Nyut Miti i Kom Dano—Ki Loko Kit me Pwonyi
1 Lakwena Paulo oweko lanen maber tutwal i loko kit yo me pwonyo lok me kwena maber-ri i yo ma rwatte ki kit kacel ki tam pa jo ma onongo giwinye. (1 Kor. 9:19-23) Wan bene omyero walubu lanen man. Waromo tam i kom kit ma omyero walub kwede tam ma kimiyo i Ticwa me Ker i kit me cako lok kun waweko bedo ma rwatte ki miti pa jo me wang ticwa. Ka wao cok ki doggola moni, ci watwero neno jami mogo ma oromo nyuto miti pa rwed ot, ka dong watiyo kwede me cako lokwa. Ento, tye yo mukene ma watwero tic kwede bene me loko kit ma omyero wapwony kwede.
2 Lok i Kom Gin ma Rwod Ot Oloko Iye: Ka watye ka tito lok me kwena maber-ri, pol kare watiyo ki lapeny ka dong wamiyo kare bot rwed ot me gamone. I yo ango ma in itero kwede lagamme? Nyo idok i iye ki cwiny manok adada ci imedde mere anyim ki lokki i kit ma nongo iyubo kwede con? Kece kit ma ibilok kwede binyuto ni itye ki miti i kom lagamgi? Ka ada inyuto miti i kom gin ma jo mukene waco boti, ci bikonyi me tic ki lapeny mogo i wi diro me ngeyo tamgi. (Car. 20:5) Meno weko iloko i kom jang lok me kwena me Ker-ri ma nongo rwatte ki miti pa ngat ma tye ka winyi-ni.
3 Man te lokke ni omyero wabed atera me lok i kom jami mapat ki ma nongo wayubbe iye-ni. Ka wacako lokwa ki jami ma wawinyo i lok angeya, ento rwed ot dok ocako lok i kom gin mo ma mako kom en, ci miti ma watye kwede me cobo miti pa rwed ot biweko waketo guti me pwonywa me Baibul i kom gin ma en nongo neno ni pire tek bote.—Pil. 2:4.
4 Kit me Dok i Tam pa Rwed Ot: Ka rwed ot openyo lapeny mo, bedo ber me dwogo adwoga me gamo lapeny meno i nino ma lacen inge kwano lok i kom lok meno. Watwero bene miye buk mo ma nongo loko i kom lapennye-ni matut. Magi ducu nyuto miti ma watye kwede me konyo jo mukene me ngeyo Jehovah.—2 Kor. 2:17.