Jehovah Maro Jo ma ‘Ginyako Nyiggi kun Gidiyo Cwinygi’

1, 2. (a) Pingo lanen pa omege ki lumege ma gimedde ki tito kwena i wang tic ma dano pe giwinyo lokgi cuko cwinywa adada? (Nen cal ma tye i pot karatac man.) (b) Ngo ma Yecu owaco i kom tito kwena “i lobo tugi”? (Nen lok ma tye i tere piny.)

SERGIO KI DAKONE OLINDA gitye painia i lobo Amerika. Gin ducu gitye ki mwaka 80 ki wiye. Macok cok-ki, tyengi malit-ti oweko odoko tek botgi me wot. Ento, kit macalo gubedo ka timo kwede con, pud gia odiko cawa acel me cito i taun ka ma bac cung iye. Gibedo ka ma bac cung iye ci gimiyo bukewa bot dano ma nongo gitye ka kato. Pol pa dano pe giketo tamgi i komgi, ento Sergio gin ki Olinda gimedde ki bedo kakargi kun gibwunyo ki jo ma loko wanggi botgi. Ka cawa abicel oromo, gicako wot motmot me dok gang. Dok ka piny oruu, gicako wot cawa acel me cito ka ma bac cung iye. Gibedo ka tito kwena kit meno pi nino abicel cabit ducu, mwaka ki mwaka.

² Calo Sergio gin ki Olinda, tye omege ki lumege mapol ma dong gutito kwena i wang tic ka ma gibedo iye pi mwaki mapol, kadi bed pol pa dano pe giwinyo lokgi. Oromo bedo ni in bene itito kwena i wang tic ma kit meno. Ka tye kit meno, ci wapwoyi matek pien idiyo cwinyi me medde ki tito kwena kadi bed ni pe yot.a (Nen lok ma tye i tere piny.) Lanenni cuko cwiny omege ki lumege mapol, kadi wa jo ma dong gutiyo pi Jehovah pi mwaki mapol. Nen kong gin ma luneno me adwol mogo guwaco: “Ka atiyo kacel ki omege ki lumege ma lugen magi i tito kwena, lanengi jingo cwinya matek.” “Gwoko gennegi cuko cwinya me medde ki tito kwena ki tekcwiny.” “Lanengi yomo cwinya adada.”

3. Lapeny adek mene ma wabinyamone, dok pingo?

³ I pwony man wabigamo lapeny adek: Pingo i kine mukene cwinywa tur? Nyako nyig tyen lokke ngo? Ngo ma bikonyowa me medde ki nyako nyig kun wadiyo cwinywa? Ngeyo lagam me lapeny magi bicuko cwinywa me medde ki tic me tito kwena ma Yecu omiyowa-ni.

PINGO I KINE MUKENE CWINYWA TWERO TUR?

4. (a) Paulo owinyo nining pi kit ma Lujudaya gudok kwede i kom kwena maber? (b) Pingo Paulo owinyo kit meno?

⁴ Tika nino mo dong cwinyi otur pien ni dano ma i wang ticwu pe gimito winyo kwena me Ker-ri? Ka tye kumeno, ci ibiniang kit ma lakwena Paulo owinyo kwede. En otito kwena pi mwaki ma romo 30 kulu, dok okonyo jo mapol me doko Lukricitayo. (Tic pa Lukwena 14:21; 2 Jo Korint 3:2, 3) Kadi bed kit meno, pe otwere bote me konyo Lujudaya mapol me doko Lukricitayo. Ma ka meno, polgi gukwero winyo lok pa Paulo, dok mukene bene guketo aunauna magwar i kome. (Tic pa Lukwena 14:19; 17:1, 4, 5, 13) Paulo owinyo nining pi jami maraco magi? En owaco ni: “Atye ki cwercwiny madit kun cwinya rem mada ma pe jukke.” (Jo Roma 9:1-3) Pingo en owinyo kit meno? Pien en onongo maro tito kwena dok maro dano bene. Paulo onongo paro pi Lujudaya adada dok cwinye ocwer i kare ma gukwero kica pa Lubanga.

