Tika Pwony Mayot me Baibul Twero Konyi wa i Kare-ni?

1. Jami mayot ma ipwonyo i kare ma icako kwano Baibul acaka ogudi nining?

JAMI ma wapwonyo i kare ma pud wacako kwano Baibul acaka oloko kwowa. Me labolle, i kare ma wapwonyo ni nying Lubanga obedo Jehovah, wat i kinwa kwede ocako dongo. (Ic. 42:8) I kare ma wapwonyo gin ma timme i kom jo muto, wagiko bedo ki par kace jowa me amara ma guto gitye ka deno can. (Latit. 9:10) Dok i kare ma wapwonyo lok i kom cikke pa Lubanga pi Paradic i lobo kany, wagiko bedo ki par pi kit ma anyimwa bibedo kwede. Wacako bedo ki gen ni pe wabikwo pi mwaki 70 nyo 80 keken, ento wabibedo kwo pi naka.—Jab. 37:29; 90:10.

2. Lok ma kicoyo i 2 Petero 1:​12, 13 nyuto nining ni kadi wa Lukricitayo muteggi pud gitwero nongo adwogi maber ki i pwony mayot me Baibul?

² Wiwa omyero pe owil i kom kit ma jami mayot ma wakwongo pwonyone ki i Baibul pigi tek kwede. Lakwena Petero ocoyo waragane me aryo bot Lukricitayo muteggi ma onongo ‘gumako matek liking lok me ada.’ (Kwan 2 Petero 1:​12, 13.) Ento i kare meno, onongo tye jo maraco i kacokke ma onongo gimito rwenyo utmege woko ki i ada. (2 Pet. 2:​1-3) Petero onongo tye ki miti me jingo niye pa omege ki lumege magi wek gucung matek me kwero goba ma kitye ka pwonyone. Pi meno, en opoyo wigi i kom jami mogo ma onongo dong gupwonyo. Jami magi onongo bikonyogi me gwoko gennegi nio wa i agikki.

3. Mi lapor ma nyuto pingo Lukricitayo omyero gumedde ki lwodo lok i kom pwony mayot me Baibul.

³ Kadi bed dong warii i ada pi mwaki mapol, pud watwero nongo adwogi mabeco ki i pwony mayot me Baibul. Nen kong lapor man: Mego mo ma ngeyo tedo maber adada kacel ki nyare matidi gitwero tic ki jami marom aroma me tedo dek boo mamit. Ento pi ngec ma mego-ni tye kwede, en twero tic ki jami tedo magi me tedo dek boo mamit i yo mapatpat ma loyo nyare. I yo acel-lu, wan ma dong watiyo pi Jehovah pi mwaki mapol watwero nongo pwony mapatpat ki i wang ginacoya acel-li makato ngat ma pud ocako kwano Baibul nyen. Twero bedo ni kwowa kacel ki mot me tic ma watye kwede i dul pa Jehovah olokke nicakke ma wanongo batija. Ento ka wamedde ki lwodo jami ma wapwonyogi ki i Baibul i kare ma okato angec, man miniwa kare me neno yo mapatpat ma watwero keto kwede pwony magi i tic i kwowa me kare-ni. Kong dong wanenu gin ma Lukricitayo muteggi gitwero pwonyone ki i pwony adek mayot ma tye i Baibul.

JEHOVAH AYE OBEDO LACWEC

4. Pwonyo ni Jehovah aye obedo Lacwec ogudi nining?

⁴ Wangeyo ni Lacwec maryek dok matek aye ocweyo lobo kacel ki jami ducu ma tye iye. Baibul waco ni: “Ngat ma gero jami ducu en aye Lubanga.” (Ibru 3:4) Tye jami mapol ma watwero pwonyone ki i lok ada man. Pien Jehovah aye ma ocweyowa, en ngeyo jami ducu madok i komwa. En bene paro piwa dok ngeyo gin maber loyo piwa. Pi meno, ngeyo ni Jehovah aye obedo Lacwec ogudo kwowa i yo mapol dok oweko watye ki tyen lok me bedo kwo.

