Tika Tye Gamente mo ma Genne ma Twero Loyo Lobo Ducu?—Gin Ango ma Baibul Waco?

Gamente ma i twok lobo lung gitye ka kato ki i alokaloka mapol ma kelo anywena nywena. Kadi wa i lobe ma nen calo gamentene ocung matek, pud inongo ni ripot me lewic i kom lucungo wibye, yer ma nongo ngat moni pe loyo atir atir, yoko wic i kin lucungo wibye, ki dong jemo ma opong ki tim gero gudo gamente magi i yo maraco.

Baibul nyuto ni tye gamente mo acel ma genne. Twero bedo ni dong iwinyo pi gamente meno. Gamente meno en aye ma Yecu Kricito oloko iye i lega pa Wonwa.

• “Dong wuleg kit man ni, ‘Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo.’”—Matayo 6:9, 10.

Gin ango ma Baibul waco i kom Ker meno?

Ker pa Lubanga obedo gamente ma genne

Ker man loyo ki i polo.

• Yecu olwongo gamente meno ni “Ker me polo.” (Matayo 4:17; 5:3, 10, 19, 20) Pi tyen lok meno, en owacci: “Kerra pe me lobo man.”—Jon 18:36.

Ker pa Lubanga bileyo kaka gamente pa dano.

• Baibul wacci: “Ker meno . . . bituro ker magi ducu [pa dano] ngidogi woko matitino, ci tyekogi woko ducu, en aye dong bicung bedo matwal.”—Daniel 2:44.

Ker man ma Kabakane aye Yecu Kricito, pe gibiturone matwal.

• Baibul wacci: “Locce aye loc ma bedo matwal, locce pe bigik, ki kerre bene pe gitwero turone.”—Daniel 7:13, 14.

Ker pa Lubanga bikelo kuc ki gwok maber i wi lobo ducu.

• Baibul wacci: “Ngat acel acel bibedo i te olokke ki i te odurone, pe tye ngat mo ma bimiyo gibedo lwor.”—Mika 4:4.

Nong ngec matut madok i kom Ker pa Lubanga

I kare ma Yecu tye i lobo, en otero cawa malac ka ‘tito lok me kwena maber i kom Ker pa Lubanga.’ (Matayo 9:35) En bene otito ni:

• “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”—Matayo 24:14.

I kare-ni, kitye ka tito lok me kwena maber madok i kom Ker pa Lubanga i lobe makato 240. Wacuko cwinyi me nongo ngec matut i kom gamente man ki kit ma locce twero keli kwede adwogi maber.

Nen vidio ma wiye tye ni Ker pa Lubanga Obedo Gin Ango?