Nong Pwonnye ki Bot Lutit Kwena Mucwiny

Lutit kwena mucwiny gubedo twon mot madit i kacokke. Jo mogo dong gutiyo bot Jehovah ki gen pi mwaki mapol. Jo mukene pud gunongo diro me tic me pwony cokcok-ki. Lutit kwena magi ducu dong guneno kit ma Yecu tye ka telo kwede kacokke i kare man me agikki, wek tic me tito kwena ki loko dano me doko lupwonnye odong. (Mat. 28:19, 20) Nywako i tic me pwony weko ginongo “tek madwong” ka gurwatte ki ariya kacel ki atematema mapol. (2 Kor. 4:7) Watwero pwonyo jami mapol ki bot lutit kwena mucwiny. Ka wamiyo botgi kare, gitwero nongo yomcwiny me nywako ki jo mukene diro ma gupwonyo. (Jab. 71:18) Pi man, porre ni wan bene wanong pwonnye ki botgi. Watwero timo man nining?

I Tic me Pwony. Me bedo lupwonye mucwiny i tic me pwony, lutit kwena manyen kong gimito pwonnye. Waromo nongo pwony ki keto tamwa me neno kit ma lutit kwena mucwiny gitimo kwede ticgi. (Nen pwony ma wiye tye ni “Medde ki Mit Kom i Tic me Pwony,” i paragraf me adek i te wi lok me “Kony Jo ma Gitye ki Ngec Manok” i Wi Lubele me Febuari 15, 2015.) Adwogi maber ango ma dong inongo i tic ki jo meno i tic me pwony?

Tika itwero lwongo latit kwena mucwiny wek wuti kwede i tic me pwony? Ka latit kwena meno tye lagoro, kicel kicel iromo tero latin kwanni me Baibul i pacone wek wukwan kwede kacel. I nge kwanwu, peny latit kwena meno wek omi tam ma twero konyi wek idok latit kwena mucwiny.

Kwany Kare me Ngeyogi: Nge lutit kwena mucwiny maber ki kwanyo kare me bedo kacel kwedgi. Lwong ngat acel wek obin i otyeno me woro pi jo me ot ci ipenye lok i kome. Ka latit kwena meno obedo dano ma lagoro, wuromo keto yub me cito i pacone pi otyeno me woro pi jo me ot. Penye kit ma en ocako ngeyo kwede ada. Mot ango ma dong en olimo? En romo loko gin ango i kom kit ma wel lutit kwena odongo kwede i kabedogi? Yomcwiny ango ma en dong onongo i timo tic pa Jehovah?

Bed ki neno mupore i kom kony ma itwero nongo ki bot latit kwena mucwiny. Calo wan ducu, lutit kwena ma dong gurii bene gitye ki mot mapatpat i tic me tito kwena. (Rom. 12:6-8) Jo mukene dong gutii woko, dok man twero dwoko piny cawa ma giromo cwalo kwedwa. Kadi bed kumeno, watwero pwonyo jami mapol ki botgi pien gitye ki ngec i tic bot Jehovah ki gen.