Ket Cwinyi i kom Loko Dano me Doko Lulub Kor Yecu
1. Ngo ma mitte wek dano olarre?
1 Ripot me ticwa pi mwaka 2014 nyuto miti pa jo pa Lubanga ki kit ma gumoko kwede tamgi me medde ki tito kwena maber me Ker-ri. (Mat. 24:14) Tic me tito kwena i ot ki ot, rwec me poko karatac me lwongo ki trak, ki dong miyo caden i dye lwak weko wao bot jo mapol ki kwena me Baibul. Kono, wek dano olarre, myero wakonygi me doko lulub kor Yecu ki kwano Baibul kwedgi.—1 Tem. 2:4.
2. Lapeny ango ma watwero penye kwede ma romo konyowa me bedo atera pi kwano Baibul ki dano?
2 Bed Atera Kare Ducu pi Kwano Baibul ki Dano: Ka dano mo onyuto miti, tika itemme ki tekki ducu me gamo namba cimme ki ngeyo ka ma bedo iye wek idok cen bote ki yub me cako kwano Baibul kwede? Awene ma itemo nyuto kit me kwano Baibul bot ngat mo i limwu mukwongo? Tika dong itemme me cako kwano Baibul ki ngat ma gamo magajin ki boti kare ki kare? Tika dong inyuto vidio me Pingo Myero Ikwan Baibul? ki me What Happens at a Bible Study? bot lutic luwoti, lutino kwan luwoti, jiranini, wadini, ki luremi? Ka itye ka tic ki lalor bukke nyo meja pi miyo caden i dye lwak, tika itito bot jo ma gigamo bukke ni buk meno tye pi kwano Baibul ki dano me nono?
3. Wek watit lok me ada i yo maber, ngo ma mitte?
3 Kony ma a ki Bot Jehovah ki Yecu: I kare ma Yecu omiyo cik ni ‘kilok dano me doko lulub kore’ en ocako ki wacci “wuciti,” dok meno nyuto ni myero wajing komwa dok watel yo i tiyo tic man. En pe owekowa kenwa, ento ocikke me bedo kwedwa. (Mat. 28:19, 20) Medo i kom meno, Jehovah miyowa cwiny maleng, jami tic, ki pwonnye muromo pi pwonyo dano ki ada. (Jek. 4:6; 2 Kor. 4:7) Waromo lego Lubanga pi “miti ki teko” me nywako i tic ma pire tek man.—Pil. 2:13.
4. Pingo myero waket cwinywa i kom loko dano wek gudok lulub kor Yecu?
4 Tito lok me kwena maber-ri kelo botwa yomcwiny madwong. Ento, yomcwinywa medde ka wapwonyo ngat moni lok ada dok wakonye me ribbe kwedwa i yo “ma tero dano i kwo.” (Mat. 7:14; 1 Tec. 2:19, 20) Ma dong pire tek loyo, ka waketo cwinywa i kom loko dano me doko lulub kor Yecu, wayomo cwiny Jehovah pien en “pe mito ni ngat mo orweny woko matwal, ento mito ni jo ducu guo i ningut.”—2 Pet. 3:9.