ma genne kare ducu kadi bed timone pe yot. Timo man kwako tic ki diro kacel ki timone i kare ma mitte kikome.

WATWERO NONGO ADA KI KWENE?

4. Pingo watwero wacone ni Jehovah obedo Wang It me ada?

⁴ Jehovah aye obedo Wang It me ada. Lok ducu ma en waco obedo ada. Me labolle, gin ma en wacciwa madok i kom gin ma atir ki ma pe atir ducu tye lok ada. (Jab. 19:9; 119:​142, 151) Cikkene ducu pi anyim wang ma ocobbe. (Ic. 55:​10, 11) En kare ducu cobo cikkene. (Wel 23:19) Tye lok ada ni Jehovah pe twero bwolowa! (Ibru 6:18) Dong watwero niang pingo kilwongo Jehovah ni “Lubanga me ada.”—Jab. 31:5.

5. Pingo pe tek me nongo “Lubanga me ada”? Tit kong. (Tic pa Lukwena 17:27)

⁵ Jo mogo giwaco ni tek adada me ngeyo Jehovah, “Lubanga me ada.” Ento meno pe lok ada. Cwec ducu ma orumowa nyuto ni Lubanga tye. (Rom. 1:20) I kare ma lakwena Paulo obedo ka lok ki gurup pa jo mo ma gukwano i Atene, en owaco ni Lubanga mito ni ‘wayenye’ dok ni “Lubanga pe tye cen ka mabor ki bot ngat acel acel i kinwa.” (Kwan Tic pa Lukwena 17:27.) Ki lok ada, Jehovah nyiko jo mamwol ma gitye ka yenyo ada cok bote.—Jon 6:44.

6. Lok ada mene ma nonge i Baibul, dok pingo itye ki pwoc madit me ngeyo lok ada magi?

⁶ Yo acel ma watwero nongo kwede ki Jehovah aye ki kwano Baibul. Cwiny maleng aye otelo co ma gucoyo Baibul. (2 Pet. 1:​20, 21) Dong jami ducu ma kicoyogi i Baibul obedo lok ada dok pore ki wan me geno lok ma iye. Me labolle, watwero geno gin ma Baibul waco i kom kit ma lobo kacel ki kwo ocakke kwede. (Acak. 1:​1, 26) Watwero bene ye lok ma Baibul waco i kom tyen lok mumiyo dano ducu tye ki roc ki dok pingo deno can ki to onya adada. (Rom. 5:12; 6:23) Waromo bene geno gin ma Baibul waco ni Jehovah bitic ki Wode me kwanyo jami maraco ducu ma Catan, “won goba” okelo. (Jon 8:44; Rom. 16:20) Dok watwero geno cikke me Baibul ma waco ni Yecu bijwero jo maraco, biyubo lobo-ni doko maber, dok bikwanyo roc woko ducu ki i komwa. (Jon 11:​25, 26; 1 Jon 3:8) Jehovah pud dong ominiwa twon mot madit ya! En opwonyowa lok ada madok i kome dok ominiwa mot me pwonyo jo mukene bene.—Mat. 28:​19, 20.

PINGO OMYERO WALOK LOK ADA?

7-8. Gin ango ma omyero otugo cwinywa me loko lok ada? Mi labol. (Marako 3:​11, 12) (Nen bene cal.)

⁷ Kit ma kitito kwede con, omyero walok lok ada ka wamito bedo i kin jo me ot pa Jehovah. Kadi bed kit meno, omyero watim makato loko lok ada keken wek wayom cwiny Jehovah. Tyen lok ma miyo waloko lok ada pire tek adada bot Jehovah. Nen kong gin mo mutimme i kare ma Yecu tye i lobo. (Kwan Marako 3:​11, 12.) I kare ma Yecu onongo tye ka pwony i dog Nam me Galilaya, lwak dano mapol gugure i ngete. I kin jo magi onongo tye iye jo ma cen tye i komgi, gupoto piny i nyim Yecu ci gucako kok ki dwon malongo kun giwaco ni: “In giri Wod pa Lubanga.” Pingo cen magi guloko lok ada madok i kom Yecu? Nen calo onongo gimito ni jo ma gitye ka winyo lokgi gubed ki gen i komgi, dok lacen onongo gibijuko jo magi woko ki tic pi Jehovah. Lok ma cen magi guwaco-ni obedo lok ada, ento mitigi onongo pat adada. Yecu onongo ngeyo ka ma mitigi tye iye dok timgi meno pe oyomo cwinye kulu. Ki lok ada, Yecu ojuko cen magi ni pe omyero gutit lok i kome.

