Lapeny pa Lukwan Bukkewa
Awene ma tic me tito kwena maber-ri bigik iye?
Yecu owaco ni: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Mat. 24:14) Nyig lok me leb Grik ma kigonyo ni “agikki piny” i tyeng man ki dok i tyeng me 6 loko i kom agikki me lobo pa Catan i lweny me Armagedon. (Yabo 16:14, 16) Pi meno, wabimedde ki tito lok me kwena maber nio wang ma lweny me Armagedon dong cok cakke. Man loko niangowa macon.
Con onongo waye ni wabigiko tic me tito kwena woko ka twon can madit atika-ni ocakke ki jwero Babilon Madit. (Yabo 17:3, 5, 15, 16) Dok bene onongo waye ni ka twon can madit atika-ni ocakke, Jehovah pe dong bimiyo kare bot dano me jolo kwena maber-ri. (Ic. 61:2) Onongo bene watamo ni jo ma gibibwot ki i twon can madit atika-ni gibibedo jo ma gunyuto gennegi bot Jehovah ma peya twon can meno ocakke. Onongo waporogi ki Lujudaya ma gubwot i kare ma kijwero Jerucalem i mwaka 607 K.M.P. Lujudaya magi onongo kiketo lanyut i tur nyimgi pien giworo Jehovah dok gidag tim maraco. (Ejek. 5:11; 9:4) Ento lapor meno pe rwatte ki lok pa Yecu ma kicoyo i Matayo 24:14, ma nyuto ni dano pud bibedo ki kare me jolo kwena maber-ri nio wa i kare ma nongo Armagedon dong cok cakke.
Pien watye ki niango manyen i kom Matayo 24:14, mitte bene ni walok niangowa i kom Niyabo 16:21 ma loko i kom pee mapek ma ocorre i kom dano. Kwed mukene ma kitimo nyuto ni wang ginacoya aryo magi gikubbe macok. I yo ma nining? Gin ma konyowa me niang lok man aye gin ma Baibul tito i kom kit ma dano bijolo kwede kwena me Ker-ri. Lakwena Paulo ocoyo ni, bot “jo ma tye i yo me larre,” kwenawa obedo kwena maber, nyo “gin makwo ma kelo kwo.” Ento ki bot lumone pa Lubanga, obedo kwena marac, nyo “gin muto ma kelo to.” (2 Kor. 2:15, 16) Gidag kwena me Ker-ri pien nyuto ka maleng ni lobo ma gimaro-ni rac, Catan aye loyo, dok macok cok-ki kibijwerone woko.—Jon 7:7; 1 Jon 2:17; 5:19.
Nge bene ni, pee ma kiloko iye i Niyabo 16:21 bibedo “rac ma okato kare” woko. Man twero nyuto ni, i kare me twon can madit atika-ni, kwena ma watito bibedo magwar dok bio bot dano mapol makato kare mo keken. Macalo adwogine, dano mapol bingeyo nying Jehovah. (Ejek. 39:7) I kare meno ma nongo dong Babilon Madit kijwero woko, tika jo mukene gibimaro kwena ma wabitito, kit ma gimaro kwede gin mo ma ngwecce kur? Meno twero timme. Gwok nyo wigi bipo nyo gibipwonyo ni pi mwaki mapol, Lucaden pa Jehovah onongo gubedo ka tito ni kibijwero Babilon Madit. Pi meno, gibiye cobbe pa lok meno i nge nenone ki wanggi.
Man rom aroma ki gin mutimme i lobo Ejipt i nge Gemo Apar-ri. I ngeye ma Jehovah ‘ongolo kop i kom lubange ducu pa jo Ejipt,’ “lwak kwa rok murubbe” guribbe kacel ki jo Icrael. (Nia 12:12, 37, 38) Lurok magi nen calo guyero me cito kacel ki jo pa Jehovah i kare ma guneno ni jami ducu ma Moses owaco i kom Gemo Apar-ri ocobbe kakare.
Ngat mo keken ma olokke bot Jehovah i nge jwero Babilon Madit bibedo ki kare me cwako omegi Kricito ma nongo pud gitye i lobo. (Mat. 25:34-36, 40) Ngene kene ni, kare meno ma dano pud gitwero yero me bedo romi, bigik woko ma peya lweny me Armagedon ocakke ka dong kitero udong jo ma kiwirogi ducu i polo.
Niango manyen man nyuto mar kacel ki kica madit ma Jehovah tye kwede. Ada, “en pe mito ni ngat mo orweny woko matwal, ento mito ni jo ducu guo i ningut.”—2 Pet. 3:9.