Lweny ma i Ukraine Tye ka Medo Can Cam i Wi Lobo Ducu

I Mai 19, 2022, dul me United Nations Security Council gunongo ripot ki bot luticgi makato 75 ni “can cam ma obino macalo adwogi me two Korona ki dong peko me kot ki ceng tye ka balle medde ameda pi lweny ma i lobo Ukraine, dok man twero kelo kec i kabedo mukene.” Cutcut i nge meno, jo ma neno lok kom lonyo me lobo guwaco ni “medo i kom pekki ma dong tye i lobo, kec bimedde matek adada i twok lobo ducu pi lweny ma tye i Ukraine.” Baibul otito con ni peko me kec ma kit meno bibedo tye i karewa-ni, ento Baibul bene miniwa kony ma mitte me lweny ki pekki magi.

Baibul otito pi can cam

•  Yecu otito con ni: ‘Rok bilweny ki rok wadi, ki ker bene bilweny ki ker wadi, ki kec bene bipoto i lobo.’—Matayo 24:7.

•  Buk me Niyabo loko i kom lungwec ki aguragura angwen. Ngat acel ki i kin lungwec magi cung pi lweny. Langwec me aryo ma olubo kore cung pi kec, pien bibedo tek adada me nongo cam i kare meno dok dano bimedo wel cam marac adada. ‘Aneno aguragura macol; onongo ngat ma ringo kwede omako mijan i cinge. Lacen dok awinyo dwan mo ma owaco ni, “Ngano agwata acel welle ciling abic, cayiri agwata adek welle ciling abic!”’—Niyabo 6:5, 6.

Lok pa lunebi me Baibul ma loko i kom peko me kec tye ka cobbe i karewa-ni, ma en aye kare ma Baibul lwongo ni “kare me agikki.” (2 Temceo 3:1) Me nongo ngec mapol madok i kom kare me agikki, ki lungwec ki aguragura angwen ma kicoyo i buk me Niyabo, nen vidio ma wiye tye ni Lobo Olokke Woko Nicakke i Mwaka 1914, dok ikwan pwony ma wiye tye ni “Lungwec ki Aguragura Angwen-ni—Gubedo Angagi?”

Kit ma Baibul Twero Konyi Kwede

•  Baibul miyo tam ma twero konyowa me lweny ki pekki ma wakemme kwede, man kwako wa can cam ki dong medde pa wel cam. Nen labolle mogo i pwony ma wiye tye ni “Kit me Kwo ki Jami Manok.”

•  Baibul bene miniwa gen ni kwo biyubbe. Tito pi kare ma ‘cam bicek mabup i lobo’ dok dano ducu bibedo ki cam muromo. (Jabuli 72:16) Me nongo ngec mapol i kom gen ma Baibul miniwa pi anyim ki pingo itwero geno cikke meno, kwan pwony ma wiye tye ni “Gen pi Anyim Maber.”