⁸ Pwony ango ma wanongo ki i gin mutimme man? Wapwonyo ni, tyen lok ma miyo waloko lok ada pire tek adada bot Jehovah. Dong pire tek ni omyero wapwony jo mukene lok ada i kom Jehovah pien wamare, dok ka jo mukene gipakowa pi kwena ma watito, wamiyo pak meno ducu bot Jehovah!—Mat. 5:16; por ki Tic 14:​12-15.

9. Gin ango ma omyero wagwokke ki timone, dok pingo?

⁹ Nen kong bene gin mo ma omyero wagwokke iye pe me bedo ki miti ni dano omyero gupakwa. Go kong ni omego mo ma tye ki mot me tic i dul pa Jehovah otitti lok me mung, ci lacen itito lok meno bot jo mukene. Ka jo ma itito lok meno botgi lacen guniang ni obedo lok ada, cwinygi twero bedo yom pi ngec ma itye kwede dok gitwero cako goyo i wigi ni itye ki lok me mung mapol. Man twero yomo cwiny dano, ento pe biyomo cwiny Lubanga kulu. (Car. 11:13) Pingo? Pien kadi bed lok meno ma iwaco-ni obedo lok ada, onongo ipe ki twero me wacone dok onongo pe itye ki tyen lok ma atir me waco lok meno.

KIT ME LOKO LOK ADA

10. Itwero gonyo nyig lok ni “lok mamit” nining? (Jo Kolocai 4:6)

¹⁰ Kwan Jo Kolocai 4:6. Lakwena Paulo opoyo wi Lukricitayo me Kolocai ni lokgi myero obed “lok mamit.” Gin ango ma onongo en tye ka lok iye? Nyig lok me leb Grik ma kitiyo kwede kany nyuto ni lokwa myero obed me kony bot jo mukene dok obed i yo me kica ma gudo cwiny dano.

11-12. Pingo omyero wapwony lok ada ki diro? Mi lapor. (Nen bene cal.)

¹¹ Mitte ni walub tira pa lakwena Paulo me loko lok mamit ka watye ka pwonyo jo mukene ki lok ada me Baibul. Baibul oporo lok ada ma watito ki pala lucwan mabit ma tuco cwiny dano pil. Man tyen lokke ni, twero nyuto botwa kacel ki jo mukene kit ma wawinyo kwede ki dong mitiwa. (Ibru 4:12) Ento ka pe watiyo ki Baibul ki diro, ci bikelo laro lok magwar i kinwa. Meno twero timme nining?

¹² Tam kong i kom gin man. Ket kong ni wutye i tic me pwony ci wurwatte ki laco mo ma owacciwu ka maleng ni en elego i nyim cal dok enongo mit pa kwero Karama kacel ki Easter ki jo gange. Watwero tic ki Baibul me nyuto ki ngat meno kit ma obedo gin me mingo kwede me woro gin ma pe kwo dok bene watwero moko bote ka maleng ni Baibul pe cwako kwer me Karama ki Easter. (Ic. 44:​14-20; 2 Kor. 6:​14-17) Ka watimo gin ma kit man pi tyen mukwongo ma warwatte ki ngat meno, nongo gire watye ka loko lok ada ento nongo pe watye ka tic ki Baibul ki diro.