5. Lok ada mene ma twero konyowa me dongo cwiny me mwolo? (Icaya 45:​9-12)

⁵ Ngeyo ni Jehovah aye obedo Lacwec pwonyowa me bedo jo mamwol. Me labolle, Yubu owaco lok mogo ma pe tye atir i kom Jehovah. Wiye bene owil woko i kom gin ma pire tek loyo dok obedo ka paro pire kene kun tute me nyuto ki Lubanga ni en kite atir. Ento Jehovah opoyo wi Yubu ni En aye ebedo Lacwec. (Yubu 38:​1-4) Man okonyo Yubu me niang ni, macalo Lacwecce, jami ducu ma Jehovah timo tye atir. Lanebi Icaya bene ocoyo ni dano myero pe gutam ni gin giryek giloyo Lacwec.—Kwan Icaya 45:​9-12.

6. I kare mene ma twero mitte ni watam matut i kom ryeko ki teko pa Lacwecwa? (Nen bene cal.)

⁶ Ka ngat mo dong otiyo pi Jehovah pi mwaki mapol, en twero cako jenge i kom tamme kene me ka yenyo tira ki bot Jehovah kacel ki Lokke. (Yubu 37:​23, 24) Dong, ka Lakricitayo lwodo lok i kom Jehovah kacel ki kit ma En ryek dok tek kwede, man twero konye nining? (Ic. 40:22; 55:​8, 9) Lok ada man bikonye me niang ni tam pa Jehovah aye tye atir dok man bimiyo en medde ki bedo mwol.

7. Gin ango ma Rahela otimo me konye jolo alokaloka ma dulwa otimo?

⁷ Laminwa Rahela, ma bedo i lobo Slovenia, onongo ni bedo ka lwodo lok i kom Lacwec okonye me jolo alokaloka ma dulwa timo. En owaco ni: “I kare mogo, pe obedo yot bota me jolo tam ma jo ma gidoro dulwa gumoko. Me labolle, kadi wa i nge neno Lok Angeya me Aboro Mua ki Bot Lukiko Madit pi 2023, pud abedo ki ur madit me neno ka omego ma tye ki yer tike tye ka miyo pwony. Pi meno, alego bot Jehovah wek okonya ajol alokaloka meno.” Rahela oniang ni, macalo Lacwe polo ki lobo, Jehovah aye ma ngeyo yo maber loyo me doro dulle. Ka inongo ni tek me jolo niango manyen nyo alokaloka pa dulwa, ci kwany kare me bedo ka lwodo ryeko ki teko ma Lacwecwa tye kwede.—Rom. 11:​33-36.

TYEN LOK MA OMIYO LUBANGA OYE NI DANO ODEN CAN

8. Ngeyo tyen lok ma oweko Lubanga peya ogiko pekki okonyi nining?

⁸ Pingo Lubanga oye ni dano guden can? Jo mogo ma pe gunongo lagam pi lapeny meno gitye ki kiniga madwong i kom Lubanga nyo bene giwaco ni Lubanga pe! (Car. 19:3) Ento in ipwonyo ni bal alaka kacel ki roc aye oweko wadeno can ento pe Lubanga Jehovah. Ipwonyo bene ni pien Jehovah diyo cwinye dok pud peya ogiko pekki, dano milion mapol pud gitwero pwonyo lok i kome kacel ki kit ma en bigiko kwede pekki magi. (2 Pet. 3:​9, 15) Lok ada magi ocuko cwinyi dok okonyi me nyiko cok ki Jehovah.

9. I kare mene ma twero mitte ni ilwod matut tyen lok ma oweko Jehovah oye ni dano guden can?

⁹ Mitte ni wadi cwinywa ka wawoto ki kuro kare ma Jehovah bigiko iye pekki i lobo. Ento ka ngat mo ma wamaro oto, ka wan kikomwa nyo jo me gangwa gukemme ki pekki nyo kiterogi marac, cwinywa twero cwer pien nongo wawinyo ni Jehovah tye ka galle ki jwayo pekki. (Ibru 1:​2, 3) Ka wawinyo kit meno, ci pire tek ni walwod tyen lok ma oweko Jehovah ye ni waden can.a (Jab. 34:19) Itwero bene lwodo yub ma en oketo me jwayo pekki woko pi naka.

