MEDDE KI KIYU PINY!
Dini ki Lweny ma Tye ka Timme i Ukraine—Baibul Waco Ningo?
Nen kong lok man ma kwako lutela dini madongo ki lweny ma tye ka timme i Ukraine:
“Ladit wi Kanica me Russian Orthodox, Patriarch Kirill, peya owaco gin mo keken i kom lweny ma Russia ooto i kom Ukraine. . . . Kanicane tye ka medde ki kwango lok goba i kom Ukraine dok Putin otiyo ki lok goba meno me gengo ngeye pi lweny ma en ooto i kom Ukraine.”—EUobserver, March 7, 2022.
“Patriarch Kirill . . . ocwako lweny pa Russia i kom Ukraine kun waco ni lweny meno bene obedo lweny i kom bal.”—AP News, March 8, 2022.
“I Ceng Baraja, Ladit wi Kanica me Ukrainian Orthodox, Metropolitan Epiphanius I me Kyiv, ogoyo laane i kom jone me cito ka ‘lweny i kom lumony me Russia’ . . . En bene owaco ni neko lamony me Russia pe obedo bal.”—Jerusalem Post, March 16, 2022.
“Wan [Ukrainian Council of Churches and Religious Organizations (UCCRO)] wacwako lumony me Ukraine kacel ki jo ducu ma gitye ka lweny me gwokowa, wagoyo laawa i komgi dok watye ka medde ki lega pigi.”—Lok pa UCCROa February 24, 2022.
In itamo ningo? Dini magi giwacci gibedo lulub kor Yecu Kricito. Tika porre pigi me cuko cwiny romigi me cito ka lweny? Baibul waco ningo?
Kit ma Dini obedo ka rwako kwede wiye i lweny
Lok me tekwaro nyuto ni dul dini mapol gubedo ka cwako lweny kun giporo odenge ni gitye ka yelle me kelo kuc. Pi mwaki mapol, Lucaden pa Jehovah guyaro ka maleng goba pa dini magi. Nen kong labol magi ma okatti i bukkewa.
“The Crusades—A ‘Tragic Illusion’” nyuto kit ma dini pa Katoli oneko kwede jo mapol i nying Lubanga ki Kricito.
“Dini pa Katoli i Afrika” tito kit ma dini pe gugengo kwede lweny i kin kaki ki lweny me jwero kaki mogo.
Pwony mogo calo “Tika Omyero Kikok i kom Dini?,” “Kit ma Dini Orwako Kwede Wiye i Lweny,” ki dong “Dini Gicwako Lweny” otito kit ma Katoli, Orthodox, ki dong Protanti gucwako kwede jo ma onongo gitye ka lweny.
Tika porre pi dini ma gilwonge ni gin lulub kor Kricito me cwako lweny?
Gin ma Yecu opwonyo: “Mar lawoti macalo imarre keni.” (Matayo 22:39) “Wumar lukworwu.”—Matayo 5:44-47.
Tam kong: Tika dini mo twero waco ni gilubo cik pa Yecu me maro luwotgi, kun ki tungcel gicuko cwiny lumembagi me neko jo mukene i lweny? Me gamo lapeny meno, kwan pwony ma wiye tye ni “Lukricitayo me Ada ki Lweny” and “Tika Twere me Maro Lumoneni?”
Gin ma Yecu Owaco: “Kerra pe me lobo man. Kono kerra me lobo man, kono jona gulwenyo pira, wek pe gimiya i cing Lujudaya.” (Jon 18:36) “Jo ducu ma mako pala lucwan, gibinekogi bene ki pala lucwan.”—Matayo 26:47-52.
Tam kong: Ka Lukricitayo onongo myero pe gulweny me gwoko Yecu, ci tika porre pigi me lweny pi tyen lok mo mukene? Kwan Pwony ma wiye tye ni “Tika Lukricitayo Gitwero Donyo i Lweny?” me neno kit ma Lukricitayo macon gulubo kwede lanen ki pwony pa Yecu.
Ngo ma Bitimme i kom dini ma gicwako lweny?
Baibul nyuto ni Lubanga okwero dini ma giwacci gicung pi Yecu kun ki tungcel pe gilubo pwonye.—Matayo 7:21-23; Tito 1:16.
Buk me Niyabo nyuto ni Lubanga bingolo kop i wi dini magi pi “remo pa jo ducu ma yam ginekogi i lobo.” (Niyabo 18:21, 24) Me niang pingo, kwan pwony ma wiye tye ni “Babilon Madit Obedo Ngo?”
Yecu owaco ni dini ducu ma Lubanga okwero gibityekogi woko pi timgi maraco, kit macalo yadi ducu ma pe nyako nyig mabeco “gitongo ci gibolo woko i mac.” (Matayo 7:15-20) Kwan pwony ma wiye tye ni “Agikki me Dini Goba Dong Cok!” me niang kit ma man bitimme kwede.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a UCCRO, nyo Ukrainian Council of Churches and Religious Organizations, tye ki dini 15 ma gicung pi Orthodox, Katoli me Greek ki Roma, Protanti, ki dong Morokole, kacel ki Lujudaya ki Cilam.