Nino ma Kite dok Pat me Cako Kwano Baibul ki Dano
1 Cakke i Januari, kacokke acel acel bikwanyo nino acel i tum cabit mo i dwe ki dwe pi tute me cako kwano Baibul ki dano, oromo bedo i tum cabit mukwongo. Twero bedo i Ceng Abicel nyo Cabit, mo keken ma rwatte ki kwo me kabedowu. Ka rwod ot pe oye yub me kwan-ni i nino meno, ci lutit kwena pud giromo miyo buk me Baibul Pwonyo nyo magajin manyen. Luelda ki lukony kor tic omyero guti matek i nino magi wek gukony lutit kwena me cako kwano Baibul ki dano.
2 Komitti ma Neno wi Tic i Kacokke bimoko tum cabit mene ma kibitic iye me cako kwano Baibul ki dano. Omyero kibed ka poyo wic kare ki kare wek lutit kwena guyubbe kun giketo tek me cako kwano Baibul ki dano i ot ki ot kacel ki limo jo ma kong gunyutu miti con.
3 Kit me Yubbe: Waromo nongo tam me cako kwano Baibul ki dano i pot karatac ma kiluto i Ticwa Me Ker me Januari 2006 ki i buk me Reasoning pot karatac 12. Jo mukene giromo yero me tic ki trak calo In Imito Ngeyo Lok Ada? Pot karatac 3 me Ticwa Me Ker me Agucito 2007 bene miyo tam i kom kit me cako kwano Baibul ki dano ma gigamo Magajinwa. Luelda ki lukony kor tic gibidoro cokke me wot i tic me pwony pi dakika 10 me o 15, dok i cawa meno omyero kinyam tam nyo kimi lapor acel nyo aryo ma konyo i kit me cako kwano Baibul ki dano.
4 Kono tye ni pe dano ducu gibiye kwano Baibul nyo medde ki kwangi pi kare malac. Man myero pe ogengwa, kit macalo Jehovah aye tye ka ywayo jo ma gitye calo romi i dulle-ni. (Jon 6:44) Ticwa pe obedo coyo kodi me ada keken ento kwako wa doyone ki yoro pii i tere bene, ma man tye iye kwano Baibul ki jo ma gitye ki cwiny me ada. Ka watimo meno, ci miyo wadoko lutic kacel ki Lubanga.—1 Kor. 3:9.