Yo Mogo Manyen me Miyo Caden i Dye Lwak
1. Lukricitayo me cencwari me acel gumiyo lanen maber ango?
1 Lukricitayo me cencwari me acel pe gutiyo tic me pwonyo dano i ot ki ot keken. Ento bene gupwonyo i dye lwak. (Tic 20:20) Me labolle, gucito i ot pa Lubanga ki kabedo ka ma gingeyo ni dano nonge iye. (Tic 5:42) I kare ma Paulo onongo tye i boma me Atene, en opwonyo jo ma onongo i cuk nino ducu. (Tic 17:17) I kareni, yo ma watiyo kwede tutwalle aye tito kwena maber-ri i ot ki ot. Ento, watito bene kwena i ka gwoko mutoka, kabedo me biacara, ka mato yamo ki kabedo mukene-gu ma dano nonge iye. Kadi bed kicuko cwiny lutit kwena ducu me nywako i tito kwena i dye lwak ka opore, ento dong lutit kwena mukene gibibedo ki kare me nywako i tito kwena i yo aryo manyen.
2. Yo ango manyen me miyo caden ma ocakke i Novemba 2011?
2 Yub ma Kite dok Pat me Miyo Caden i Boma Madito: Kit ma kitito kwede i pot karatac 16 ki 17 me 2013 Yearbook, kicako temo yo manyen me miyo caden i dye lwak i boma me New York, i dwe me Novemba 2011. Kitiyo ki meja ma kiryeyo iye bukke i leb mapatpat i kabedo ka ma luwot mapol gikato ki iye. Nino ducu dano alip mapol ata giwoto i yo meno, kadi wa jo ma gibedo i gurofa ma pe kiye ni Lucaden gudony iye, ki jo ma pol kare pe ginonge paco bene. Okelo adwogi maber adada. Cokcok-ki i dwe mo acel, kipoko magajin 3,797 ki bukke 7,986 bot dano. Jo mapol ma gukato kenyo gupenyo ni kikwan Baibul kwedgi. Kit ma miti onongo tye me cako kwano Baibul ki dano, kigamo adrec pa jo ma tye ki miti, ci kicwalo ngec meno i kacokke ma tye cok kwedgi wek kinong yo me limogi.
3. Kitye ka temo yo manyen man i boma mukene nining?
3 Kit ma yo manyen man okelo adwogi maber atika-ni, dong kitye ka temone i lobe mukene i boma madongo ma dano pol iye adada. Jang gang kal aye yero boma ma kitwero tic ki yo manyen man iye. Pol kare kiyero boma ma tye ki kabedo ma dano mapol kato ki iye nino ducu, calo ka ito bac, gar nyo mutoka, ki dok opic mapol ma gugure kacel, ki odi maboco. I nge yero boma, jang gang kal miyo ngec bot jo ma gibinywako iye kun miyo cik ma myero gulubi. Pol kare painia marii ki painia keken aye ginywako i tic man, kadi bed i kabedo mogo painia pi tutunu bene gitiyo.
4. Yub ma kite dok pat me miyo caden i boma madito-ni kitimo nining?
4 Kit ma Kitiyo Kwede ki Yo Manyen Man: Jo ma ginywako i miyo caden i yo manyen man pol kare gikuro ni ngat mo obin cok ki meja ma guketo bukke i wiye. Ka ngat mo obino cok, gijole dok giwacce ni okwany buk ma cwinye mito. Ci painia dong gamo lapeny mo keken ma kipenyo kun tiyo ki Baibul. Ka ngat meno okwanyo bukkewa mo, ci painia pe kong tito bote yubwa me bolo mot me cente. Ento ka en openyo ni wanongo cente ki kwene pi tic man, ci kiromo nyute kit me cwalo mot i adrec ma kiketogi i nge bukkewa. Ka oporre kiromo penye ni: “Imito ni ngat mo olimi ki gang?” nyo “Tika ingeyo ni buk ma iyero-ni kiromo tic kwede me kwano Baibul kwedi labongo cul mo?”
5. Nywako i tic man tye ka kelo adwogi maber nining?
5 Nywako i tic man tye ka kelo adwogi maber atika. Luot mo acel gucoyo ni: “Cung ka nget meja kun waneno dano alip mapol ka kato nino ki nino, omiyo waniang tic madit ma kitye ka timone me o bot dano me loboni ducu. Neno lwak dano mapol ki tamo kit ma Jehovah paro kwede pi dano acel acel ocuko cwinywa mada me keto tic me tito pi kwena maber-ri bedo mukwongo i kwowa. Watamo ni Jehovah tye ka ngiyo cwiny dano acel acel ma kato mejawa-ni, kun yenyo anga mupore. Wawinyo bene ni watye cok mada ki lumalaika ma gitye ka tic kacel kwedwa.”
6. (a) Yub mukene manyen ango ma kitye ka temone i kacokke mapol, dok man pat ki yub me miyo caden i dye boma madito nining? (b) Kacokke mapol gitwero ribbe kacel ka gitye ka miyo caden i dye lwak nining?
