Baibul Pwonyo—Obedo Bukwa ma Pire Tek me Kwano Baibul ki Dano
1 I Gure Madit me Distrik me “Winy Lubanga,” wabedo ki yomcwiny madit tutwal me nongo buk me Baibul Mono Ada Pwonyo Gin Ango?! Jo ma onongo gitye i gure man gubedo ki yomcwiny me gamo buk acel acel i agikki me yub me Ceng Abicel. Buk man manyen-ni kibitic kwede nining? Kiyubo buk man ni omyero wati kwede me kwano Baibul ki dano. Kadi bed ni buk man aye bibedo buk ma kibiterone bot dano i Marci, ento kicuko cwiny lutit kwena me cako tic kwede me cako kwano Baibul ki dano i kare-ni.
2 Jo ma Wakwano Baibul Kwedgi i Kare-ni: Lutit kwena ma gitye ka tic ki buk me Ngec nyo brocuwa me Mito me kwano Baibul ki dano omyero guti ki ryekogi me neno awene ki kit ma gitwero cako tic kwede ki buk man manyen-ni i kare me kwangi. Ka onongo pud wucako kwan acaka, ci wuromo cako kwano buk manyen-ni ki i acakkine. Ento ka onongo dong wukwano buk me Ngec wucito mabor, ci wuromo lokke i buk me Baibul Pwonyo i dul ma rwatte ki ka ma onongo wutye ka kwanone-ni. Ento kono, ka onongo dong wucok ki tyeko buk me Ngec, ci dong wuromo tyeko en aye.
3 Labongo akalakala mo, wan ducu wangeyo jo mapol ma giromo nongo kony ka wakwano kwedgi buk me Baibul Pwonyo. Pingo pe wacaku kwano Baibul kwedgi kun watiyo ki buk man? Me labolle, jo mogo ma onongo dong gutyeko kwano brocuwa me Mito nyo buk me Ngec ento pe gumedde nio wa i dyere ki nongo batija guromo bedo ki miti me cako kwano buk manyen-ni doki. Lunyodo giromo tic ki buk man me miyo ngec matir i kom miti pa Lubanga bot lutinogi.—Kol. 1:9, 10.
4 Kwano Buk me Aryone: Mono tye yub mo pi latin kwan me Baibul me kwano buk mukene doki i nge tyeko kwano Baibul Mono Ada Pwonyo Gin Ango? Tye. Ka ce onen ni latin kwan moni tye ka dongo, kadi bed mot mot, dok bene tye ka nyuto pwoc pi jami ma en tye ka kwanone-ni, wuromo medde ki kwano Baibul i buk me Wor Lubanga Acel me Ada. Watye ki gen ni buk me Baibul Pwonyo bibedo me kony madit tutwal botwa i ticwa me loko dano me doko jo ma lubo kor Yecu.—Mat. 28:19, 20.