“I Kare-ni Dong Amaro Tic me Pwony!”

ARWENYO YOMCWINYA WOKO

Ki cwercwiny madit, i kare ma atye i kine ka mwaka apar wiye adek, watta macok ki Jehovah-ni ocako doko goro. Lutino kwan luwota onongo ginen calo gitye agonya adada, dok acako tamo ni atye ka keng camo kwo. Acako winy calo cik pa lunyodona ki rwom me kwo pa Lukricitayo diya, dok atamo ni woro Jehovah onongo obedo tic matek tutwal. Onongo angeyo ni Jehovah tye ada, ento onongo pe awinyo calo atye cok kwede.

Pe ajuko tito kwena kwicikwici, ento onongo atiyo pi cawa manok adada. Ka acito woko ka tito kwena, onongo pe ayubbe dok anongo cako lok ki nyamo pwony tek adada. Macalo adwogine, ticca me pwony onongo pe nyako nyige dok pe kela yomcwiny dok meno omedo neno marac ma atye kwede ameda. Onongo apennye kekena ni, ‘Ngat mo twero nongo mit pa tito kwena cabit ki cabit, dwe ki dwe nining?’

I kare ma atye ki mwaka 17, onongo dong pe amito bedo i te twero pa lunyodona. Pi meno, acoko jamina, aa woko ki gang ci akobo i lobo Australia. Lunyodona cwinygi ocwer adada i kare ma aa woko ki gang. Gubedo ka para matek, ento onongo gitamo ni abimedde ki yubba me woro Jehovah.

Ki i lobo Australia, ticca pi Jehovah odok piny adada. Acako keng cokke tyen mapol. Acako mako lirem ki bulu ma gitye calo an, ma onongo wacito i cokke i dyewor acel dok wacito ka myel ki mato kongo i bar i dyewor mukene. Ka atamo i kom kwona i kare meno, aniang ni abedo ka kwo kwo laiye aryo; tyena acel onongo tye i ada, acel onongo tye i lobo, ento onongo pe awinyo agonya ka mo keken.

PWONY MA PIRE TEK MA ANONGO ATURA

I nge mwaka aryo, arwatte ki lamego mo ma oweko acako tam matut i kom kit ma atye ka kwo kwede. Onongo watye wan lumege abic ma wiwa nono ma wapango ot acel, dok walwongo laneno me adwol kacel ki dakone Tamara me bedo kwedwa pi cabit acel. I cawa ma nongo cware tye ka tiyo tic me kacokke, Tamara onongo bedo kacel ki wan anyira ci waboko lok dok wanyero matek. Man onongo yomo cwinya adada. En onongo obedo ngat mamwol dok lok kwede yot adada. Abedo ki ur madit me neno ni ngat ma maro Jehovah dok maro tic pire bedo kwede mit kit man.

Tamara onongo obedo ngat ma kome mit adada. Marre pi ada ki pi tic me pwony ogudo cwinywa. En onongo cwinye yom me miyo ki Jehovah gin maber loyo bote, ento an onongo ape ki yomcwiny pien atye ka tiyo tic manok keken. Neno ma atir ma en onongo tye kwede kacel ki yomcwinye ogudo kwona adada. Lanene opoyo wiya i kom lok ada mo me Baibul ma pire tek adada: Jehovah mito ni wan ducu wati pire ki “ki yomcwiny.”​—Jab. 100:2.

KIT MA ACAKO MARO KWEDE TITO KWENA ODOCO

Onongo amito kodi yomcwiny ma Tamara tye kwede-ni, ento wek anong yomcwiny meno, onongo mitte ni atim alokaloka madongo i kwona. Otero kare, ento acako timo alokaloka mogo matino tino i kwona. Acako yubbe me tito kwena, dok acako tic macalo painia pi tutunu kare ki kare. Man okonya me loyo lworo ma atye kwede ki me bedo ki tekcwiny. Pien onongo atiyo ki Baibul kare ducu i tic me pwony, acako maro tic man. Ma pe ori, acako tic macalo painia pi tutunu dwe ki dwe.

Acako mako lirem ki jo me mwaka mapatpat, ma gitye ka timo maber i ada dok gitye ki yomcwiny pi tic pi Jehovah. Lanengi maber okonya me cako tamo pi gin ma pire tek loyo i kwona ki me cako kwano Baibul pira kena. Acako nongo mit pa tic me pwony dok acako tic macalo painia marii. Pi tyen mukwongo i nge mwaki mapol acako winyo agonya dok acako bedo ki yomcwiny i kacokke.

ANYOMME KI LAPAINIA LAWOTA

I nge mwaka acel, arwatte ki Alex, omego ma lakica dok maro Jehovah matek. En onongo tiyo macalo lakony kor tic dok otiyo macalo painia dong pi mwaka abicel. Alex onongo bene otiyo ka ma can lutit kwena tye iye i lobo Malawi pi kare mo. Ki kunu, en obedo ka ribbe ki lumiconari ma gugudo kwone adada dok gucuko cwinye me keto pi Ker-ri mukwongo.