6 Miyo Caden i Dye Lwak ma Kiyubo pi Wang Tic Moni: Medo i kom miyo caden i boma madito, pud dok luelda gitye ka temo yo mukene me tito kwena i wang ticgi. Ma lubbe ki yo manyen man, lutit kwena tiyo ki meja nyo gin mukene ma giryeyo bukke iye, kun gicung i kabedo ma dano mapol kato iye i wang tic pa kacokkegi. Yub man dok pat ki miyo caden i dye boma madito, ma lutit kwena ma gia ki i kacokke mapatpat ginywako kacel i timo tic meno, i kabedo ma dano mapol giwoto ki iye, ma nongo jang gang kal aye oyero.—Nen bok me “Ribbe Kacel Mitte.”
7. Ka opore, luelda gitwero keto yub pi miyo caden i dye lwak nining?
7 Luelda aye gibingiyo ka wang tic me kacokkegi tye ki kabedo ma dano mapol giwoto iye ki tyengi ci gineno ka oporre me miyo caden i yo man. Kabedo mupore pi keto meja romo bedo ka ma mutoka mapol cung iye, i dye bar, i gudi ka ma dano pol iye, i dukan madito, i univaciti, i bar dege, ki ka kwero nino madito mogo. Ber ka kiketo meja-ni i kabedo acel, i cawa ki nino moni ducu. Kityeko niang ni meja ma kiketo i nyim dukan madito, mapol ma gugure kacel kelo adwogi maber loyo ka kiketo i nyim dukan acel keken ka ma dano donyo iye pi tyen lok acel keken. Kabedo mukene calo yo ma dano mapol woto ki iye, twero bedo ber me keto meja matidi. Dong kityeko yubo fayil mabeco me nyuto Wi Lubele ki Awake! kacel ki buk me Baibul Pwonyo pi miyo caden i yo man, dok kitwero kwanyone ki i Kabedowa me Intanet. Painia ki lutit kwena ma kiyerogi me nywako i tic man myero gulub yo acel ma kimiyo bot jo ma gibinywako i miyo caden i boma madito, dok gulub tira pa lanen wi tic. Ka kimiyogi adrec mo pa dano ma pe bedo i wang ticgi, myero gupong fom me Please Follow Up (S-43) ci gumi bot karan me kacokkegi.
8. Ka wupe ki yub mo i kacokkewu me miyo caden i dye lwak, wuromo tic ki kare maber mene me miyo caden i yo man?
8 Ka Yub Aryo Magi me Miyo Caden i Dye Lwak pe Tiyo pi Kacokkewu: Kacokke mukene pe gitye ki kabedo mo i wang ticgi ma dano mapol kato ki iye wek kiti ki yo aryo magi me miyo caden. Kadi bed kumeno, lutit kwena me kacokke magi bene kicuko cwinygi me miyo caden i dye lwak. Tika wutye ki kabedo me biacara, gudi ma orye ki dukan mapol, nyo dukan mo malac ma kicato iye jami mapol i wang ticwu? Tika wutye ki bar nyo ka namo mo madit ma dano mapol gure iye? Tika tye kabedo mo ma kigurre iye pi kwero nino madito i wang ticwu? Ka ce tye, wuromo bedo ki kare me nywako i miyo caden i dye lwak.
9. Pingo myero watute me tito kwena bot dano ka mo keken ma ginonge iye?
9 Jehovah “mito laro jo ducu, dok mito ni jo ducu gunge lok me ada.” (1 Tem. 2:4) Pi meno, watye ka tute matek me tito kwena me Ker-ri bot dano mapol kit ma watwero ma peya agikki piny obino. (Mat. 24:14) I kabedo mapol tek mada me nongo dano gang. Ento watwero nongo kare me lok kwedgi ka gitye ka mapat ki gang calo i kabedo ma guro wi lwak mapol. Miyo caden i dye lwak romo bedo yo maber loyo pi jo mogo me winyo kwena maber-ri. Dong, omyero wacob ticwa me pwony kakare kun watito kwena maber-ri bot dano ka ma ginonge iye.—2 Tem. 4:5.
[Bok i pot karatac 5]
Ribbe Kacel Mitte
Kityeko niang ni lutit kwena me kacokke mapatpat ma wang ticgi tye cok, i kare mukene gitiyo i gudo acel, bar acel, kabedo me biacara acel nyo ka ito mutoka acel. Lutit kwena me kacokke mapatpat guweko magajin i opic acel, dok gumiyo caden i ka cato wil acel. Man owango cwiny lutim biacara ki jo ma bedo kenyo, kadi bed lutit kwena-ni gubino i cawa mapatpat. Pi meno, bedo ber ka watito kwena i wang tic ma kimiyo bot kacokkewa keken ka watye ka miyo caden i dye lwak.
Ka lutit kwena gimito tic i wang tic pa kacokke mukene, myero kong gupeny lanen wi tic me kacokkegi. Ci en bilok ki lanen wi tic me kacokke meno wek kinong twerone. Ka kacokke ma giloko leb mapatpat gitye ki yub me tic i kabedo acel, lunen wi ticgi myero gulok maber kun gimoko i kingi kit me tic labongo wango cwiny dano me kabedo meno. Ka wanote kacel i tiyo tic pa Jehovah, ci jami ducu bitimme “maber, dok kore ki kore.”—1 Kor. 14:40.
[Lok i kom cal i pot karatac 6]
[Lok i kom cal i pot karatac 6]