Wan Ducu Watwero Nywako i Tic me Loko Dano me Doko Lupwonnye Manyen
1 Nongo lapwony manyen pe bedo pi adwogi me tute pa ngat acel keken. Jehovah romo tic kacel ki ‘luticce’ ducu me konyo lutino kwan me Baibul wek gudong iyo me cwiny. (1 Kor. 3:6-9) Wan ducu ki acel acel watwero konyo jo manyen ki miyo lagam ma a ki i cwinywa i cokke pa Lukricitayo ki dok ber kitwa bene, ma meno nyutu ka maleng tic pa cwiny pa Lubanga i kwowa. (Jon 13:35; Gal. 5:22, 23; Ep. 4:22, 23) Ngo mukene ma waromo timone me konyo jo manyen?
2 Macalo Kacokke: Wan ducu watwero nyutu miti i kom jo ma pud gucako bino i cokke acaka ki kwanyo kare me motogi ki yomcwiny, boko lok kwedgi ma nongo peya cokke ocakke ki dok inge cokke. Laco mo ma obedo katamo pi binone tyen me acel i cokke, owacci: “Arwatte ki jo mapol ma gitye ki mar me ada, jo ma pe angeyogi, i nino acel keken ma loyo jo ma tye ki mar kumeno ma arwatte kwedgi i kanica ma adongo iye adonga cakke con. Otugi nen woko ka maleng ni atyeko nongo ada.” En onongo batija i nge dwe abiro keken cakke ma en ocit kwede i cokke tyen me acel-li.
3 Mi pwoc ma a ki i cwinyi bot latin kwan me Baibul kit ma nongo en woto ki dongo kwede i yo me cwiny. Nyo gwok en tye ka ciro aunauna? Tika en woto i cokke kare ducu? Dong en onongo tekcwiny me miyo lagam? Tika dong odonyo i Cukul me Tiokraci nyo ocako nywako i tic me pwony? Pwoye pi dongone. Man bimiye kero dok cuko cwinye.—Car. 25:11.
4 Calo Ngat ma Kwano Baibul ki Dano: Lutit kwena mogo gukonyo lutino kwangi me Baibul me ngeyo jo mogo me kacokke ki tero lutit kwena magi me bedo kwedgi i kare me kwangi. Ma peya otero kare, lwong latin kwanni me bino i cokke. Ka dong ocako bino i cokke, nen ni inyute bot jo me kacokke. En tika tye ka yelle me weko kit maraco calo mato taa-gu? Nyo ngat mo ma bedo i pacogi pe mito ni en okwan Baibul? En twero nongo tek cwiny ka oloko ki latit kwena mo ma nongo orwatte ki peko ma kit meno ci okato ki iye maber.—1 Pet. 5:9.
5 Jo manyen gimito kony i yo me cwiny ki bot kacokke. Wan ducu watwero konyogi me dongo ki nyutu miti i komgi.