I mwaka 2003, wan ki Alex wanyomme dok watye ka medde i tic pi kare malac nicakke i kare meno. Wanongo pwony mapol dok Jehovah ogoyo laane i komwa i yo mapol.

JEHOVAH OGOYO LAANE I KOMWA MATEK

I mwaka 2009, kicimowa me tic macalo lumiconari i cula nam me Timor-Leste, ma tye i kin cula nam mapol me lobo Indonesia. Wabedo ki ur, yomcwiny, kacel ki lworo. I nge dwe abic, wao i Dili ma obedo boma madit loyo me lobo man.

Onongo mitte ni watim alokaloka madongo pien kwo i lobo man pat adada ki kwo me lobowa. Onongo mitte ni wapwony tekwarogi, camgi, kacel ki kwo calo gin. I ticwa me pwony onongo warwatte ki jo ma lucan, ma mogo pe gukwano nyo gukwano manok keken, gitye ki awano, dok cwinygi otur adada macalo adwogi me lweny ki tim gero.a

Tic me pwony onongo mit adada! Me labolle, i nino mo arwatte ki latin anyaka mo me mwaka 13 ma nyinge Mariab dok cwinye onongo tye ka cwer adada. Minne onongo oto mwaki mogo angec dok onongo pol kare pe neno wonne. Calo lutino mapol me mwakane, Maria onongo pe ngeyo gin ma omyero etim ki kwone. Wiya po i kare mo ma en ocako kok matek kun wacca kit ma ewinyo kwede. Ento an pe aniang gin ma en onongo tye ka wacone pien onongo pe aloko lebgi maber. Alego Jehovah ni okonya acuk cwinye, ci acako kwanne ginacoya ma twero cuko cwinye. I nge mwaki mogo ma lubo meno, aneno kit ma ada oloko kwede neno pa Maria, rukke, ki kwone. En onongo batija, dok i kare-ni en tye ki lutino kwanne me Baibul ma en pwonyogi. I kare-ni, Maria tye ki omege ki lumege ma gitye calo jo me pacone dok en winyo ni kimare adada.

Jehovah tye ka goyo laane i tic ma i Timor-Leste. Kadi bed pol pa lutit kwena pud gunongo batija i kine ka mwaki par mukato-ni, polgi gitye ka tic macalo painia, lukony kor tic, nyo luelda. Jo mogo i kingi tye ka tic i opic me gonyo leb dok gitye ka miyo kony i tic me yubo cam me cwiny i leb pengi. Onongo yomo cwinya adada me winyo dwangi ka giwero i cokke, ki nenogi ka gibwunyo, ki me neno ka gidongo i yo me cwiny.

PE ATWERO GOYO I WIYA KWO MABER MA LOYO MAN

Kwo i lobo Timor-Leste onongo pat adada ki kwo i lobo Australia, ento pe atwero goyo i wiya kwo mo mamit loyo meno. I kare mogo, onongo wawoto ki mutoka matidi, ma opong ki dano, rec mutwo, kacel ki pot dek ma gua ka wilone i cuk. I nino mogo onongo wakwano Baibul ki dano i ot matidi ma iye lyet adada, dok pe kipuyo dyere kun bene gwen tye ka wot iye. Kadi bed wakato ki i ariya magi, pol kare atamo ni, ‘Man pud dong kwo maber ya!’

Ka atamo i kom jami mukato angec, abedo ki pwoc madit adada pien lunyodona gutiyo matek me pwonya yo pa Jehovah ki me mina kony kadiwa i kare ma watta ki Jehovah onongo goro adada. Carolok 22:6 ocobbe ada i koma. Lunyodona gitye ki awaka madwong i kom Alex ki an, dok cwinygi yom ni Jehovah tye ka tic kwedwa. Nicakke i mwaka 2016 watye i tic me limo adwol i wang tic ma tye i te jang gang kal me Australasia.

Tek adada me ye ni mwaki mogo angec onongo pe amaro tic me tito kwena. I kare-ni dong amaro ticwa me pwony! Aniang ni ka watye ka kato ki i kwo matek, yomcwiny me ada bino ki i tic pi Lubanga ki cwinywa ducu. Ki lok ada, pi mwaki 18 mukato-ni ma abedo ka tic pi Jehovah wan ki Alex, magi aye obedo kare me yomcwiny ma loyo i kwona. I kare-ni dong aniang lok ada ma Daudi owaco bot Jehovah ni: “Jo ma giringo gilaro boti gubed ki yomcwiny, gibiwero wer kare ducu pi yomcwiny. . . . Gin jo ma gimari; pi in omiyo cwinygi yom adada.”​—Jab. 5:11.