13. Watwero weko lokwa bedo ma kado oromo nining?

¹³ Paulo bene owaco ni myero wawek lokwa obed ma kado oromo iye. En onongo pe tye ka wacci omyero pe wawek kwenawa onen i yo mapat nyo pe onen ka maleng. Me ka meno, wabipwonyo jo mukene lok ada me Baibul i yo ma gudo cwinygi. (Yubu 12:11) Timo meno twero bedo gin matek adada. Ka ni wapor ki dek ma kicamo, watwero tamo ni dek ma wanongo mit botwa bene bibedo mit bot jo mukene. I yo acel-lu, waromo cako tamo ni kit ma waloko kwede twero gudo cwiny dano ducu. Ento meno pe lok ada. Me labolle, jo ma gia ki i tekwaro mogo giwaco tamgi atir ka maleng labongo lworo kadi bed gitye ka lok ki jo ma mwakagi kato meggi. Ento jo ma gia ki i tekwaro mapat gitamo ni meno aye pe kit ma omyero kilok kwede, dok twero kelo keco. Paulo owaco ni “omyero wange kit me dok i peny pa ngat acel acel.” Man tyen lokke ni omyero watim alokaloka i kit ma waloko kwede labongo paro pi kit ma winye kwede botwa nyo i tekwarowa, ento kit ma biwinye kwede bot jo mukene.

KARE MENE MA OMYERO WAPWONY IYE LOK ADA?

14. Tika Yecu opwonyo lulub kore ki jami ducu i kare ma tye i lobo? Tit kong.

¹⁴ Kare ducu, Yecu oloko lok mamit bot lulub kore dok en opwonyogi ki jami mapol i yo me kica. (Mar. 6:34) Ento onongo pud tye jami mapol ma mitte ni en opwony ki lulub kore. Yecu pe otute me pwonyogi ki jami ducu ma en ngeyo. En onongo ngeyo ka ma kerogi gik iye. Yecu oniang ni meno pe obedo kare mupore me tittigi lok ada mogo. Ki lok ada, en owaco ni onongo pe gibitwero kanyo lok ada magi. (Jon 16:12) Dong man pwonyowa gin ango?

15. Tika mitte ni watit jami ducu ma wangeyo bot lutino kwanwa i acakki me kwan? Tit kong. (Carolok 25:11) (Nen bene cal.)

¹⁵ Lanen pa Yecu nyutiwa ni kadi bed wangeyo lok ada me Baibul mapol, pe dong tyen lokke ni omyero wapwony jami ducu ma wangeyo. Watwero lubo lanen pa Yecu nining? Omyero watam i kom kwo ma ngat moni tye ka wok ki iye. Kong dok itam i kom laco ca ma nongo mit pa kwero Karama kacel ki Easter ki lupacone. Wangeyo ni kwer magi ocakke macalo yo acel me woro lubange me goba dok Lubanga pe cwako kwer magi. Ento ket kong ni icako kwano Baibul ki laco meno cabit acel nyo aryo ma peya kikwero karama. Tika nongo watye ka loko lok mamit ka watite gin ma Baibul waco madok i kom kwer me goba meno ki miti ni en myero ogik kwer meno woko cutcut? Tye lok ada gire ni lutino kwan mukene gitimo alokaloka cutcut i nge pwonyo gin ma Baibul waco. Ento jo mukene gitero kare me timo alokaloka i tamgi kacel ki ticgi. Watwero konyo lutino kwanwa me Baibul me timo alokaloka ma mitte ka watito botgi gin ma mitte ni gutim i karene kikome ka waneno ni dong giromo niang iye maber.—Kwan Carolok 25:11.

16. Watwero konyo lutino kwanwa me Baibul nining me “medde ki wot i ada”?

¹⁶ Pe tye gin mo ma yomo cwinywa loyo ka wakonyo ngat mo me pwonyo lok ada i kom Jehovah. Watwero konyogi me medde ki ‘wot i ada’ ka watimo jami magi: Medde ki bedo lanen maber pigi. (3 Jon 3, 4) Nen ni kit ma ikwo kwede nyuto ni iye i cikke ducu ma nonge i Lok pa Lubanga. Bed ki tyen lok ma atir me loko lok ada. Lok lok mamit, ma nyuto mwolo, kacel ki kica ka itye ka pwonyo lok ada me Baibul. Dok ka kipwoyi, mi pak ducu bot Jehovah. Ka itimo kit meno, ibinyuto ka maleng ni ibedo latic pa Jehovah, Lubanga me ada.