Nyut Miti i Kom Dano—Ki Penyo Lapeny ki dok Winyo Lokgi
1 Pol pa dano gimito ni gimi tamgi, ento pe gimaro ka kibedo ka pwonyogi ki gin me atima nyo penyogi. Pi meno, wan macalo Lukricitayo omyero wabed ki diro me tic ki lapeny i yo ma romo golo tam ma tye i cwiny dano.—Car. 20:5.
2 Lapenywa omyero okonygi me tamo tam ento pe ma weko giwinyo marac. Omego mo acel ma onongo tye ka pwony i dog ot ki dog ot openyo ni, “In itamo ni kare mo bibino ma dano bitero dano luwotgi ki woro?” Ma lubbe ki lagam pa dano-ni, en dok omedo ni, “Itamo ni gin ango ma myero kitim wek man ocobbe kakare?” nyo ni, “Ngo mumiyo in itamo kumeno?” Ento omego mo mukene ma onongo tye ka miyo caden i kabedo mogo ma guru wi lwak mapol openyo jo ma gitye ki lutino ni, “Gin ango ma weko wunongo ni bedo lunyodo yomo cwinywu mada?” Ka dok openyo ni: “Gin ango ma wun dong wuparo matek loyo?” Niang kany maber ni lapeny magi miyo dano gibedo agonya me miyo tamgi ento pe weko giwinyo marac. Kit ma kwo pa dano tye mapat pat-ti, omyero wawek lokwa obed ma rwatte ki kwo me wang ticwa.
3 Golo Tam ma Tye i Cwiny Dano: Ka dano gitye ki miti me tito tamgi boti, winy lokgi labongo ngolo doggi atata. (Yak. 1:19) Nyut ni iniang tamgi. (Kol. 4:6) Itwero wacci, “Apwoyo titta lok man.” Mi botgi pwoc ki cwinyi ducu ka ce itwero. Penygi ki mwolo wek gutit kit ma nongo gitamo kwede dok pingo gitamo kumeno. Yeny gin ma wun ducu nongo wuye iye. Ka imito ni gukwan ginacoya mo, ci itwero wacci, “Tika onongo itamo ni man twere?” Pe ibed ka pyem apyema kwedgi.—2 Tem. 2:24, 25.
4 Kit ma dano gidok kwede i gin ma wapenyo romo bedo pi kit ma nongo wan waciko kwede itwa me winyo lokgi. Dano giniang woko oyot ka ce ada watye ka ciko itwa me winyo lokgi ki cwinywa ducu. Laneno mo acel owaco ni: “Ka inyuto bot dano ni itye ki cwiny me winyo tamgi, ci ywayogi cok i komi dok bene nyuto ni nongo itye ki miti i komgi.” Keto tamwa me winyo lok pa dano miyogi woro, dok man twero miyo botgi miti me winyo lok me kwena maber ma watito pire-ni.—Rom. 12:10.