Lub Lanen pa Yecu me Tito Kwena ki Mit Kom

1. Gin ango ma weko Lucaden pa Jehovah gipat ki Lukricitayo ata-ni?

GIN acel ma weko Lucaden pa Jehovah gibedo pat ki Lukricitayo ata-ni aye mit komgia i tic me pwony. (Tito 2:14) Kadi bed kit meno, i kare mogo iromo nongo ni tek adada, me bedo ki mit kom i tic me pwony. Twero bedo ni in bene iye lok pa laelda mo ma kome mit ma owaco ni, “I kare mogo nongo pe amito tito kwena kulu.”

2. Pingo watwero nongo ni tek me medde ki tito kwena ki mit kom?

² Watwero nongo ni timo tic mukene pi Jehovah mit loyo nywako i tic me pwony. Pingo? Pien cwinywa bedo yom dok waneno adwogi maber cutcut ka watye ka nywako i tic mogo calo, gero nyo roco Odiwa me Ker, miyo kony bot utmegiwa ka ma can ma poto atura otimme iye, nyo cuko cwinygi. Ka watye ka tic kacel ki utmegiwa, wabedo ki kuc kacel ki mar i kinwa. Dok nongo wangeyo ni utmegiwa gitye ki pwoc pi jami ma watimo pigi. Ento, ka odok i tic me pwony, twero bedo ni dong watito kwena pi mwaki mapol i wang tic acel-li dok jo manok keken aye gimito winyo lokwa. Jo mukene giromo dok ki gero i kom kwena ma watito botgi. Dok bene wangeyo ni ka agikki me lobo man woto ki nyiko cok, wel jo ma gidagwa bimedde ameda. (Mat. 10:22) Gin ango ma bikonyowa me medde ki bedo ki mit kom nyo bene me medo arimawa i tic me pwony?

3. Pwony ango ma wanongo ma lubbe ki carolok ma Yecu obolo i Luka 13:​6-9?

³ Waromo nongo pwony ki i lanen pa Yecu me tito kwena ki mit kom. I kare ma Yecu tye i lobo, en otiyo matek wek enywak kwena maber-ri ki jo mapol. (Kwan Luka 13:​6-9.) I carolok mo ma Yecu obolo, Yecu oporo ticce me tito kwena ki tic pa lapur mo ma otiyo matek pi mwaki adek me gwoko yat oduro wek onyak nyinge mapol—ento, pe omedo ki nyako nyige kulu. I yo acel-lu, Yecu otero mwaki adek ka tito kwena bot Lujudaya, ento polgi pe gudoko lulub kore. Kadi bed kit meno, Yecu pe oilo cinge ka tito kwena botgi. En onongo tye calo lapur ma omedde ki bedo ki gen ni yat odurone binyako nyige. Yecu bene omedde ki tutte matek me tito kwena maber-ri bot Lujudaya.

4. Jami angwen mene ma wabinyamogi ki i lanen pa Yecu?

⁴ I pwony man, wabinyamo kit ma Yecu onyuto kwede mit kome, tutwalle i kine ka dwe abicel me agikki me ticce me pwony. (Nen “Ka man otum” i jami me akwana me nwtsty-E pi Luka 10:1.) Watwero medde ki bedo ma komwa mit ka wanongo pwony ki i jami ma Yecu owaco dok otimo. Kong dong wanyamu labol pa Yecu i kabedo magi: (1) En oketo cwinye ka timo miti pa Jehovah, (2) en oniang dok otimo jami ma lubbe ki lok pa lunebi me Baibul, (3) en ojenge i kom Jehovah pi kony, dok (4) en omedde ki bedo ki neno matir ni jo mogo gibiwinyo lokke.

YECU OKETO CWINYE KA TIMO MITI PA JEHOVAH

5. Yecu onyuto nining ni timo miti pa Lubanga obed gin ma pire tek loyo i kwone?

⁵ Yecu otito “lok me kwena maber me ker pa Lubanga” ki mit kom, pien en onongo ngeyo ni man obedo tic ma Lubanga mito ni etim. (Luka 4:43) Ki bot Yecu, tito kwena maber-ri aye onongo obedo tic ma pire tek loyo i kwone. Kadi wa i dwe mogo me agikki me ticce me pwony, en obedo ka wot “i kin gangi madito ki matino” kun pwonyo jo mapol. (Luka 13:22) En bene opwonyo lulub kore mukene mapol kit me tito kwena.—Luka 10:1.

