Dongo Dirowa i Tic me Pwony—Kit me Dongo Jo ma Gigamo Magajinwa Kare ki Kare

Gin Mumiyo Pire Tek: Jo mapol gimaro kwano magajinwa ento pe gimito kwano Baibul kwedwa. Oromo bedo ni giwinyo ni gitye maber i dinigi, nyo gitamo ni gipe ki kare me kwano Baibul. Ento, ka dano kwano magajinwa kare ducu, pol kare gicako dongo miti pi Lok pa Lubanga. (1 Pet. 2:2) Pwony mo ma gukwano twero gudo cwinygi nyo kwogi romo lokke. Bedo ka limogi kare ki kare weko gibedo agonya kwedwa dok konyowa me niang mitigi ki pargi. Motmot, waromo cako kwano Baibul kwedgi.

Kit me Timone:

Dwe ki dwe, kwany kare me tero magajin manyen me Wi Lubele ki Awake! bot jo magi. Gwok nyo itwero limo dano-nu i kare mukene bene wek itug mitine me kwano pwony mo ma tye i magajin ma imiyo bote nyo me nyute bukke ma watye ka terone i dwe meno. Gwok rekode maber.—Nen Ticwa Me Ker me Januari 2014, pot 3.
Yubbe maber pi lim ducu. Ma ka tero mere magajin ci iweko kunnu, bok lok ki rwod ot wek wudong wat maber i kinwu dok idong mitine.
Bed atera me tic ki kare mo keken ma onen me cako kwano Baibul. Ka ngat ma gamo magajin ki boti openyi gin ma Baibul pwonyo i kom lok moni, tere bukkewa ma tye ki lagamme ci wunyam kacel. Ma peya ia, penye lapeny ma kubbe ki lok meno ma ibigamone ka idwogo ka lim. Ka kare ki kare wunyamo pwony mo macek kun wutiyo ki Baibul nyo bukkewa ma wakwano kwede, ci meno nongo latin kwanni me Baibul. Tika dong imiyo bot rwod ot brocuwa me Kwena Maber dok inyuto kit ma watiyo ki brocuwa man me kwano Baibul? Tika inyuto bote vidio me Pingo Myero Ikwan Baibul? ki What Happens at a Bible Study? Kadi bed dano meno okwero kwano Baibul i kare mukato angec, nge ni kwo gire lokke. Bedo ber ka dok itemo i nino mukene, pe kumeno?

Tem Timo Man i Dwe-ni:

Co nying jo ducu ma itwero tero magajin botgi kare ki kare. Ter botgi magajin manyen, dok iwac botgi ni ibikelo me dwe manyenne bene.