10. Gin ango ma okonyo laminwa Anne me lweny ki cola me to pa minne?

¹⁰ Ngeyo pingo Lubanga oye ni waden can twero konyowa me ciro pekkiwa. Laminwa Anne, ma bedo i cula nam mo i Indian Ocean, owaco ni: “To pa mamana mwaki mogo angec oturo cwinya adada. Ento, pol kare apoyo wiya kekena ni Jehovah aye pe okelo to pa mamana. En tye ki miti madwong me giko pekki ducu ki dok me cero jowa me amara ma guto. Lwodo lok i kom ada magi giweko abedo ma wiya opye mot dok anongo cuko cwiny.”

11. Ngeyo tyen lok ma oweko Lubanga oye ni waden can konyowa nining me medde ki tito kwena?

¹¹ Ngeyo tyen lok ma oweko Lubanga oye ni dano oden can cuko cwinywa me medde ki tito kwena maber-ri. I nge tito ni Jehovah tye ka diyo cwinye pien en mito ni dano gungut dok gunong kwo ma pe tum, Petero openyo ni: “Myero wubed jo ma cal nining, kun wulubo kit kwo maleng ki me woro Lubanga?” (2 Pet. 3:11) ‘Kwo maleng me woro Lubanga’ kwako bene ticwa me pwony. Calo Wonwa me polo, wan bene wamaro dano. Wamito ni gin bene gubed kacel kwedwa i Paradic. Jehovah tye ka diyo cwinye kun miyo kare ki dano ma i wang ticwu me pwonyo lok i kome kacel ki woro en. Pud dong obedo twon mot madit ya me tic kacel ki Lubanga me konyo jo mapol pwonyo lok ada ma nongo agikki peya oo!—1 Kor. 3:9.

WATYE KA KWO “I KARE ME AGIKKI”

12. Ngeyo ni watye ka kwo i kare me agikki weko wamoko gin ango?

¹² Baibul otito ka maleng kit ma kwo pa dano i “kare me agikki” bibedo kwede. (2 Tem. 3:​1-5) Kit ma dano gikwo kwede i kabedowa nyuto ka maleng ni gin ma Baibul otito tye ada. Ka wawoto ki neno ka kit pa dano balle medde ameda, man miyo wamoko ni Lok pa Lubanga genne.—2 Tem. 3:​13-15.

13. Ma lubbe ki lapor ma Yecu omiyo i Luka 12:​15-21, lapeny macalo mene ma omyero wapennye kwede?

¹³ Ngeyo ni watye ka kwo i kare me agikki bene konyowa me keto cwinywa i kom gin ma pire tek loyo. Nen kong kit ma lok man pire tek kwede ki i lapor ma Yecu omiyo i Luka 12:​15-21. (Kwan.) Pingo kilwongo lalonyo-ni ni laming? Kilwonge kit meno pe ni pien laco-ni obedo lalonyo ento pien onongo tye ka keto cwinye i kom jami ma pigi pe tego. Laco-ni onongo ‘okano lonyo pire kene, kun pe tye ki lonyo bot Lubanga.’ Laco-ni bene onongo obalo karene me yenyo jami me kom kun kare me tone onongo dong odic woko. Lubanga owacce ni: “I dyewor ma tin gibikwanyo kwoni woko ki boti.” Lapor man twero konyowa nining i kare-ni? Kare odong manok adada ci agikki bibino woko. Pi meno, pire tek ni wapennye kekenwa ni: ‘Tika yub ma aketo nyuto ni atye ka keto cwinya i kom jami ma pigi tego? Kit yub macalo mene ma akonyo lutinona me ketone? Tika atiyo ki kerona, cawana, kacel ki centena me coko jami me kom pira kena nyo mono atiyo kwede me kano lonyona i polo?’

14. Gin mutimme i kom Miki konyowa nining me neno pingo pire tek me niang ni watye ka kwo i kare me agikki?

¹⁴ Ka walwodo matut jami ma nyuto ni watye ka kwo i kare me agikki, man twero konyowa me ngeyo yo maber loyo me tic ki kwowa. Meno aye gin mutimme i kom laminwa mo ma nyinge Miki. En otito ni: “I kare ma atyeko kwanna me cinia, onongo atye ki miti me kwano matut lok i kom lee. Ki tungcel, onongo bene atye ki yub me tic macalo painia marii nyo cito ka ma can lutit kwena tye iye. Omege ki lumege mogo ma i kacokkewa gucuko cwinya me tam matut ka bitwere ki an me kwano lok i kom lee kun bene atiyo macalo painia marii nyo acito ka ma can lutit kwena tye iye. Gin gupoyo wiya ni agikki me lobo man dong cok. Ento, i lobo manyen, abibedo ki kare me kwano lok i kom lee mapatpat ma amaro pi naka. Pi meno, amoko tamma me kwano tic cing ma bikonya. Man oweko anongo tic ma onongo konya me nongo cente ma mitte dok weko abedo ki cawa muromo me tic macalo painia marii. Lacen, abedo ki kare me kobo i lobo Ecuador ka ma can lutit kwena tye iye.” I kare-ni, Miki tye ka tic kacel ki cware ma tye laneno me adwol i lobo meno.

