Anga ma Bibedo ki Miti me Kwano Magajin Man?
1. Ka watye ka kwano magajinwa me Wi Lubele nyo Awake!, ngo ma omyero watam pire, dok pingo?
1 Magajin me Wi Lubele ki Awake! kiyubo i yo ma gudo kwo pa dano mapatpat me lobo-ni ducu. Pi man, pwony ma iye kwako jami mapat pat. Ka watye ka kwano pwony acel acel i magajinwa, myero wawot ki tamo i kom anga ma kiyubo pwony man pire, ci wanen ni wamiyo magajin meno bote.
2. Pwony ango ma kinyamo i magajinwa ma twero gudo cwiny jo mukene?
2 Wi Lubele ma itye kwede kombeddi-ni tika loko i kom pwony mo me Baibul ma wun ki latic lawoti kong wuloko iye kare mukato? Tika tye pwony mo ma nyamo lok i kom kwo me ot ma twero konyo wati mo? Tika tye ngat mo ma ingeyo ma tye ka yubbe me wot i lobo mo ma kiloko pire i Awake!? Tika tye magajin mo ma twero gudo cwiny lutim biacara nyo lutic pa gamente i wang ticwu? Me labolle, magajin mo ma loko i kom peko me gwoko jo mutii, twero bedo me kony i gangi ma kigwoko iye jo mutii. Jo ma gwoko cik giromo bedo ki miti me kwano magajin ma nyamo lok i kom turo cik nyo abili.
3. Tit gin mutimme ma nyuto ni pire tek me miyo magajin bot jo ma watamo ni gitye ki miti me kwanone.
3 Adwogine: I nge nongo Awake! me Oktoba 2011, ma wi lokke obedo ni “How to Raise Responsible Children,” luot mo i South Africa, ma gin Lucaden pa Jehovah, gugoyo cim i cukul ki nacari 25 mapatpat i wang ticgi. Cukul pyeraryo wiye aryo gugamo magajin man ci gupoko ki lutino kwangi. Luot mukene ma i lobo meno ma gubedo ki tam acel-lu bene gupoko magajin man i cukul ma tye i wang ticgi. I cukul acel, giyero me kwano magajin man i yubgi me kwan ma bedo cabit ki cabit. Luot man gutito gin mutimme man bot laneno me adwol ma bene ocuko cwiny jo me kacokke ma gitye i adwolle me tero magajin i cukul ma tye i wang ticgi. Jang gang kal onongo waraga mapol ata ma penyo pi magajin man, mumiyo dok kigoyo odoco!
4. Pingo wamito poko magajinwa bot dano mapol kit ma twerre?
4 Magajinwa nyamo gin mumiyo jami ma kiloko i komgi-ni tye ka timme, ki ngo ma myero wapwony ki iye, dok tiro tam pa dano i kom Baibul ki Ker pa Lubanga. Magajin magi keken aye “tito lok me larre.” (Ic. 52:7) Pi man, myero wamine me pokogi bot dano mapol kit ma twerre. Yo maber me timo man aye me penye ni, ‘Anga ma bibedo ki miti me kwano magajin man?’