Jo Mapol Gitye ka Bedo Kickic—Gin ma Baibul Waco

Ma lubbe ki kwed mo ma kitimo i twok lobo mapat pat,a kinongo ni ngat acel i kom dano angwen tye ka bedo kickic.

• “Ngat mo keken twero bedo kickic labongo paro mwakane nyo ka ma en bedo iye.”—Chido Mpemba, wonkom me dul me World Health Organization’s Commission on Social Connection.

Jo mapol gitamo ni jo mutii nyo jo ma gitye kengi aye gibedo kickic. Ento, wa jo matino, jo ma komgi yot, jo ma rwom me kwogi tye lamal, ki dong jo ma gunyomme bene gibedo kickic. Ngat ma pe ribbe ki jo mukene twero nongo peko me yotkom ki two wic.

• Daktar mo i lobo Amerika ma nyinge Vivek Murthy owaco ni “Bedo kickic pe kwako mere winyo marac keken ci otum, ento ngat ma pe ribbe ki jo mukene rom aroma ki ngat ma mato taa aparabic nino ki nino. Man miyo kare bedo kere bote me to oyotoyot.”

Gin ma Baibul waco

Lacwecwa pe mito ni wabed kenwa. Cakke wacon, yub pa Lubanga onongo tye ni dano gubed ki lurem mabeco ma keligi yomcwiny.

• Pwony me Baibul: “Rwot Lubanga owaco ni, ‘Pe ber dano obed kene.’”—Acakki 2:18.

Lubanga mito ni wabed ki wat macok kwede. En ocikke me nyikke cok kwedwa ka watute me nyikke cok kwede.—Yakobo 4:8.

• Pwony me Baibul: “Gitye ki gum jo ma gingeyo ni gin lucan i lok me cwiny, pien ker me polo megi.”—Matayo 5:3.

Lubanga mito ni wawore kacel ki jo mukene. Ka watimo meno, wabedo ki yomcwiny.

• Pwony me Baibul: “Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, . . . ento myero wacuku cwinywa kekenwa.”—Jo Ibru 10:24, 25.

Me niang tyen lok mukene mumiyo pire tek ni watute pe me bedo kickic, kwan pwony ma wiye tye ni “Loneliness in a World of Mass Connection.”