‘Tit Lok pa Lubanga Labongo Lworo Mo’
1 In mono ilworo lok pi niye-ni i cukul nyo i gang ticci ka kare ononge? Nyo inongo ni miyo caden bot wadini, jirani-ni, nyo jo ma pe ingeyogi, i cawa ma pe iyubbe iye tek tutwal? Ngo ma romo konyo wan ducu me tic ki kare mo ma orwatte maber me ‘tito lok pa Lubanga labongo lworo mo’?—Pil. 1:14.
2 Pe ILing Woko pi Lworo: In iromo ling woko pi lworo ma pe icwako laremi mo ma cok kwedi nyo wati mo ma kitye ka coko lok goba i kome? Laremwa macok loyo, Jehovah, dong kiloko lok maracu i kome pi mwaki alip mapol ata. Watye ki mic madit atika me miyo caden pi Lubangawa madit man! (Ic. 43:10-12) Mar matut pi Jehovah twero konyowa pe me keto tamwa i lok ma dano loko i komwa nyo me bedo ki lworo, man miyo waloko ki tekcwiny, ento pe waling woko pi lworo miyo caden i kom lok me ada.—Tic 4:26, 29, 31.
3 Wi myero opo ni kwenawa-ni obedo kwena maber. Kwena man bikelo adwogi ma rii bot jo ma lubo. Ka wabedo ka tamo tyen lok ma miyo tic me pwony-nyi pire tek, ento pe bedo katamo i komwa kenwa nyo jo ma deg winyowa, ci bikonyowa me miyo pwony ki tekcwiny.
4 Lanen pa Jo Mukene: Waromo nongo kero ki i kom lanen pa jo ma lugen ma gubedo katito lok pa Lubanga labongo lworo. Me labolle, Enoka otito ki tekcwiny lok me ngolo kop pa Jehovah i kom lubalo ma pe gingeyo Lubanga. (Juda 14, 15) Nua obedo lagen i tito kwena bot jo ma pe gubedo luwiny. (Mat. 24:37-39) Lukricitayo me cencwari me acel ma onongo gubedo “jo mogo ata ma pe gupwonnye” gumedde ki tic me pwony kadi bed ni onongo kiunugi. (Tic 4:13, 18-20) Watchtower kacel ki Awake! pol kare tito pi kwo pa jo me kare-ni ma, pi bedo ki niye i kom Jehovah gulwenyo ki cwiny me lworo dano ci lacen gudoko jo ma tito kwena maber-ri ki mit kom.
5 Wanongo tekcwiny ki i kwano lok kom kwo pa jo ma con ma gubedo lugen ma gurwatte ki ayela yela matego. (1 Luker 19:2, 3; Mar. 14:66-71) Gin ‘gubedo ki tekcwiny ma Lubanga miyo’ ci guloko labongo lworo. Wan bene watwero timo kit meno!—1 Tec. 2:2.