Go i Wii Jami Mutimme ma Kicoyogi i Baibul

Baibul opong ki lok i kom jami mogo ma otimme ma tye ki pwony ma pigi tego. Ka watemo goyo i wiwa jami ma gubedo ka timme, watwero niang maber gin ma watye ka kwanone dok wanongo adwogi mabeco mapol ki iye. Nen kong tam mogo ma kimiyogi ma twero konyi me goyo i wii jami mogo ma gutimme i Baibul.

• Kwan malongo. Kwano Baibul malongo twero konyi me goyo i wii gin ma otimme-ni maber adada. Ka wutye ka kwano Baibul kacel macalo jo me ot, wutwero temo poro gin meno ma otimme-ni kun wuweko ngat acel acel poro bute mogo manok.

• Tem goyo cal gin meno i wii. Tem niang gin ma ngat meno onongo tye ka tamone ki dong kit ma en owinyo kwede. Me labolle, itwero pennye kekeni ni: ‘Pingo ngat meno oloko nyo otimo jami kit meno? Ka onongo abedo ngat meno, tam ango ma onongo abibedo kwede nyo abiwinyone nining ka atye ka kato i kwo ma kit meno?’

• Tem goyo cal gin meno i karatac. Goyo cal gin mutimme i Baibul twero konyi me niang ki dok me po i kom gin meno mutimme-ni maber, kadi bed cal ma igoyo-ni pe nen mwonya tutwal.