15. Labol pa Yakobo twero konyowa nining me neno pingo pe omyero wail cingwa i kom jo ma peya gujolo kwena maber? (Nen bene cal.)

¹⁵ Cwinywa omyero pe otur ka dano pe ginyuto miti i kom kwena maber ma watito. Omyero wange ni dano pud gitwero loko kitgi. Nen kong gin mutimme i kom omin Yecu ma nyinge Yakobo. En odongo kacel ki Yecu, oneno bene ka Yecu odoko Meciya kun pwonyo ki diro ma lamal makato ngat mo keken. Kadi bed kit meno, Yakobo pe odoko lalub kor Yecu. En odoko lapwonnye i nge cer pa Yecu. Ki lok ada en odoko lapwonnye pa Yecu ma kome mit adada!b (Jon 7:5; Gal. 2:9) Pire tek ni omyero pe iil cingi woko i kom wadini ma peya gunyuto miti dok omyero imedde ki tito kwena bot jo ma yam con kong gukwero winyo lokki. Wii opo ni watye ka kwo i kare me agikki, pi meno ticwa me tito kwena obedo gin ma mitte pi oyotoyot adada. Lacen, jo magi wigi twero po i kom kwena ma itittigi ci gitwero jolone kadi wa i nge cakke pa twon can madit atika-ni.c

MEDDE KI NYUTO PWOC PI PWONY MOGO MAYOT MA IPWONYO CON

16. Pwony ma kiyubo pi jo ma pud gitye ki ngec manok i kom Baibul twero konyi nining? (Nen bene bok ma wiye tye ni “Ti Kwede me Konyo Jo Mukene.”)

¹⁶ Cam me cwiny mogo ma dul pa Jehovah miyo nongo kiyubo pi jo ma pud gitye ki ngec manok i kom Baibul. Me labolle, pwony pi lwak ma bedo cabit ki cabit, pwony ki vidio mogo ma gitye i jw.org, kacel ki magajin ma wapoko i ticwa me pwony kiyubogi tutwalle pi jo ma nongo pe gitye Lucaden. Kadi bed kit meno, wan ducu watwero nongo adwogi maber ki i pwony ma tye i igi. Pwony magi twero dongo marwa pi Jehovah, jingo niyewa i kom Baibul, ki dong konyowa me dong dirowa i tic me pwony.—Jab. 19:7.

17. I kare macalo mene ma itwero lwodo lok i kom pwonyo mogo mayot me Baibul?

¹⁷ Pi wan ma dong watiyo pi Jehovah pi mwaki mapol, cwinywa bedo yom adada ka wanongo niango manyen i kom lok ada mo me Baibul. Ento watye bene ki pwoc madit pi lok ada mayot me Baibul ma wapwonyo con ma onyikowa cok ki Jehovah. Kit ma wanyamo kwede, lok ada mayot magi pud gitwero konyowa wa i kare-ni. Ka wanongo tira mo ki i dulwa ma watamo ni pe rwatte ki mitiwa nyo tamwa, ki mwolo, wiwa omyero opo ni Jehovah Lacwecwa aye tye ka doro dulle. Ka ce wan kikomwa nyo ngat mo ma wamaro tye ka kato ki i pekki, omyero wadi cwinywa kun walwodo tyen lok ma omiyo Jehovah oye ni dano oden can. Dok ka watye ka yero kit ma omyero wati kwede ki cawawa kacel ki jami me kom ma watye kwede, wiwa omyero opo ni odong kare manok adada ki agikki piny me bino. Walego ni tira ma Jehovah miyo omedde ki jingo niyewa, otug cwinywa me tito kwena, dok okonywa me bedo lugen ka wamedde ki tic pire.