Dong Miti pa Dano ki Tero Magajin Botgi Kare Ducu

1. I yo ango ma watwero tic kwede ki magajin me dongo miti?

¹ Pol pa dano ma warwatte kwedgi i kare me ticwa me pwony gijolowa dok gigamo bukkewa ki yomcwiny, ento pe giye cako kwano Baibul oyot oyot. Yo acel ma waromo tic kwede me medo mitigi aye me tero magajin botgi kare ducu. Ka imiyo magajin bot ngat mo, ci co nyinge ki kabedone, ki nino ma imiyo kwede magajin bote, co bene nino dwe ki dwe me magajin ducu ma imiyo-gi, ki ginacoya ma itiyo kwede, wa ki kit ma en onyuto kwede mitine. Ka magajin manyen oo, temme me yenyo jami ma yomo cwiny jo ma imaro tero magajin botgi ci iti kwede ka idok ka lim. (1 Kor. 9:19-23) Mot mot jami mogo ma gibikwano pigi kengi ki i magajin biromo tugo mitigi me medde ki ngeyo jami mapol.

2. Pingo mitte pi oyot ni dano omyero guyeny Jehovah, dok gin ango ma waromo timone me konyogi?

² Omyero wange kono ni pol pa dano pe gibidoko lutic pa Jehovah ki kwano magajin pigi kengi. Kit ma mitte pi oyot ni dano omyero guyeny Jehovah i kare-ni, gin ango ma wan waromo timone me konyogi? (Jep. 2:2, 3; Yabo. 14:6, 7) Watwero dongo mitigi ka wanyuto botgi ginacoya ma nongo wayero ki diro i kare ducu ma nongo watero magajin botgi.

3. (a) Watwero yubo yo mapat pat me tic ki ginacoya acel mo me nyamo lok nining? (b) Lok kom gin ango ma dano ma i wang ticwa giparo pire?

³ Ti ki Ginacoya Acel Mo: Mukwongo, tam kong pi jo ma imaro tero botgi magajin, ka dong iyub yo mapat pat me tic ki ginacoya acel mo i yo ma cobo miti pa ngat acel acel. (Pil. 2:4) Me laporre, ka ngat mo pud orwenyo danone me amara, itwero dok cen ka limme tyen mapol me nyamo gin ma Baibul waco i kom kit ma jo muto gitye kwede ki pi gen me nicer. Itwero tic ki jami ma tye i buk me Reasoning i te wi lok ni “To” ki “Nicer” me yubo ginacoya acel ma ibitic kwede. Inge meno iromo bene cako nyamo lok i kom pwony mukene calo kit ma two, tiyo ki to, bigik kwede dong matwal. Gin ma pire tek aye ni omyero iniang maber lok i kom pwony ma yomo cwiny dano moni ka dok ibed ka nyute gin ma Baibul loko pire.

4. Pingo pire tek mada me konyo dano me niang maber ka watye ka tic ki Ginacoya, dok watwero timone nining?

⁴ Konygi me Niang: Kadi bed ni omyero walok macek dok i yo ma yot, ento gin mukene ma pire tek aye ni pe omyero wakwan ginacoya akwana keken. Catan dong oumo tam pa dano mapol woko ki i winyo lok me kwena maber. (2 Kor. 4:3, 4) Mito wakony kadi wa jo ma gitye ki ngec mo olo i Baibul wek guniang maber. (Tic. 8:30, 31) Pi meno, gony tyen ginacoya moni-ni maber botgi kun itiyo ki labol, i yo ma rom aroma ki kit ma imiyo kwede pwony i Cukul me Tiokraci. (Tic. 17:3) Neni dano meno oniang kony ma Lok pa Lubanga kelo i kwo-ne.

5. Itwero konyo ngat ma itero magajin bote me doko latin kwan me Baibul nining?

⁵ Ka en tye ka nongo ni jami ma en ekwano-ni yomo cwinye, ci cak medo wang tyeng aryo nyo adek mo ki i Baibul i nino acel acel ma nongo idok cen ka lim. Yeny yo me cako kwano brocuwa me Ngo nyo buk me Ngec. Ka ilubo yo man, ci ibikonyo ngat ma itero magajin bote kare ducu me doko latin kwan me Baibul.