5. (a) Ngo ma tugo cwinywa me tito kwena? (b) Pingo cwinywa twero tur i kare mogo?

⁵ Calo Paulo, wan bene watito kwena bot dano pien waparo pigi dok wamito konyogi. (Matayo 22:39; 1 Jo Korint 11:1) Wangeyo ki i jami mutimme i kwowa ni tic pi Jehovah aye yo me kwo ma pud dong ber loyo. Dok wamito konyo jo mukene wek gunen kit ma kwogi biyubbe kwede ka gutiyo pi Jehovah! Meno aye gin mumiyo wabedo ka cuko cwinygi me pwonyo lok ada i kom Jehovah kacel ki yubbe pi dano. Bedo calo watye ka miyo botgi mic mo mamwonya kun wabako dogwa ni: ‘Gam mic man ba.’ Dong ka gukwero, ngene kene ni wabiwinyo ‘arem cwiny,’ kit ma Paulo owinyo kwede. Wawinyo arem man, pe ni pien wape ki niye, ento pien wamaro dano adada. Dong kadi bed cwinywa tur i kare mogo, pud wamedde ki tito kwena. Oromo bedo ni wan bene waye lok pa Elena, ma dong otiyo macalo painia pi mwaki makato 25. En owaco ni: “Anongo ni tito kwena pe yot. Kadi bed kit meno, man aye tic ma amaro timone loyo.”

NYAKO NYIG TYEN LOKKE NGO?

6. Lapeny mene ma wabigamo kombeddi-ni?

⁶ Pingo watwero bedo ki gen ni ticwa me pwony yomo cwiny Jehovah, kadi bed dano me wang ticwa pe gijolo lokwa? Me gamo lapeny ma pire tek meno, kong wanyamu lapor pa Yecu aryo ma loko i kom “nyako nyig.” (Matayo 13:23) Lapor me acel tye i kom olok.

7. (a) I lapor pa Yecu, anga ma obedo “lapur,” “olok,” ki “jange”? (b) Lapeny mene ma mitte ni myero wanong lagamme?

⁷ Kwan Jon 15:1-5, 8. I lapor man, Yecu otito ni Jehovah obedo “lapur,” Yecu kikome aye “olok,” dok lupwonnyene aye “jange.”b (Nen lok ma tye i tere piny.) I nge meno Yecu owaco bot lukwenane ni: “Man bikelo deyo i kom Abana, ka wunyako nyig mapol; kit meno wubidoko lupwonnyena.” Dong, nyako nyig tyen lokke ngo? I lapor man, Yecu pe owaco ngo kikome ma nyig olok cung pire, ento en owaco gin mo ma twero konyowa me nongo lagam pi lapeny meno.

8. (a) I lapor pa Yecu-ni, pingo “nyako nyig” pe cung pi loko dano me doko lulub kor Kricito? (b) Ngo ma Jehovah pe romo diyowa ni watim?

⁸ Yecu oloko i kom Wonne ni: ‘Jange ducu ma pe nyak en lwero woko.’ Me ketone macek, watwero bedo lutic pa Jehovah keken ka wanyako nyig. (Matayo 13:23; 21:43) Dong i lapor man, nyako nyig pe cung pi loko dano me doko lulub kor Kricito. (Matayo 28:19) Ka onongo tye kit meno, kono Lucaden ma lugen ma peya gukonyo dano mo me doko lalub kor Yecu onongo gibibedo calo jang olok ma pe nyako nyige. Ento meno pe tye ada! Pingo? Pien wan pe watwero diyo dano me doko lulub kor Kricito. Dok Jehovah bene lamar. En pe diyowa ni watim gin ma pe watwero. En kwayowa ni watim gin ma watwero keken.​—Nwoyo Cik 30:11-14.

9. (a) Wanyako nyig nining? (b) Carolok ango ma wabinyamone?

⁹ Dong, nyako nyig tyen lokke ngo? Myero obed gin mo ma wan ducu watwero timone. Tic ango ma Jehovah omiyo bot luticce ducu? Tito lok me kwena maber me Ker pa Lubanga.c (Nen lok ma tye i tere piny.) (Matayo 24:14) Carolok pa Yecu i kom laco kodi nyuto man ka maleng. Kong dong wanyamu carolok meno.

