Bok Me Lapeny

◼ Myero mono waleg ki ngat ma wakwano kwede Baibul i nyim doggolane?

Cako ki dok dolo te kwanwa me Baibul ki lega tye ki adwogi mabeco mapol. I legawa, wakwayo Jehovah pi cwiny mere maleng me doro nyamo lokwa. (Luka 11:13) Lega bene nyuto bot latin kwanwa ni kwanne me Baibul obedo gin ma pire tek dok pwonyo en kit me lega. (Luka 6:40) Pi meno, bedo ber ka icako lega ki latin kwanni me Baibul i nge kwan kwede pi kare mo manok. Ento, kit ma kwo pa dano patpat-ti, lapwony myero oti ki ryeko me moko ka romo lega ki ngat ma kwano Baibul ki i nyim doggolane.

Gin acel ma myero itam pire aye kabedo ma kwanwu bedo iye. Ka wukwano ki i kabedo ma dano pe pol iye, ci iromo waco lega mo macek me yabo ki me dolo te kwanwu. Ento, ka timo meno biywayo tam pa dano i komwu, nyo miyo lewic mako latin kwan, romo bedo ber ka ikuro wang ma wucako kwan ki i kabedo ma dano pe pol iye. Labongo paro pi kabedo ma wakwano ki iye, omyero wati ki ryeko me neno awene ma watwero cako kwede lega ki latin kwanwa.—Nen Our Kingdom Ministry me Marci 2005, pot karatac 4.