6. Kadi bed Jehovah mito ni watim tic mukene-ni, ento omyero wabed ki neno ango i kom tic me tito kwena? (Nen bene cal.)

⁶ I kare-ni bene, tito kwena maber-ri aye obedo tic ma pire tek loyo ma Jehovah gin ki Yecu gimito ni watim. (Mat. 24:14; 28:​19, 20) Tic mo keken ma watimo pi Jehovah kubbe ki ticwa me tito kwena. Me labolle, wagero Odiwa me Ker wek jo ma watito kwena botgi gubin iye ka woro Jehovah. Dok tic ma watimo i Betel konyo i tic me pwony. Ka peko ma poto atura otimme, watute me neno ni omegiwa ki lumegiwa gunongo jami ma mitte me konyogi medde ki cito i cokke kacel ki tic me pwony. Ka waniang ni tic me tito kwena obedo tic ma pire tek loyo ma Jehovah mito ni watim, ci wabibedo ki miti madwong me tito kwena kare ki kare. Laelda mo ma nyinge Janos, ma bedo i lobo Hungary, owaco ni, “Pol kare apoyo wiya kekena ni pe tye tic mo mukene mapat ma atimo pi Jehovah i kare-ni ma twero leyo kaka tic me tito kwena; tito kwena obedo tic ma pire tek loyo.”

7. Pingo Jehovah mito ni wamedde ki tito kwena? (1 Temceo 2:​3, 4)

⁷ Waromo medo mit komwa i tic me pwony ka waparo pi jo ma watito kwena botgi kit ma Jehovah paro kwede pigi. En mito ni jo mapol guwiny kwena maber dok gujol lok ada madok i kome. (Kwan 1 Temceo 2:​3, 4.) Kit macalo kwena maber twero laro kwo pa dano, Jehovah pwonyowa ki diro me lok i yo ma gudo cwiny dano. Me labolle, brocuwa me Mar Dano—Konygi me Doko Lupwonnye pwonyowa kit me cako lok ki dano wek i nge kare mo gucak kwano Baibul dok gudok lupwonnye pa Yecu. Kadi bed jo ma watito kwena botgi pe gucako tic pi Jehovah i kare-ni, pud giromo bedo ki kare me loko tamgi ci gitiyo pire ma nongo twon can madit atika-ni peya ogik. I anyim wigi twero po ni watito pire botgi, ci gitwero bedo ki miti me tic pi Jehovah. Ento, meno twere keken ka wamedde ki tito kwena botgi i kare-ni.

YECU ONIANG DOK OTIMO JAMI MA LUBBE KI LOK PA LUNEBI ME BAIBUL

8. Lok pa lunebi mene ma okonyo Yecu me tic ki cawane i yo maber loyo?

⁸ Yecu oniang maber kit ma lok pa lunebi me Baibul onongo bicobbe kwede. En bene oniang ni ticce me pwony onongo bitero mwaki adek ki nucu keken. (Dan. 9:​26, 27) Lok pa lunebi bene okonye me niang ni ma pe orii, ebideno can dok eto woko. (Luka 18:​31-34) Pien Yecu onongo ngeyo jami ma bitimme, en otiyo ki cawane i yo maber loyo. Macalo adwogine, en otito kwena ki mit kom wek ebed ki kare me tyeko tic ma kimine me atima.

9. Pingo niang lok pa lunebi me Baibul tugo cwinywa me bedo ki mit kom i tic me tito kwena?

⁹ Ka wabedo ka lwodo lok pa lunebi me Baibul ma gitye ka cobbe i kare-ni ki mukene ma gibicobbe macok cok-ki, ci watwero medde ki bedo ki miti madwong me tito kwena. Wamoko ni lobo man marac-ci bigik woko macok cok-ki. Baibul otito con kit pa dano me kare me agikki kacel ki jami ma bitimme i karewa-ni, dok watye ka neno cobbene ki wangwa. Waniang ni telle ma tye i kin lobo Russia kacel ki Ker pa Britain ki Amerika kacel ki lobbe ma cwakogi cobo lok pa lunebi madok i kom kabaka ma tung kupiny ki kabaka ma tung kumalo me “kare me agikki.” (Dan. 11:40) Wangeyo bene ni tyen cal ma kiloko i kome i Daniel 2:​43-45 cung pi Ker pa Britain ki Amerika. Jami ma wapwonyo ki i lok pa lanebi man oweko wamoko ni, macok cok-ki Ker pa Lubanga bijwero gamente pa dano. Lok magi ducu nyuto ni agikki dong cok adada, pi meno omyero dong watiyu ki cawawa i yo maber.