10. (a) I carolok pa Yecu-ni, ngo ma kodi ki ngom cung pire? (b) Gin ango ma tyen kal ma odongo nyako?

¹⁰ Kwan Luka 8:5-8, 11-15. I carolokke i kom laco kodi, Yecu otito ni kodi aye “lok pa Lubanga,” nyo kwena me Ker pa Lubanga. Ngom cung pi cwiny dano. Kodi ma opoto i ngom maber otwi ci odongo maber. Lacen, onyak “ma dodo tyen miya.” Ket ni onongo ipito kal, ci kal meno ka odongo binyako ngo? Tyen kal matino tino? Pe, binyako nyig kal, ma lacen ka kipito twi ci doko tyen kal. I carolok man, kodi acel onyako nyig kal 100. Man pwonyowa gin ango i kom ticwa me pwony?

11. (a) Carolok i kom laco kodi pwonyowa gin ango i kom ticwa me pwony? (b) Wanyako nyig kodi manyen nining?

¹¹ I kare ma lunyodowa nyo Lucaden mukene gupwonyowa lok i kom Ker pa Lubanga pi tyen mukwongo, obedo calo gupito kodi i ngom maber. Cwinygi obedo yom mada i kare ma guneno ni wajolo kwena maber. Kodi meno omedde ki dongo nio ka onyako nyige. Dok kit macalo tyen kal ma waloko iye-ni pe nyako tyen kal matino ento nyig kal, wan bene pe wanyako lupwonnye manyen, ento nyig kodi manyen.d (Nen lok ma tye i tere piny.) Watimo meno nining? Kare ducu ka watito lok me kwena maber bot jo mukene, bedo calo watye ka nyayo ki coyo kodi ma kipito i cwinywa-ni. (Luka 6:45; 8:1) Teke wamedde ki tito kwena me Ker pa Lubanga, nongo watye ka ‘nyako nyigwa kun wadiyo cwinywa.’

12. (a) Pwony ango ma wanongo ki i carolok pa Yecu i kom olok ki laco kodi? (b) Meno miyo iwinyo nining?

¹² Pwony ango ma wanongo ki i carolok pa Yecu i kom olok ki laco kodi? Wapwonyo ni ‘nyako nyig’ pe cung i kom kit ma dano gijolo kwede kwenawa. Ento jenge i kom tutewa me medde ki tito kwena. Paulo owaco gin ma rom ki meno i kare ma en ocoyo ni: ‘Ngat acel acel binongo mucarane muporo tic ma en otiyo.’ (1 Jo Korint 3:8) Jehovah biculowa pi ticwa, ento pe pi adwogi me ticwa. Matilda, ma dong otiyo macalo painia pi mwaki 20 owaco ni, “Anongo yomcwiny madit me ngeyo ni Jehovah culowa pi tutewa.”

WATWERO NYAKO NYIGWA KUN WADIYO CWINYWA NINING?

13, 14. Ma lubbe ki Jo Roma 10:1, 2, tyen lok mene ma omiyo Paulo pe ojuko tito kwena?

¹³ Ngo ma bikonyowa me ‘nyako nyigwa kun wadiyo cwinywa’? Kong dok wangiyu labol pa Paulo-ni. Wangeyo ni cwiny Paulo otur pien Lujudaya gukwero kwena me Ker-ri. Ento, Paulo pe ojuko tito kwena botgi. En otito kit ma ewinyo kwede i kom Lujudaya magi i kare ma owaco ni: “Gin ma amito ki cwinya ducu ma alego Lubanga pire, en aye ni myero jo Icrael gularre. An abedo cadengi kun angeyo ni gumoko matek i kom Lubanga, ento kadi bed gumoko, ci pe gucungo i ngec kikome.” (Jo Roma 10:1, 2) Dong pingo Paulo omedde ki tito kwena?

