Kur Agikki Piny ki Tekcwiny

Cokcok-ki Jehovah bigiko diyo cwinye woko i kom lobo man marac-ci. Kibijwero dini goba woko, luloc me lobo man bioto lweny i kom jo pa Lubanga, dok Jehovah bijwero lutim maraco i lweny me Armagedon. Lukricitayo gitye ka kuro nino man ma pire tek-ki ki miti madit.

Ki lok ada, pe wangeyo jami ducu madok i kom twon can madit-ti. Me labolle, pe wangeyo awene kikome ma twon can man bicakke iye. Pe wangeyo tyen lok ma luloc me lobo bimiyone ma biweko gioto lweny i kom dini. Pe bene wangeyo kare ma rom mene ma lweny pa luloc lobo i kom jo pa Lubanga biterone nyo ngo kikome ma gibitimone i kom jo pa Lubanga. Dok pe wangeyo yo mene kikome ma Jehovah bitic kwede me jwero jo maraco i lweny me Armagedon.

Ento kadi bed kit meno, Ginacoya miniwa ngec ducu ma mitte wek wabed ki tekcwiny pi jami ma bitimme i anyim. Me labolle, wangeyo ni watye ka kwo i agikki me “kare me agikki.” (2Tem 3:1) Wangeyo ni Jehovah ‘bijwiko’ lweny i kom dini macek wek pe kijwer dini me ada. (Mat 24:22) Wangeyo bene ni Jehovah bilaro jone. (2Pet 2:9) Dok bene wangeyo ni Ngat ma Jehovah oyero me jwero lutim maraco ki dok laro lwak dano mapol-li i lweny me Armagedon, kite atir dok tye ki teko.—Yabo 19:11, 15, 16.

Labongo akalakala mo, jami ma bitimme i anyim bimiyo ‘kom dano myel ki lworo.’ Ento, ka wakwano dok walwodo lok i kom kit ma Jehovah olaro kwede jone i kare macon ki dok gin ma en owaco ni bitimme i anyim, ci ‘wabitingo wiwa kun waneno malo’ ki tekcwiny ni kare me larrewa dong onyiko cok.—Luka 21:26, 28.