10. I yo ma nining ma lok pa lunebi me Baibul tugo kwede cwinywa me bedo ki mit kom?

¹⁰ Lok pa lunebi mapol me Baibul opong ki kwena maber ma watye ki mit kom me tito pigi. Lamego Carrie ma bedo i lobo Dominican Republic owaco ni “Ka atamo i kom jami mamwonya ma Jehovah ociko pire i anyim anongo ni omyero atit pire bot jo mukene.” En omedde ni: “Ka aneno pekki ma dano gitye ka kemme kwede i kare-ni, man konya me niang ni pire tek ni dano myero gunge ni Jehovah ociko pi anyim mamwonya pigi bene.” Lok pa lunebi me Baibul nyuto ni Jehovah tye ka konyowa me cobo ticwa me tito kwena, dok man cuko cwinywa me medde ki tito kwena. Lamego Leila, ma bedo i lobo Hungary, owaco ni: “Icaya 11:​6-9 cuko cwinya me nywako kwena maber kadi wa bot jo ma ginen calo pe gitwero jolone. Angeyo ni ki kony pa Jehovah ngat mo keken twero lokke.” Dok Omego Christopher, ma bedo i lobo Zambia, owaco ni: “Kit ma Marako 13:10 otito kwede con, kwena maber-ri tye ka nya i twok lobo ducu, dok cwinya yom adada me nywako i cobbe pa lok pa lanebi man.” Lok pa lunebi mene me Baibul ma tugo cwinyi me medde ki tito kwena?

YECU OJENGE I KOM JEHOVAH PI KONY

11. Pingo onongo mitte ni Yecu ojenge i kom Jehovah me medde ki tito kwena ki mit kom? (Luka 12:​49, 53)

¹¹ Yecu obedo ki gen ni Jehovah bikonye me medde ki tito kwena ki mit kom. Yecu onongo loko bot dano ki woro ka tye ka tito kwena, ento en bene onongo ngeyo ni jo mapol cwinygi pe bibedo yom pi lok me kwena maber dok gibikwero winyone woko. (Kwan Luka 12:​49, 53.) Lutela dini pe gumaro kulu pwony pa Yecu, pi meno gutemo neko Yecu tyen mapol. (Jon 8:59; 10:​31, 39) Ento Yecu omedde ki tito kwena pien en onongo ngeyo ni Jehovah tye ka konye. Yecu owaco ni: “Pe atye kena, ento wan ki ngat ma oora. . . . Ngat ma oora tye kweda; pe oweka kena, pien nino ducu atiyo gin ma iye mito.”—Jon 8:​16, 29.

12. Yecu oyubo lupwonnyene nining me medde ki tito kwena kadi bed gukemme ki aunauna?

¹² Yecu opoyo wi lupwonnyene ni omyero gujenge i kom Jehovah pi kony. Kare ki kare, en obedo ka cuko cwinygi ni Jehovah bikonyogi kadi wa i kare me aunauna. (Mat. 10:​18-20; Luka 12:​11, 12) Pien Yecu onongo ngeyo ni jo mapol gibikwero kwena maber, omiyo en owaco ni lupwonnyene omyero gubed ryek. (Mat. 10:16; Luka 10:3) En bene ocikogi ni pe myero gudii dano ka pe gimito winyo lokgi. (Luka 10:​10, 11) Dok owaco botgi ni omyero guring woko ka kicako unogi. (Mat. 10:23) Kadi bed Yecu otiyo ki mit kom dok ogeno Jehovah, en bene ogwokke ki i jami mogo ma twero keto kwone ka mading.—Jon 11:​53, 54.

13. Pingo itwero bedo ki gen ni Jehovah bikonyi?

¹³ Wamito kony pa Jehovah me medde ki tito kwena ki mit kom i kare me aunauna. (Yabo 12:17) Pingo itwero bedo ki gen ni Jehovah bikonyi? Nen kong lega ma Yecu olego ma kicoyo i Jon cura 17. Yecu olego Jehovah ni ogwok lukwenane, dok Jehovah ogamo lega meno. Buk me Tic pa Lukwena nyuto kit ma Jehovah okonyo kwede lukwena magi me tito kwena maber-ri ki mit kom kadi bed onongo gitye ka kato ki i aunauna. I legane, Yecu bene olego Jehovah me gwoko jo ma gibiketo niye i kom lok ma lukwenane gibitito botgi. Lega man kwako wa in. Jehovah pud tye ka medde ki gamo lega pa Yecu man; Jehovah bene bikonyi kit ma okonyo kwede lukwena pa Yecu.—Jon 17:​11, 15, 20.

