Baibul Waco Gin Ango Madok i kom Miyo Mic?

Lagam ma Baibul miyo

Baibul cuko cwinywa me bedo atera me miyo mic, ki dok me timone pi tyen lok matir. Lok pa Lubanga nyuto ni miyo mic i yo ma kuman pe kelo yomcwiny bot ngat ma kimiyo bote-ni keken, ento bot lami mic bene. (Carolok 11:25; Luka 6:38) Yecu owacci: “Miyo mot kelo gum [yomcwiny] makato gamo agama.”—Tic pa Lukwena 20:35.

I yo ma nining ma watwero miyo mic i yo ma yomo cwiny Lubanga?

Yomo cwiny Lubanga ka wamiyo mic labongo dic mo. Baibul wacci “Dano acel acel myero otim kit macalo cwinye mito, labongo wang cwiny mo nyo dic mo. Pien Lubanga maro ngat ma miyo jamine ki yomcwiny.”—2 Jo Korint 9:7.

Miyo mic ma a ki i cwinywa obedo but woro me “dini” ma Lubanga cwako. (Yakobo 1:27) Ngat ma miyo kony bot jo ma gitye i peko nongo tye ka timo gin ma yomo cwiny Lubanga, dok Lubanga neno kony meno macalo banya ma myero En ocul. (Carolok 19:17) Baibul pwonyo ni Lubanga kikome biculo ngat ma miyo mic.—Luka 14:12-14.

I yo ma nining ma watwero miyo mic i yo ma pe yomo cwiny Lubanga?

Ka kimiyo mic meno pi tyen lok ma pe tye atir. Me labolle:

Me wakke.—Matayo 6:2.
Me nongo gin mo ki bot dano.—Luka 14:12-14.
Me nongo larre.—Jabuli 49:6, 7.

Ka cwako tim nyo kit mogo ma Lubanga deg. Me labolle, obedo gin marac me miyo ki ngat moni cente me tuko luguma, me tic ki yadi mogo calo jayi, nyo me mato kongo mukato kare woko. (1 Jo Korint 6:9, 10; 2 Jo Korint 7:1) I yo acel-li, pe porre me miyo cente ki ngat ma twero nongo cente pire kene ento pe mito tic.—2 Jo Tecalonika 3:10.

Ka weko ngat moni pe cobo tic ma Lubanga omiye me gwoko jo me ode. Baibul pwonyo ni luwi odi myero gumi jami ma mitte pi jo me odigi. (1 Temceo 5:8) Pe porre pi lawi ot me miyo jami mapol bot jo mukene kun jo me ode gipe ki jami ma mitte. I yo acel-li, Yecu ociko jo ma gukwero miyo jami ma mitte bot lunyodogi ma guteggi kun giwaco ni jamigi ducu obedo “gin [mic] ma gimiyo ki Lubanga.”—Marako 7:9-13.

Tyeng mogo me Baibul madok i kom miyo mic

Carolok 11:25: “Dano ma cwinye yom i miyo mot gimedo lonyo madwong bote, ngat ma konyo jo mukene en bene gibikonye.”

Te lokke: Miyo mic pe kelo adwogi maber bot ngat ma kimiyo bote-ni keken, ento lami mic bene nongo adwogi maber.

Carolok 19:17: “Ngat ma kica mako i kom lucan omiyo banya bot Rwot; pi meno Rwot bicule pi gin ma en otiyo.”

Te lokke: Lubanga nene kekene macalo labanya bot jo ma gikonyo lucan, dok en ocikke me culogi.

Matayo 6:2: “Ka ikonyo lucan pe ikut tum, macalo lugoba mogo gitimo . . . wek dano opakgi.”

Te lokke: Pe myero wami mic me ywayo tam pa dano i komwa.

Tic pa Lukwena 20:35: “Miyo mot kelo gum [yomcwiny] makato gamo agama.”

Te lokke: Miyo mic ki cwinywa ducu kelo yomcwiny.

2 Jo Korint 9:7: “Dano acel acel myero otim kit macalo cwinye mito, labongo wang cwiny mo nyo dic mo. Pien Lubanga maro ngat ma miyo jamine ki yomcwiny.”

Te lokke: Yomo cwiny Lubanga ka wamiyo mic labongo dic mo.