Lucungo Wibye Guwacci Armagedon Dong Cok—Gin Ango ma Baibul Waco?

I odiko me Ceng Baraja, i nino dwe 10 me Oktoba, 2022, Russia obolo bom i kabedo mapat pat i lobo Ukraine me culo kwor pi bom mo ma obalo pem ma kubo kin Crimea ki Russia. Jami magi otimme i nge kare mo manok ma lucungo wibye guwacci Armagedon dong odic woko.

• “I kare man aye dong kare kere loyo pi Armagedon me timme nicakke i kare pa [Preciden John F.] Kennedy, ma bwura me lweny obedo tye i kin Amerika ki Soviet Union. . . . Angeyo ni ka kitiyo ki bom me nuclear, ci wang ma oo i Armagedon.”—Preciden me lobo Amerika, Joe Biden, Oktoba 6, 2022.

• “Angeyo ni Armagedon dong cok, dok biketo kwo pa dano ducu ma i lobo-ni ka ma ding.”—Man aye gin ma Preciden me lobo Ukraine, Volodymyr Zelensky owaco i kare ma kipenye ngo ma bitimme ka kitiyo ki bom me nuclear, BBC News, Oktoba 8, 2022.

Ka lobe gutiyo ki bom me nuclear, ci tika bikelo Armagedon? Gin ango ma Baibul waco?

Tika bom me nuclear bikelo Armagedon?

Ku. Lok man ni “Armagedon” kicoyo kicel keken i Baibul i Niyabo 16:16. Armagedon pe obedo lweny i kin lobe, ento obedo lweny i kin Lubanga ki “luker me wi lobo ducu.” (Niyabo 16:14) Lubanga bitic ki lweny me Armagedon me giko loc pa dano.—Daniel 2:44.

Me niang kit ma Armagedon bigudo kwede lobo, kwan pwony man Lweny me Armagedon obedo ngo?

Tika bom me nuclear bijwero lobo man ki jo ducu ma gibedo iye?

Ku. Kadi bed luloc lobo guromo tic ki bom me nuclear i anyim, ento Lubanga pe biye ni kijwer lobo-ni. Baibul wacci:

• “Lobo bedo mere matwal.”—Latitlok 1:4.

• “Jo ma kitgi atir gibicamo lobo, dok gibibedo iye matwal.”—Jabuli 37:29.

Kadi bed kumeno, lok pa lunebi me Baibul ki dong jami ma tye ka timme i kare-ni nyuto ni cokcok-ki alokaloka madong bitimme i lobo. (Matayo 24:3-7; 2 Temceo 3:1-5) Nen gin ma Baibul waco i kom anyimwa i yub me kwano Baibul labongo cul mo.