14. Pingo watwero bedo ki gen ni watwero medde ki tito kwena ki mit kom kadi wa i kare ma kwo tek? (Nen bene cal.)

¹⁴ Ka agikki me lobo man woto ki nyiko cok, twero doko tek adada botwa me tito kwena maber-ri. Ento Yecu ocuko cwinywa ni wabinongo kony ma mitte me medde ki tic man ki mit kom. (Luka 21:​12-15) Calo Yecu kacel ki lukwenane, waweko dano gimoko tamgi ka ce gibiwinyo nyo gibikwero winyo lokwa, dok wagwokke ki loko lok mogo ma twero kelo telle. Kadi wa i lobo ma nongo kiketo kigeng i kom ticwa, omege ki lumege gimedde ki tito kwena ki mit kom pien gijenge i kom teko pa Jehovah ento pe tekogi. Kit macalo Jehovah omiyo cwiny mere maleng bot Lukricitayo me cencwari me acel, i kare-ni bene en miniwa cwiny mere maleng wek “tic me tito kwena ocobbe kakare” kit ma en mito kwede. (2 Tem. 4:​17, NWT) Itwero bedo ki gen ni ka ijenge i kom Jehovah, ci ibibedo ki teko me medde ki tito kwena ki mit kom.

YECU OMEDDE KI BEDO KI GEN NI JO MOGO PUD GIBIWINYO LOKKE

15. Gin ango ma onyuto ni Yecu obedo ki gen ni ticce me pwony binyako nyige?

¹⁵ Yecu onongo tye ki gen ni jo mogo pud gibibedo ki miti me winyo kwena maber-ri. Bedo ki gen man okonyo Yecu me medde ki bedo ki yomcwiny kun medde ki tito kwena ki mit kom. Me labolle, i agikki me mwaka 30 K.M., Yecu oneno ni jo mapol gitye ki miti me winyo lok me kwena maber-ri. (Jon 4:35) I nge kare ma romo mwaka acel, en owaco ki lupwonnyene ni: “Kac dwong, ento lutic nok.” (Mat. 9:​37, 38) Dok lacen en onwoyo ni: “Kac tye dwong . . . pi meno wuleg Won poto, wek ocwal lutic ka kac.” (Luka 10:2) Yecu omedde ki bedo ki gen ni tye jo mogo ma gitye ki miti me winyo lok me kwena maber dok cwinye obedo yom adada i kare ma jo magi gujolo lok man.—Luka 10:21.

16. I yo ma nining ma carolok ma Yecu obolo konyo lupwonnyene me bedo ki neno mupore i tic me pwony? (Luka 13:​18-21) (Nen bene cal.)

¹⁶ Yecu okonyo lupwonnyene me medde ki bedo ki mit kom kun poyo wigi ni kwena ma gitito kelo adwogi maber i kwo pa dano. Me labolle, nen kong carolok aryo ma Yecu obolo. (Kwan Luka 13:​18-21.) Yecu oporo kwena maber me Ker pa Lubanga ki nyig kodi karadali, ma odongo odoko yat madit adada. En otiyo ki carolok man me pwonyogi ni jo mapol gibijolo kwena maber dok pe tye gin mo keken ma bigengone ki nya i kabedo mapatpat. Dok bene oporo kwena maber me Ker pa Lubanga ki tobi. Pien lok me Ker-ri onongo kibititone i kabedo mapatpat i but lobo-ni ducu dok onongo biweko dano gitimo alokaloka i kwogi, kadi alokaloka magi onongo pe binen cutcut i wang jo mukene. Pi meno, Yecu otiyo ki carolok magi me cuko cwiny lupwonnyene ni kwena ma gitito-ni binyako nyige.

17. Tyen lok ango ma watye kwede me medde ki tito kwena ki mit kom?

¹⁷ Ka watamo i kom kit ma tic me tito kwena tye ka konyo kwede jo mapol i but lobo-ni ducu, cuko cwinywa adada me medde ki tito kwena. Mwaka ki mwaka dano milion mapol ma gitye ki miti gibedo tye i Nipo dok kikwano Baibul kwedgi. Dano alip miya mapol bene ginongo batija dok gicako tito kwena kacel kwedwa. Pe wangeyo wel dano mudong ma gibijolo lok me kwena maber-ri, ento gin ma wangeyo aye ni Jehovah tye ka coko lwak mapol ata ma gibibwot ki i twon can madit atika-ni. (Yabo 7:​9, 14) Jehovah aye obedo Won tic me kac dok en tye ki gen ni jo mapol pud gibijolo lok me kwena maber-ri, pi meno omyero wamedde ki tito kwena.

18. Gin ango ma wamito ni jo mukene gunen ma lubbe ki ticwa me pwony?

¹⁸ Lupwonnye pa Yecu kare ducu gutito kwena ki mit kom. Me labolle, lukwena pa Yecu gutito kwena ki tekcwiny madwong adada dok i kare ma dano guneno arima ma gitye kwede gucako waco ni, “gin yam gubedo kacel ki Yecu.” (Tic 4:13) Wan bene omyero watit kwena ki tekcwiny kacel ki arima madwong, dok macalo adwogine dano gibineno ni watye ka lubo lanen pa Laditwa—Yecu Kricito.