¹⁴ Me acel, Paulo owaco ni etito kwena bot Lujudaya pien ni meno aye gin ma onongo ‘cwinye mito.’ En onongo mito adada ni gularre. (Jo Roma 11:13, 14) Me aryone, en owaco ni ‘elego Lubanga pigi.’ Paulo olego Jehovah ni okony jo mogo ki i kin Lujudaya me jolo kwena maber me Ker-ri. Me adek, Paulo owaco ni: “Gumoko matek i kom Lubanga.” Paulo pe obedo ka neno goro pa dano, ento oneno miti ma gitye kwede me tic pi Jehovah. En ongeyo ni Lujudaya ma komgi mit-ti gitwero doko lulub kor Kricito ma komgi mit, calo en.

15. Watwero lubo lanen pa Paulo nining? Mi labol mogo.

¹⁵ Watwero lubo lanen pa Paulo nining? Mukwongo, myero wabed ki miti me yenyo ‘jo ma myero me nongo kwo ma pe tum.’ Me aryo, myero wakwa Jehovah wek okony jo ma gitye ki miti me winyo kwena ma watito botgi. (Tic pa Lukwena 13:48; 16:14) Meno aye gin ma laminwa Silvana, ma dong otiyo macalo painia cokcok pi mwaki 30 otimo. En owaco ni, “Ma peya acito i gang mo i wang ticwa, alego bot Jehovah, kun akwaye ni omi abed ki neno mupore.” Wan bene walego ni lumalaika gukonywa me nongo dano ma gimito winyo lokwa. (Matayo 10:11-13; Niyabo 14:6) Robert, ma dong otiyo macalo painia pi mwaki makato 30 kulu, owaco ni, “Tic kacel ki lumalaika mit mada, pien gingeyo gin ma tye ka timme i kwo pa dano ma watito kwena botgi.” Me adek, watemme pe me neno goro pa dano ento waneno mitigi me tic pi Jehovah. Carl, laelda ma onongo batija mwaki makato 50 angec, owaco ni, “Ayenyo gin mo matidi ma twero nyuto ni ngat moni tye ki miti, calo ka obwunyo, wange nyuto kica, nyo penyo lapeny ki miti me niang.” Ka watimo jami magi, ci watwero ‘nyako nyig kun wadiyo cwinywa,’ kit ma Paulo otimo.

“PE IJUK CINGI KA TIC”

16, 17. (a) Pwony ango ma wanongo ki i Latitlok 11:6? (b) Ticwa me tito kwena gudo dano ma ginenowa nining?

¹⁶ Wiwa myero pe owil i kom kit ma ticwa me tito kwena gudo kwede dano, kadi bed nen calo pe giwinyo lokwa. (Kwan Latitlok 11:6.) Dano gibedo ka nenowa. Gineno ni wan warukke maleng, ni kitwa ber, dok wanyuto cwiny me lirem. Man romo gudo cwinygi, dok i nge kare mo, kadi wa jo ma onongo gitamo marac i komwa giromo loko tamgi. Man aye gin mutimme i kom Sergio gin ki Olinda.

¹⁷ Sergio owaco ni: “I kare mo ma komwa obedo lit, pe wabedo ka cito ka ma bac cung iye-ni. Ma wadwogo, jo ma gikato kenyu gubedo ka penyowa ni, ‘Gin ango mutimme? Wukanne ba!’” Olinda omedo wi lok pa cware kun bwunyo: “Ludwo bac guilo cinggi ka motowa dok mukene gudange ki i bacgi ni, ‘Wapwoyo dwogo!’ Mogo bene gupenyo pi magajinwa.” Sergio gin ki Olinda gubedo ki ur i kare ma laco mo obino ka ma gibedo iye ki lalor bukke, omiyo botgi ature, ci opwoyogi pi ticgi.

18. Pingo imoko tammi me medde ki ‘nyako nyig kun idiyo cwinyi’?

¹⁸ Ka pe ‘ijuko cingi’ ka tito kwena me Ker pa Lubanga, ci nongo ikonyo me miyo “caden bot rok ducu.” (Matayo 24:14) Ma dong ber loyo, ibibedo ki yomcwiny madit me ngeyo ni itye ka yomo cwiny Jehovah. En maro jo ducu ma ‘ginyako nyiggi kun gidiyo cwinygi!’